1)அன்பே என் அன்பே
************************
கனவுக்குள் வந்து நின்று
அழைப்பு மணியை அழுத்துகிறாய்
துள்ளும் மணியோசையில்
துயில் கலைந்து எழுந்துவிட்டேன்
எவ்வளவு நேரம் கைவலிக்க
அழைப்பு மணியை திரும்பத் திரும்ப அழுத்துகிறாயோ அன்பே
கதவைத் திறந்து உன்னை உள்ளே அழைக்க முடியாமல்
விழிப்புக்குள் சிக்கிக் கொண்டு தவிக்கிறேன்
முதலில் தூக்கத்தை திறந்து
பிறகு கனவைத்திறந்து
கனவினுள் இருக்கும் கதவினைத் திறந்து உன்னை உள்ளே அழைக்கவே
தவியாய் தவிக்கிறேன்
2) தியானம்
*****************
நெருப்புத் தூண்களைக் கொண்டு கட்டப்பட்ட தியான மண்டபம்
புகையால் வேயப்பட்ட கூரை
நடுவில் அமர்ந்திருக்கிறாள்
சிறிய எலுமிச்சை பழங்களை கோர்த்ததுபோல் மணிமாலை அணிந்த பெண்
விம்மும் மார்புகளால் அதை ஜெபிக்கிறாள்
முதல் துளி கண்ணீருக்கு ஆறுதல் சொல்ல ஓடிவருகிறது அடுத்த துளி கண்ணீர்
3) காலிச் சொற்கள்
*********************
சொற்களில் இருந்து
இறங்கிப் போய்
இரண்டு அர்த்தங்கள்
தெருவில்
சண்டை இட்டுக் கொண்டன
காலிச் சொற்கள் சண்டையை
வேடிக்கை பார்த்துக் கொண்டு நின்றன
அவ்வழியே சென்ற குப்பை சேகரிக்கும் பைத்தியன்
அந்த காலிகளை பொறுக்கி
தன் சாக்கு பையில் போட்டுக்கொண்டு
போய்விட்டான்
இனி சண்டை முடிந்ததும் அந்த அர்த்தங்கள்
எங்கு போய் கூடடையும்
4) அளவை
**************
எங்கள் ஊரும் மலையும் அருகருகே படுத்திருக்கும் காதலிணைகள்
மலையின் காதல் மொழியை கேட்டு ஊர் கிரங்கி இருக்கும் நள்ளிரவில்
நான் தாபத்தில் விழித்திருப்பேன்
நீளமான விஷயங்களை அம்மலையைக் கொண்டு அளப்பது எங்களூர் வழக்கம்
நான் கூட என் பெருமூச்சை மலையின் அளவில் சொல்வதுண்டு
மூன்று மலை நீளத்திற்கு நான் விட்ட பெருமூச்சுதான் இன்று வரை என்
சாதனையாக இருக்கிறது
அது அவள் என்னை பிரிந்து சென்றபோது விட்டது
அதை விட நீளமான பெருமூச்சை என்னை விடச்செய்துவிட வேண்டுமென்று
பந்தயம் கட்டித் தோற்றுக் கொண்டிருக்கின்றன என் பெருந்துயரங்கள்
5) புள்ளியை நோக்கி நகரும் வட்டம்
******************************
முதுமையில் இருந்து குழந்தைமையை நோக்கி பின்னோக்கி வாழ்ந்து பார்க்க வேண்டும் என்றான் கிழவன்
அப்போது நிரந்தரமாக பிரிந்து போனவர்கள் பழைய அன்போடு திரும்ப வருவார்கள்
முதுமையின் சுருக்கங்கள் நெளிந்து இறங்கி எங்கேயோ நழுவி ஓடிவிடும்
இல்லற சுகத்தை முடிவில் இருந்து தொடங்கி முதல்வரை அனுபவிக்கலாம்
மீசை உதிர்ந்து அரும்பாகி பொழுதுகள் சிரிப்புத்தோரணமாகத் தோன்றும்
பிறகு மணலில் விளையாடி
தாயின் மடியில் உறங்கி
குழந்தமையின் தெய்வீக ஒளியில் மூழ்கி
தான் காணாமலாகிவிடுவேன் என்று
புலம்பிக் கொண்டிருந்தான்
கிழவனை தோதாக மடியில் கிடத்திக் கொண்டாள் அவனது இல்லக்கிழத்தி
குழந்தையைப் போல தவழ்ந்து தவழ்ந்து வெளியேறிச் சென்றது அவனது உயிர்
விழிப்புக்குள் சிக்கிக் கொண்டு..
விம்மும் மார்புகள்..
அஅந்த அர்த்தங்கள் எங்கு போய் கூடடடையும்..
மூன்று மலை நீளத்திற்கு நான் விட்ட பெருமூச்சு
குழந்தையை போல தவழ்ந்து.. தவழ்ந்து.. வெளியேறிச் சென்றது அவனது உயிர்..
கவிஞர் உயிரைக் கொடுத்து எழுதிய வரிகள்..
மலையின் உச்சியில் உருவாகும்
குறுகிய நீர்வீழ்ச்சி..
ஆழப் பாய்ந்து..
கரையை அகலப்படுத்தி..
கடலைத் தேடி பாய்வதை போன்றது
கவிஞர் கார்த்திக் திலகனின் கவிதைகள்.. நெஞ்சு நிறை வாழ்த்துகள்