மில்டன் ஃப்ரீட்மேன் (Milton Friedman) ஜூலை 31, 1912இல் பிறந்து நவம்பர் 16, 2006இல் மறைந்த அமெரிக்கப் பொருளாதார அறிஞர், கல்வியாளர், மற்றும் பணவியல் கொள்கையின் முன்னணி ஆதரவாளர்களில் ஒருவர். 1976ஆம் ஆண்டில் நுகர்வு பகுப்பாய்வு, பண வரலாறு மற்றும் கோட்பாடு துறையில் அவரது சாதனைகளுக்காகவும், நிலைப்படுத்தல் கொள்கையின் சிக்கலான தன்மையை நிரூபித்ததற்காகவும் அவருக்குப் பொருளாதாரத்திற்கான நோபல் பரிசு வழங்கப்பட்டது.
ஃபிரைட்மேன் பணவியல் கொள்கையின் நிறுவனர் மற்றும் Chicago school of Economics (சிகாகோ பொருளாதாரப் பள்ளி) பொருளாதார அறிஞர்களில் ஒருவர் ஆவார். ஃபிரைட்மேனின் புத்தகம், A Theory of the Consumption Function (1957), நிரந்தர வருமான அனுமானக் கோட்பாட்டினை வெளிப்படுத்தியது, குடும்ப உறுப்பினர்கள் தற்காலிகமாகவோ அல்லது நிலைபெற்றதாகவோ கருதும் வருமான மாற்றங்களை விட அதன் நிரந்தர வருமானத்தில் ஏற்படும் மாற்றங்களால் ஒரு வீட்டின் நுகர்வு மற்றும் சேமிப்பு முடிவுகள் அதிகம் பாதிக்கப்படுகின்றன என்ற கருத்தினை அவர் வெளிப்படுத்தினார். நிரந்தர வருமான அனுமானம், சராசரி மற்றும் விளிம்பு நுகர்வு போக்குகளுக்கு இடையிலான உறவு தொடர்பான அனுபவத் தரவுகளில் தோன்றிய சில புதிர்களை விளக்கியது. எடுத்துக்காட்டாக, வரி அதிகரிப்பு வடிவத்தில் நிதிக் கொள்கை, தற்காலிகமாகக் கருதப்பட்டால், நுகர்வில் எதிர்பார்க்கப்படும் குறைப்புகளுக்கு வழிவகுக்காது என்பதையும் இது விளக்க உதவியது; அதற்குப் பதிலாக, அதிகரித்த வரி சேமிப்பிலிருந்து நிதியளிக்கப்படலாம், இதனால் நுகர்வு அளவுகள் மாறாமல் இருக்கும். இது ஃபிரைட்மேனின் புதிய கண்டுபிடிப்பாகும். குடும்பங்கள் நிரந்தர வருமானம் மாறுவதாக உணரவில்லை என்றால், அவர்கள் தங்கள் நிறுவப்பட்ட செலவு முறைகளை பராமரிப்பார்கள் என்று குறிப்பிட்டார்.
Money does not matter (பணம் ஒரு பொருட்டல்ல) என்ற கீனீசியன் கருத்தை ஃபிரைட்மேன் எதிர்த்தார், அதற்குப் பதிலாகப் பண விநியோகத்தில் ஏற்படும் மாற்றங்கள் குறுகிய காலத்தில் உண்மையான பொருளாதார நடவடிக்கையையும் நீண்ட காலத்திற்கு விலை அளவையும் பாதிக்கும் என்ற கோட்பாட்டை வெளிப்படுத்தினார். ஊதிய பணவீக்க விகிதத்திற்கும் வேலையின்மை விகிதத்திற்கும் இடையில் ஒரு நிலையான பரிமாற்றம் இருப்பதாகக் கூறும் முக்கிய கீனீசியன் கட்டமைப்பான பிலிப்ஸ் வளைவின் செல்லுபடியை அவர் கேள்வி எழுப்பினார். பணவீக்கம் மற்றும் வேலைவாய்ப்பு மற்றும் உண்மையான மொத்த உள்நாட்டு உற்பத்தியில் குறுகிய கால ஏற்ற இறக்கங்கள் ஆகியவற்றின் சிக்கல்களுக்கு ஃபிரைட்மேனின் தீர்வு money supply rule (பண அளிப்பு விதி) என்று அழைக்கப்படுகிறது. உண்மையான மொத்த உள்நாட்டு உற்பத்தி அதிகரித்த அதே விகிதத்தில் பண விநியோகத்தை அதிகரிக்க பெடரல் ரிசர்வ் வாரியம் தேவைப்பட்டால், பணவீக்கம் மறைந்துவிடும் என்று அவர் வாதிட்டார்.
