கூடி வாழ்ந்தால் கூடுதல் ஆயுள்!

கூடி வாழ்ந்தால் கூடுதல் ஆயுள்!

புரிதலைப் புதுப்பிக்கும் புதிய ஆய்வுகள் – 15

கூடி வாழ்ந்தால் கோடி நன்மை என பழமொழியாக சொல்ல கேட்டிருப்போம். அதன் ஒரு வகை நன்மையை புதிய அறிவியல் ஆய்வொன்று உறுதிப்படுத்தியிருக்கிறது.

சமீபத்திய ஆராய்ச்சியின்படி, அதிக சமூகத்தன்மையுடன் குழுவாக வாழும் உயிரினங்கள் நீண்ட காலம் வாழ்கின்றன மற்றும் நீண்ட காலத்திற்கு சந்ததிகளை உருவாக்குகின்றன. விலங்குகளின் சமூக வாழ்க்கையும் அவற்றின் ஆயுட்காலமும் தொடர்புடையனவா என்பதை ஆராயும் இந்த ஆராய்ச்சி, ஜெல்லி மீன்கள் முதல் மனிதர்கள் வரை விலங்கு இராச்சியம் முழுவதையும் ஆராய்ந்த முதல் ஆய்வாகும்.

சமூகத்தன்மையின் நன்மைகள் மற்றும் பாதகங்கள் என்ன? சமூக உயிரினங்கள் வளங்களைப் பகிர்ந்து கொள்வது, வேட்டையாடுபவர்களிடமிருந்து பாதுகாப்பு பெறுவது, மற்றும் சந்ததிகளை வளர்க்க உதவி பெறுவது போன்ற பல நன்மைகளைப் பெறுகின்றன.

இருப்பினும், அதிகமாக நெருக்கமான குழுக்களாக வாழ்வதன் மூலம், சமூக உயிரினங்கள் நோய்களின் பரவல், அதிகமான போட்டி, ஆக்கிரமிப்பு மற்றும் மோதல்கள் போன்ற தீமைகளையும் சந்திக்க நேரிடும்.

சமூகத்தன்மை எப்படி ஒரு உயிரினத்தின் தலைமுறை நேரம், ஆயுட்காலம், இனப்பெருக்க காலம் போன்றவற்றைப் பாதிக்கிறது என்பதைப் பற்றி ஒரு புதிய ஆய்வு விரிவாக ஆராய்ந்துள்ளது.

இதுநாள் வரை, சமூக வாழ்க்கை எப்படி ஒரு உயிரினத்தின் செயல்திறனை பாதிக்கிறது என்று ஆராயும் ஆய்வுகள், பறவைகள் அல்லது சில பாலூட்டிகள் போன்ற குறிப்பிட்ட இனங்கள் அல்லது குழுக்களை மட்டுமே மையமாகக் கொண்டிருந்தன.

இந்த ஆராய்ச்சியில், 152 வகையான உயிரினங்கள் பரிசோதிக்கப்பட்டன. இவை பறவைகள், விலங்குகள், பூச்சிகள் மற்றும் பவளங்கள் உள்ளிட்ட பல வகைகளைச் சேர்ந்தவை.

சமூக வாழ்க்கையும் நீண்ட ஆயுளும்

இந்த முடிவுகள், அதிக சமூகத்தன்மையுடைய இனங்கள் நீண்ட காலம் வாழ்கின்றன, முதிர்ச்சியை ஒத்திவைக்கின்றன, மேலும் தனிமைப்படுத்தப்பட்ட உயிரினங்களை விட வெற்றிகரமாக இனப்பெருக்கம் செய்ய வாய்ப்புள்ளது என்பதைக் காட்டுகின்றன.

சமூகமாக வாழும் உயிரினங்கள், வேகமாக மாறும் சூழலுக்கு ஏற்றவாறு தங்களை மாற்றிக் கொள்வதிலோ, பயன்பெறுவதிலோ சிறந்தவை அல்ல என்றாலும் கூட, அவை ஒரு குழுவாக இருக்கும்போது உறுதியுடன் இருக்கின்றன. சமூகத்தன்மையால் சில பாதகங்கள் இருந்தாலும், அதன் ஒட்டுமொத்த நன்மைகள் அதிகம் என்பதை இந்த ஆய்வு காட்டுகிறது.

