அ.சீனிவாசனின் “நவீன தரிசனம்” கவிதைகள் தொகுப்பு

2. கடவுளின் நிழல்

நீயும் கடவுளாகலாம் —
அவருக்கு எந்த ஆட்சேபணையும் இல்லை.

ஒரே நிபந்தனை:
அமைதியாய் இரு.

முழு அமைதியாய்.

***********************************************

3. மறுபிறப்பு

இனி என் முகத்தில்
அவமானத்தின் முத்திரை இல்லை.

ஒவ்வொரு “இல்லை”யும்
என்னுள் புதிய விதையாக முளைக்கிறது.

முறைகேடாக நிராகரிப்பவர்களுக்கே நாணம் இல்லையென்றால்,
நான் ஏன் தலைநிமிரக் கூடாது?

மீண்டும். மீண்டும். மீண்டும்.

***********************************************

4. மர்மங்களின் மரணம்

மர்ம மனிதன் → ரகசியம் → கேலிப் பொருள்!
மர்ம நோய் → வைரஸ் → வாக்குறுதி!

சில மர்மங்கள் தற்கொலை செய்துகொள்கின்றன,

சிலவற்றை ஊடகங்கள் விழுங்கி ஏப்பம் விடுகின்றன.

இறுதியில் —
“மர்மம் எதுவும் இல்லை” என்று
சிகப்பு நாடா சுற்றி,
கோப்பில் “முடிந்தது” என்ற முத்திரை.

அடுத்த மர்மத்துக்கு அழைப்பு!

***********************************************

5. பணியாணை மந்திரம்

முதல் முறையாக
அடையாள அட்டையை மார்பில்
மாட்டிய
மகன்,
நகரின் முதல்தர கம்பெனியில்
நிற்க…

ஊரில் தந்தை:
“கீழ்த்தெரு மேல்தெருவுக்கும்
இன்று நான் சமம்!” என முழங்க,

ஒரே மந்திரம்,
ஒரே பெருமிதம்:

“என் மகன்… MNC!”

***********************************************

6. விடுதலை

“ஏன் யாருக்கும்
என்னை நிரூபிக்க வேண்டும்?”

இந்தக் கேள்வியின் கூர்மையில்
என் சங்கிலிகள்
தானாகவே வெடித்துச் சிதறின.

***********************************************

7. வேண்டுகோள்

பறக்கும் மலரெனத் திரிந்த
பட்டாம் பூச்சி திடுக்கிட்டது —
நடமாடும் சோலையைக் கண்டு!

சோலையம்மா,
உன் பச்சைத் தோட்டத்தில்
ஒரு வண்டாகவோ,
ஒரு மெல்லிய நிழலாகவோ
என்னை ஏற்றுக்கொள்.

***********************************************

8. புடவையின் செய்தி

எல்லாப் பத்திரிகைத் தலைப்புகளையும்
நான் மறந்துவிட்டேன்.

உன் புடவையின் மடிப்புகளில்
நான் ஒரு சிறு, அமைதியான செய்தியாக துணுக்காக
இடம் பெற்றால்… போதும்.

***********************************************

9. கவிதையின் தத்துவம்

எனக்காகவே நீ எழுதப்பட்டாய் —
இது மட்டும் மாறாத உண்மை.

பிடித்தால் — இது என் கவிதை.

பிடிக்காவிட்டால்…
அடுத்த வரியில் இன்னொரு கவிதை பிறக்கும்.

***********************************************

10. பொருள்களின் பெருமை

உன் தலைக்கு மேல் குடை செருக்குடன் நிழல் தருகிறது,

உன் காலடியில் செருப்பு திமிருடன் துணை நிற்கிறது,

உன் உடலைத் தழுவும் புடவை மெல்லிய காதலை முணுமுணுக்கிறது.

இவற்றையெல்லாம் கேட்டு
இந்தக் கவிதை மட்டும்
என்னுடன் இணைந்து சிரிக்கிறது —
அமைதியாக, ஆழமாக.

***********************************************

11. காதல் எழுத்து

உனக்கு நான் பிடிக்கும் என்று
எழுத ஆரம்பிக்கிறேன்.

