காந்தி ஜெயந்தி கவிதை – காந்திக்கணக்கு
பிறக்கும் வரை
அவரும் காந்தி இல்லை.
பிறந்த பின்னும்
பெயரில் மட்டுமே காந்தி.
வாழ்ந்துதான்
மகாத்மா;
வாழவைத்துதான்
தேசப்பிதா.
தானாகப்
பெயர் சூட்டிக்கொள்வதாலும்
போதாது;
பிறரிடம்
பட்டம் வாங்கிக்கொள்வதாலும்
போதாது.
அவர் போல
நடிப்பதும் போதாது—
நடிக்காததுபோல்
நடிப்பதும் போதாது.
அவர் போல
இருப்பதும் போதாது;
அவராக
மாறுவதும் போதாது.
அவரைப் போல
புகழ் பெறுவதும் போதாது;
புகழை
வாங்கிக்கொள்வதும் போதாது.
“மகாத்மா”
காப்புரிமை
எந்த வாரிசுக்கும்
கொடுக்கப்படவில்லை.
அவரை மிஞ்சுவதற்கும்
எந்தத் தடையும்
விதிக்கப்படவில்லை.
காந்தி நோட்டுகள்
முடக்கப்படலாம்.
வங்கிகள்
மூடப்படலாம்.
காந்தியும்
முடிக்கப்பட்டிருக்கலாம்.
ஆனால்—
காந்திக்கணக்கு
முடியாது.
காந்தியும்
இந்த தேசமும்
வேறுவேறல்ல;
எல்லோரையும்
எளிதில் நம்பி
ஏமாறுவதில்!
தேசப்பிதா
என்று
மக்கள் மனதில்
சுயமாய்
எழுதிக்கொண்ட பெயர்
அது.
இந்தியா
பெயரிலான நாடல்ல;
இந்தியர்களை
அனாதையாய்
யாரும் விட்டுச்
செல்லவில்லை.
அவராகப்
பிறக்க முடியாது.
ஆனால்—
அவரைவிட
மேலாக வாழவும்,
இந்த நாட்டை
மேலாக வாழவைக்கவும்
எந்தத் தடையும்
அவர் விட்டுச் செல்லவில்லை.
யாரும்
தடையும்
போடவில்லை.
காந்திக்கணக்கு
இன்னும் முடியவில்லை!
***********************************************
📚 எழுதியவர் :
✍🏻 அ.சீனிவாசன்
******************************************************************************
Click to Join Telegram Group Link : https://t.me/+lyAFK8ZE0iczZjE1
Click to Join Facebook: https://www.facebook.com/Book Day – Bharathi Puthakalayam
இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.
புக் டே இணையதளத்திற்கு தங்களதுநூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து படைப்புகளையும், எங்களது bookday24@gmail.com மெயில் அனுப்பிட வேண்டுகிறோம்.