வயதாகும்போது, விலங்குகளின் இனப்பெருக்கம் மற்றும் உயிர்வாழும் திறன் குறைகிறது. இந்த ஆய்வில், சமூகத்தன்மை முதுமை செயல்முறையை எவ்வாறு பாதிக்கிறது என்பதையும் ஆராய்ச்சியாளர்கள் கண்டறிந்துள்ளனர். சமூகமாக கூட்டாளிகளுடன் இருப்பது வேட்டையாடுபவர்களிடமிருந்து பாதுகாப்பை வழங்கி, ஆயுட்காலம் அதிகரிக்க உதவும். இருப்பினும், சமூகப் படிநிலைகள் மற்றும் மோதல்களால் ஏற்படும் மன அழுத்தம் எதிர்மறையான விளைவுகளை ஏற்படுத்தி, ஆயுட்காலம் குறைய வழிவகுக்கலாம்.

ஆய்வாளரின் கருத்து

இந்த ஆய்வின் முதன்மை ஆசிரியர் டாக்டர் ராப் சால்குவேரோ-கோமஸ் கீழ்கண்டவாறு கூறுகிறார்.

“சமூகத்தன்மை என்பது பல விலங்குகளின் அடிப்படை அம்சமாகும். இருப்பினும், சமூகமாக இருப்பதன் உடற்தகுதி செலவுகள் மற்றும் நன்மைகள் பற்றிய வகைப்பாட்டியல் எல்லைகளைக் கடந்த சான்றுகள் எங்களிடம் இன்னும் இல்லை. இந்த ஆய்வில், முன்னெப்போதும் இல்லாத அளவுக்கு பல வகையான விலங்குகள் ஆராயப்பட்டன. இந்த ஆய்வு, கூட்டமாக வாழும் குரங்குகள், மனிதர்கள், யானைகள், ஃபிளமிங்கோக்கள் மற்றும் கிளிகள் போன்ற உயிரினங்கள், தனியாக வாழும் மீன்கள், ஊர்வன மற்றும் பூச்சிகள் போன்ற உயிரினங்களை விட அதிக காலம் வாழ்வதோடு, நீண்ட காலத்திற்கு இனப்பெருக்கம் செய்யும் திறனையும் கொண்டுள்ளன என்று காட்டுகிறது.”

சமூகத்தன்மையின் பல்வேறு நிலைகள்

முந்தைய ஆய்வுகள், விலங்குகளை சமூக விலங்குகள் என்றும், சமூகமற்ற விலங்குகள் என்றும் இரண்டு வகைகளாகப் பிரித்தன. ஆனால், இந்தப் புதிய ஆய்வு, சமூகத்தன்மை என்பது வெறும் இரண்டு வகைகளாக மட்டும் இருப்பதில்லை என்றும், அது பல நிலைகளில் காணப்படுகிறது என்றும் கூறுகிறது. இந்த ஆய்வில், விலங்குகளின் சமூகத்தன்மையை மதிப்பிடுவதற்கு, பல்வேறு இடைநிலை நிலைகளும் கணக்கில் எடுத்துக்கொள்ளப்பட்டன.

இந்த ஆய்வில், சமூகத்தன்மை என்பது வெறும் இரண்டு வகை மட்டும் அல்ல என்பதை விளக்கி, ஒரு புதிய முறையில் விலங்குகளின் சமூகத்தன்மை வகைப்படுத்தப்பட்டுள்ளது.

solitary (தனிமை)

தனியாக வாழும் விலங்குகள் பெரும்பாலும் தனியாகவே இருக்கும். இனப்பெருக்க காலத்தில் மட்டும்தான் மற்ற விலங்குகளுடன் சேரும். உதாரணமாக புலிகள்

gregarious (கூட்டமாக வாழும்)