ஒருவேளை நான் பிடிக்காவிட்டாலும்,
என் வார்த்தைகள்
உன் இதயத்தைத் தொடத் தொடங்கிவிடும் —

மெல்ல… மெல்ல…

***********************************************

12. அழகின் கோபம்

நடக்கும் போது
உன் முதுகில் மட்டும் சாமரம் வீசுகிறாய் —
உன் முன்னழகு பொறாமையில் வியர்க்கிறது!

இடையில் உன் கூந்தலை
முன்னால் விட்டுக்கொள்…

சமநிலை தானாக வரும்.

***********************************************

13. புதிய பிறந்தநாள்

உன்னை முதன் முறை பார்த்த நாளை
என் பிறந்தநாளாக்கி,
அரசு கெஜட்டில் பதிவு செய்துவிட்டேன்.

உன்னைச் சந்திப்பதற்கு முன்
நான் வாழ்ந்த அத்தனை நாட்களும்

தாயின் கருப்பை தாண்டிய
நீண்ட… காத்திருப்பு மட்டுமே.

***********************************************

14. நவீன பாதுகாப்பு

மகன்களுக்கு தனி வீடு,
மகள்களுக்கு லட்சக்கணக்கில் Fixed Deposit,
பீரோ நிறைய பணம் —
எல்லாவற்றையும் பூட்டி வைத்துவிட்டு,
நீச்சல் குளத்தில் மிதக்கிறார்கள்:

“வாழ்க்கை… நீர்க்குமிழி!”

***********************************************

15. ராமாயணம் மீண்டும்

“அக்காலத்தில் வாஷிங் மெஷின் இருந்தால்…”

“சலவைக்காரன் இல்லையென்றால்…”

“சீதையின் சேலையை யார் கழுவியிருப்பார்கள்?”

அவர்கள் இன்று ராமாயணத்தை
சலவைப் பெட்டியில் இருந்து தேடுகிறார்கள் —
ட்ரை கிளீன் மணம் பரப்பியபடி.

***********************************************

16. உணர்ச்சிகளின் விளையாட்டு

சோக நாட்களில் சந்தோஷம்
திடீரென சூழ்ந்துகொள்கிறது.

சந்தோஷ நாட்களில் சோகம்
மூலையில் பொறுமையாய் காத்திருக்கிறது.

அதனால்தான் நான்
எப்போதும் ஒரு நடுநிலை முகத்துடன்
நடக்கிறேன்.

***********************************************

17. தனிமையின் தத்துவம்

யாரும் இல்லை என்று உணரும்போதுதான்
யாரோ ஒருவர் மிகத் தேவைப்படுகிறார்.

மனிதனின் மிகப் பெரிய,
அழகான முரண்பாடு இதுவே.

***********************************************

18. மறைந்த காதல்

நான் உன்னைக் காதலித்தேன் —
இதை நீ ஒருபோதும் அறியமாட்டாய்.

இந்த இரகசியமே
என் காதலுக்கு
மிக உயர்ந்த சான்றிதழ்.

***********************************************

19. முன்னுரிமை

உன் “இல்லை”யைத் தாங்கும் வலிமையை
என் மனதுக்கு பயிற்சி கொடுத்த பின்னரே
உன்னிடம் வந்தேன்.

உன் காதல் உன் உரிமைதான்,
ஆனால்… எனக்கு முன்னுரிமை!

***********************************************

20. வெல்லும் வார்த்தை

“பெப்பர் ஸ்ப்ரே… செல்ஃபி டிபென்ஸ்…”
பாலியல் தொல்லைப் பாதுகாப்பு வகுப்பில்
பயிற்சியாளர் தொடர்ந்து சொல்லிக்கொண்டிருக்க,

ஒரு தொழிலாளி எழுந்து:
“போடாங்க…த்தா!
சொல்லத் தெரிஞ்சா போதும்!” என்றாள்.

வகுப்பு முடிந்தது.

***********************************************

21. பொம்மையின் ஞானம்

பொம்மையுடன் பேசினாள்,
நான் பொம்மையாகவே கேட்டேன்.

“ஞானியாக வேண்டாம் —
பொம்மையாய் இருப்பதே போதும்” என்றேன்.

உடனே
ஒரு பெண் குழந்தையைப் பெற்றெடுக்கும்
வரம் வேண்டும்… என்றாள்.

***********************************************

📚 எழுதியவர் : 

✍🏻 அ.சீனிவாசன்

******************************************************************************