1970களின் தேக்க நிலை – அதிகரித்து வரும் பணவீக்கத்துடன் அதிகரித்து வரும் வேலையின்மையால் வகைப்படுத்தப்பட்டது, இது ஃபிரைட்மேன்-பெல்ப்ஸின் பார்வைக்கு வலுவான சான்றுகளை வழங்கியது. விலை நிலை பண அளிப்பினைப் பொறுத்தது என்ற கருத்தை வெளிப்படுத்தினார். பணத்தின் அளவு கோட்பாட்டை மீண்டும் உயிர்ப்பிக்க ஃபிரைட்மேன் ஆதாரங்களை வழங்கினார். 1956இல் வெளியிடப்பட்ட Quantity Theory of Money (பணத்தின் அளவு கோட்பாட்டு) என்ற புத்தகத்தில், ஃபிரைட்மேன் நீண்ட காலத்திற்கு, அதிகரித்த பண வளர்ச்சியானது விலைகளை அதிகரிக்கிறது, ஆனால் உற்பத்தியில் சிறிதளவு அல்லது எந்த விளைவையும் ஏற்படுத்தாது என்று கூறினார்.
குறுகிய காலத்தில், பண விநியோக வளர்ச்சியில் அதிகரிப்பு வேலைவாய்ப்பு மற்றும் உற்பத்தியை அதிகரிக்கக் காரணமாகிறது, அதே நேரத்தில் பண விநியோக வளர்ச்சியில் குறைவு எதிர் விளைவை ஏற்படுத்துகிறது என்று அவர் வாதிட்டார். ஃபிரைட்மேன் 2006இல் 94 வயதில் இறந்தார். அவரது கோட்பாடுகள் மிகவும் செல்வாக்கு மிக்கவையாக இருந்ததால், அவர் ஜனாதிபதி ரொனால்ட் ரீகன் மற்றும் பிரிட்டிஷ் பிரதமர் மார்கரெட் தாட்சரின் பொருளாதார நடவடிக்கைகளை முன்னெடுத்டுத்துச் செல்ல பெரிதும் உதவினார். “நவீன முதலாளித்துவத்தை மறுவடிவமைத்துள்ளார்” என்றும் “பணவீக்க எதிர்ப்பு, வரி குறைப்பு மற்றும் அரசாங்க எதிர்ப்பு கொள்கைகளுக்கு அறிவுசார் அடித்தளங்களை வழங்கியுள்ளார்” என்றும் வால் ஸ்ட்ரீட் ஜர்னல் இதழ் குறிப்பிட்டது.
ஆதாரம்: www.britannica.com; www.investopedia.com; www.econlib.org
📚 எழுதியவர்:
******************************************************************************
Click to Join Telegram Group Link : https://t.me/+lyAFK8ZE0iczZjE1
Click to Join Facebook: https://www.facebook.com/Book Day – Bharathi Puthakalayam
இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.
புக் டே இணையதளத்திற்கு தங்களது நூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து படைப்புகளையும், எங்களது bookday24@gmail.com மெயில் அனுப்பிட வேண்டுகிறோம்.