சில விலங்குகள் குழுக்களாக வாழ்ந்தாலும், அவை ஒன்றோடொன்று அதிகம் சார்ந்திருக்காது. தங்களுக்குள் அதிக பிணைப்பு இல்லாமல், தளர்வான தொடர்புகளுடன் வாழும். வைல்ட் பீஸ்ட் போன்ற விலங்குகள் இவ்வாறு வாழ்கின்றன.

communal (குழு வாழ்க்கை)

சில விலங்குகள் நெருக்கமாக வாழ்ந்து, ஒரே இடத்தில் கூடு கட்டி அல்லது வசித்து வந்தாலும், அவை இனப்பெருக்கத்தில் ஒன்றுக்கொன்று உதவி செய்வதில்லை. அதாவது, ஒரு தாயோ அல்லது தந்தையோ மட்டுமே குழந்தைகளை வளர்ப்பார்கள். ஊதா மார்ட்டின் பறவைகள் இதற்கு ஒரு உதாரணம்.

colonial (காலனித்துவ)

சில விலங்குகள் பெரிய குழுக்களாக ஒரே இடத்தில் வாழும். அவை அனைத்தும் ஒரே இடத்தில் கூடுகட்டி அல்லது தங்கி வாழும். இது காலனித்துவம் என்று அழைக்கப்படுகிறது. கூட்டமாக கூடு கட்டும் பறவைகள் இதற்கு ஒரு உதாரணம்.

social (சமூக)

சமூக விலங்குகள் நெருக்கமாக வாழ்கின்றன மற்றும் நிலையான, ஒழுங்கமைக்கப்பட்ட குழுக்களை உருவாக்குகின்றன, கூட்டுறவு இனப்பெருக்கம் மற்றும் படிநிலை கட்டமைப்புகள் போன்ற சமூக நடத்தைகளில் ஈடுபடுகின்றன. எ.கா. யானைகள்.

ஆய்வின் முதன்மை ஆசிரியர் டாக்டர் ராப் சால்குவேரோ-கோமஸ் அவர்கள்,

“கோவிட்-க்குப் பிந்தைய சகாப்தத்தில், மிகவும் சமூகத்தன்மை வாய்ந்த உயிரினமாக, மனிதர்களுக்கு தனிமைப்படுத்தலின் தாக்கங்கள் எவ்வளவு கடினமாக இருக்கும் என்பதை நாம் நேரடியாகக் கண்டோம். இந்த ஆராய்ச்சி, பல உயிரினங்களை ஒப்பிட்டு ஆராய்ந்ததன் மூலம், அதிக சமூகத்தன்மையுடன் இருப்பதால் சில உறுதியான நன்மைகள் கிடைக்கின்றன என்பதைக் காட்டுகிறது.” என்று கூறுகிறார்.

இந்த ஆய்வு தொடர்புகளை மட்டுமே காட்டுகிறது, காரணத்தை அல்ல. சமூகத்தன்மை நீண்ட ஆயுளுக்கு நேரடியாகக் காரணமா அல்லது வேறு காரணிகள் இருக்கிறதா என்பதை மேலும் ஆராய்ச்சி செய்ய வேண்டும். எதிர்கால ஆய்வுகள் இதனை நமக்கு மேலும் விளக்கக்கூடும்.

கட்டுரையாளர் : 

த. பெருமாள்ராஜ்

மூலக்கட்டுரை:  https://royalsocietypublishing.org/doi/10.1098/rstb.2022.0459

இத்தொடரின் முந்தைய கட்டுரையைப் படிக்க : புரிதலைப் புதுப்பிக்கும் புதிய ஆய்வுகள் – 14:- பித்தகோரஸ் தேற்றத்திற்கு புதிய நிரூபணம்: உயர்நிலைப்பள்ளி மாணவிகளின் அசாத்திய சாதனை

இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.

புக் டே இணையதளத்திற்கு தங்களது நூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து  படைப்புகளையும், எங்களது [email protected] மெயில் அனுப்பிட வேண்டுகிறோம்.