எமிலி டான் காலன்ட்ரெல்லி (Emily Dawn Calandrelli) என்பவர் ஒரு அமெரிக்கப் பொறியாளர், எழுத்தாளர், அறிவியல் தொடர்பாளர் மற்றும் தொலைக்காட்சி தொகுப்பாளர் ஆவார். அறிவியலை அணுகக் கூடியதாகவும், உற்சாகமாக மாற்றுவதிலும் பெயர் பெற்ற பொதுப் பேச்சாளர். அவரது அறிவியல் தொடர்புக்காக ஆன்லைனில் பெரும் பின் தொடர்பைப் பெற்றுள்ளார். ஆன்லைனில் விண்வெளிப் பெண் என்று அழைக்கப்படுகிறார். இவர் விண்வெளியில் பறந்த 100 ஆவது பெண்மணி எனப் போற்றப்படுகிறார்.
கல்வி
இவர் 1987 ஆம் ஆண்டு மே 18 அன்று மேற்கு வர்ஜீனியாவில் உள்ள மோர்கன்டவுன் என்ற ஊரில் பிறந்தார். இங்குள்ள உயர்நிலைப் பள்ளியில் பட்டம் பெற்றார். இவர் இளங்கலைப் பட்டப் படிப்பை வர்ஜீனியப் பல்கலைக்கழகத்தில் பயின்றார். பின்னர் 2010 ஆம் ஆண்டு இயந்திரவியல் மற்றும் விண்வெளி பொறியியலில் பி எஸ் பட்டம் பெற்றார். இவருக்கு பொறியலில் அமைப்பு சார்பாக 2011 ஆம் ஆண்டு ரெனே மில்லர் பரிசு வழங்கப்பட்டது.
இவர் மாசசூசெட்ஸ் தொழில்நுட்ப நிறுவனத்தில் (MIT) சேர்ந்தார். அங்கு அவர் 2013 ஆம் ஆண்டில் வானவியல் மற்றும் விண்வெளி அறிவியலில் எம்எஸ் முதுகலைப் பட்டத்தைப் பெற்றார். மேலும் தொழில்நுட்பம் மற்றும் கோட்பாடு என்ற துறையில் மற்றொரு முதுகலைப் பட்டத்தையும் பெற்றார். பிறகு இவர் ஹார்வர்ட் நாசா வருகை அறிஞராகவும், தொழில்நுட்ப ஆலோசகராகவும் சென்றார்.
தொழில்
இவர் கல்லூரி மாணவியாக இருந்த போது நாசாவில் பயிற்சியாளராக சேர்ந்தார். அவர் குறைந்த ஈர்ப்பு விசை விமானத்தில் பயிற்சி எடுத்தார். செவ்வாய்க் கிரகத்தில் தரையிறங்கும் பீனிக்ஸ் மார்ஸ் லேண்டரின் மண் சோதனை பரிசோதனைக்கான உருவகப்படுத்தலை வடிவமைத்தலில் ஈடுபட்டார். ஜெட் எஞ்ஜின்களில் இருந்து தீங்கு விளைவிக்கும் உமிழ்வைக் குறைக்க லேசர்களைப் பயன்படுத்துவது குறித்த ஆராய்ச்சியில் தன்னை இணைத்துக் கொண்டார். மேலும் இரசாயன கண்டறிதல் உணரிகளை உருவாக்குதல் ஆகிய நாசா பணிகளைச் செய்தார்.
பேச்சாளர்
இவர் ஒரு தொழில் முறை பேச்சாளர் ஆவார். விண்வெளி ஆய்வு, அறிவியல் கல்வி அறிவு மற்றும் STEM (அறிவியல், தொழில்நுட்பம், பொறியியல் மற்றும் கணிதம்) ஆகியவற்றில் பாலின சமத்துவம் குறித்து உலகம் முழுவதும் உரைகளை வழங்குகிறார். 2014 ஆம் ஆண்டு கல்வி தொகுதியில் பிரபஞ்ச அறிவியலின் தொகுப்பாளராக ஆனபோது இவர் அறிவியல் தகவல் தொடர்புத் துறையில் ஒரு வாழ்க்கையைத் தொடங்கினார். இவர் 2017 ஆம் ஆண்டில் பில் நை உலகைக் காப்பாற்றுகிறார் என்ற குழந்தைகளுக்கான அறிவியல் தொடரில் பலமுறை தோன்றினார்.
