தாமஸ் பிகெட்டி (Thomas Piketty) மே 7, 1971இல் பிறந்த புகழ்பெற்ற பிரெஞ்சு நாட்டினைச் சார்ந்த பொருளாதார அறிஞர் ஆவார். பிகெட்டியின் படைப்புகள் முதன்மையாக வருமானம் மற்றும் செல்வ சமத்துவமின்மையை மையமாகக் கொண்டுள்ளன. 2013ல் வெளியிடப்பட்ட பிகெட்டியின் Capital in the Twenty-First Century (இருபத்தியோராம் நூற்றாண்டில் மூலதனம்) என்ற புத்தகம் கல்வித் துறையில் மிகவும் உலக அளவில் செல்வாக்கு மிக்க படைப்பாகும்.
வருமானம் மற்றும் செல்வ சமத்துவமின்மையின் வரலாற்றுப் போக்குகள் பற்றிய விரிவான பகுப்பாய்வை இந்த புத்தகம் விளக்குகிறது. தலையீடு இல்லாமல், பொருளாதார வளர்ச்சி விகிதத்துடன் ஒப்பிடும்போது மூலதனத்தின் மீதான அதிக வருவாய் விகிதம் காரணமாகச் செல்வ சமத்துவமின்மை காலப்போக்கில் அதிகரிக்கும் என்று பிகெட்டி வாதிடுகிறார். இந்தப் போக்கு குறிப்பிடத்தக்க சமூக மற்றும் பொருளாதார சவால்களை முன்வைக்கிறது என்று அவர் கூறுகிறார்.
முற்போக்கான செல்வ வரி
அதிகரித்து வரும் வருமானம் மற்றும் செல்வ சமத்துவமின்மையை நிவர்த்தி செய்வதற்கான கொள்கை கருவியாக முற்போக்கான செல்வ வரிகளைச் செயல்படுத்துவதை பிகெட்டி ஆதரிக்கிறார். இத்தகைய வரிகள் செல்வக் குவிப்பைக் குறைக்கவும், வளங்களின் சமமான விநியோகத்தை ஊக்குவிக்கவும் உதவும் என்று அவர் வாதிடுகிறார்.
சமத்துவமின்மையின் அரசியல் பொருளாதாரம்
பிகெட்டியின் படைப்புகள் சமத்துவமின்மைக்குப் பங்களிக்கும் அரசியல் மற்றும் நிறுவன காரணிகளையும் ஆராய்கின்றன. வருமானம் மற்றும் செல்வப் பகிர்வை வடிவமைப்பதில் அரசியல் அதிகாரம் மற்றும் கொள்கைத் தேர்வுகளின் பங்கை அவர் எடுத்துக்காட்டுகிறார். அதிகரித்து வரும் சமத்துவமின்மையை எதிர்ப்பதற்குக் கொள்கை தலையீடுகள் மற்றும் சமூக விதிமுறைகளில் மாற்றங்கள் அவசியம் என்று பிகெட்டி வாதிடுகிறார்.
இந்தியாவும் சமத்துவமின்மையும்
2024இல் தாமஸ் பிகெட்டியின் (மூன்று ஆசிரியர்களுடன்) “இந்தியாவில் வருமானம் மற்றும் செல்வ சமத்துவமின்மை 1922-2023” என்ற தலைப்பில் ஓர் ஆய்வு ஆவணம் வெளியிடப்பட்டது. இந்த ஆய்வானது இந்தியாவின் உச்சமான 1% வருமானம் பெறுபவர்களின் பங்கானது உலகிலேயே மிக உயர்ந்த ஒன்றாகும் என்பதைக் காட்டுகிறது. தேசிய வருமானத்தில் (NI) உச்சபட்ச வருமானம் பெறும் 1% மக்கள், 1922இல் 13% தேசிய வருமானத்தைப் பகிர்ந்துள்ளனர் இது, 2022 இல் இப் பங்கானது 22.6% ஆக அதிகரித்துள்ளது. உச்ச வருமானம் பெறும் முதல் 10% மக்கள் 1951இல் 37% தேசிய வருமானத்தில் பங்குகளைப் பெற்றவர்கள் 2022இல் இதன் பங்கானது 60% அதிகரித்துள்ளனர்.
குறிப்பாக 1950 மற்றும் 1980க்கு இடையில், முதல் 10% மக்களின் வருமானப் பங்கு சீர்திருத்தத்திற்குப் பிந்தைய காலத்தில் வேகமாக உயர்ந்துள்ளது என்பது குறிப்பிடத்தக்கது. மந்தமான பொருளாதார வளர்ச்சி, சேமிப்பு மற்றும் முதலீட்டில் நிலையான சரிவு மற்றும் ஏற்றுமதியில் குறைவு ஏற்பட்டுள்ளதாக ஆய்வு வெளிப்படுத்துகிறது. இளைஞர்களிடையே வேலையின்மை கணிசமாக அதிகரித்துள்ளது, அதே நேரத்தில் உண்மையான ஊதியங்கள் ஒப்பீட்டளவில் தேக்க நிலையில் உள்ளன. மோடியின் ஆட்சிக் காலத்தில் வாங்கும் திறனில் தெளிவற்ற முன்னேற்றமும், தீவிர வறுமை குறைப்பும் ஏற்பட்டுள்ளது (பக். 26-27) என்று குறிப்பிடுகின்றார். இந்தியாவின் நவீன முதலாளித்துவத்தால் வழிநடத்தப்படும் பில்லியனர் ராஜ்ஜியம், காலனித்துவ சக்தியால் வழிநடத்தப்படும் பிரிட்டிஷ் ராஜ்ஜியத்தை விட இப்போது சமத்துவமற்றதாக இருப்பதாக ஆய்வு முடிவு செய்துள்ளது.
கடந்த தசாப்தத்தில் உலகளவில் வருமானம் மற்றும் செல்வ சமத்துவமின்மை குறித்த விரிவான விவாதங்களையும் பிகெட்டியின் கருத்துக்கள் தூண்டிவிட்டுள்ளன. அவரது ஆராய்ச்சி கொள்கை வகுப்பாளர்கள், பொருளாதார வல்லுநர்கள் மற்றும் சமத்துவமின்மை குறித்த பொது விவாதத்தைப் பாதித்துள்ளது, பொருளாதார வளர்ச்சியின் பரவல் விளைவுகள் மற்றும் சமத்துவமின்மையை நிவர்த்தி செய்வதற்கான கொள்கை நடவடிக்கைகளின் தேவை குறித்து அதிக கவனம் செலுத்த அழைப்பு விடுத்துள்ளது. பிகெட்டியின் Capital in the Twenty-First Century (2013), Capital and Ideology (2020), A Brief History of Equality (2022) ஆகியன புகழ்பெற்ற அவருடைய புத்தகங்கள் ஆகும்.
ஆதாரம்: www.britannica.com; www.ineteconomics.org; www.bruegel.org; www.icrict.com
📚 எழுதியவர்:
******************************************************************************
Click to Join Telegram Group Link : https://t.me/+lyAFK8ZE0iczZjE1
Click to Join Facebook: https://www.facebook.com/Book Day – Bharathi Puthakalayam
இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.
புக் டே இணையதளத்திற்கு தங்களதுநூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து படைப்புகளையும், எங்களது bookday24@gmail.com மெயில் அனுப்பிட வேண்டுகிறோம்.
இதைவிட கன கச்சிதமாக எவரும் இத்தகைய அறிமுகத்தை எழுதிவிட முடியாது.