புத்தகம்
இவரது எமிலியின் அற்புதமான ஆய்வகம் என்ற தலைப்பில் ஒரு கல்வித் தொடர் நெட்ஃபிளக்ஸில் 2020 ஆம் ஆண்டு வெளியானது. இவர் இளைஞர்களை அறிவியல் மற்றும் தொழில்நுட்பத்திற்கு அறிமுகப்படுத்துவதற்காக அடா லேஸ் என்ற புத்தகத்தை எழுதினார். ஹோனி ஜாங் விளக்கப்படங்களுடன் கூடிய ரீச் ஃபார் தி ஸ்டார்ஸ் என்ற படப் புத்தகத்தையும் எழுதியுள்ளார். மேலும் குழந்தைகளுக்காக வடிவமைக்கப்பட்ட அறிவியல் பரிசோதனைக் குறித்த இரண்டு புத்தகங்களையும் எழுதியுள்ளார்.
விண்வெளிப் பயணம்
இவர் 2024 ஆம் ஆண்டு நவம்பர் 22 அன்று விண்வெளிச் சுற்றுலா விமானமான ப்ளூ ஆரிஜின் என்எஸ் -28 பயணத்தின் மூலம் விண்வெளிக்குச் சென்றார். இது 107 கிலோ மீட்டர் உயரம் சென்றது. இதன் மூலம் கார்மன் கோட்டிற்கு மேலே ஒரு துணை சுற்றுப்பாதை விண்வெளிப் பயணத்தில் பறந்த 10 ஆவது பெண் ஆனார். மேலும் விண்வெளியில் பறந்த 100 ஆவது பெண்மணி என்ற சிறப்பைப் பெற்றார். 100 ஆவது இடத்தைப் பிடிப்பது என்பது ஒரு மைல்கல் சாதனையாகும்.
அவர் விண்வெளிப் பொறியியல் படிக்கத் தொடங்கியிலிருந்தே விண்வெளிக்குச் செல்ல வேண்டும் என ஆசைப்பட்டார். விண்வெளிப் பெண் (The Space Gal) என்ற புனைப்பெயருக்கு ஏற்ப அவர் விண்வெளியில் 100 ஆவது பெண்ணாக மாறியது இன்னும் பலனளிக்கிறது. இதை அவர் ஆழ்ந்த நன்றியுடன் ஏற்றுக் கொண்டார்.
இவர் விண்வெளியில் நான்கு நிமிடமே இருந்தார். அப்போது பூமியை முதன்முறையாக விண்வெளியில் இருந்து பார்ப்பதை தாய்மையுடன் ஒப்பிட்டார். அவர் உடனடியாக தலைகீழாகத் திரும்பி பூமியைப் பார்த்தார். அங்கு நிறைய இடம் இருந்தது. அது எங்கள் கிரகம் என்று சொல்லிக் கொண்டே இருந்தார். பூமிக்குத் திரும்பிய பிறகு அவர் தனது ஆன்லைன் சேனல்கள் வழியாக தனது பயண அனுபவத்தை உரையாக வழங்கினார்.
எழுதியவர் :
✍️ – ஏற்காடு இளங்கோ
******************************************************************************
Click to Join Telegram Group Link : https://t.me/+lyAFK8ZE0iczZjE1
Click to Join Facebook: https://www.facebook.com/Book Day – Bharathi Puthakalayam
இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.
புக் டே இணையதளதிற்கு தங்களது நூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து படைப்புகளையும், எங்களது bookday24@gmail.com மெயில் அனுப்பிட வேண்டுகிறோம்.
