அ.சீனிவாசன் கவிதைகள்

அ.சீனிவாசன் கவிதைகள்

***********************************************
1.

என் இதயம்
எப்படியோ
உன்னிடமே
சிக்கிக்கொண்டது.

எவ்வளவு வேண்டுமானாலும்
எப்படி வேண்டுமானாலும்
அதனோடு விளையாடு —
நசுக்கு,
உதறு,
தூக்கி எறி.

பதிலுக்கு
உன் இதயம் முழுதும்
எனக்குத் தேவையில்லை.

கிரிக்கெட் கூட
நான்
ரசிப்பவன் மட்டுமே —
ஆடுபவன் அல்ல.

திரும்ப
என் இதயத்தை
தந்துவிடாதே.

இதயமில்லாதவனாய்
இருந்தால்தான்
உன்
அன்பின்மையை
என்னால்
தாங்க முடியும்.

***********************************************

2.

அந்த வானத்தைப் பார்
இந்தக் கடலைப் பார்
அந்தக் கடவுள் கார்மேகக் கண்ணனைப் பார்
என்று மெல்ல மழுப்பிக் கொண்டே

ஒரு பெரிய
டெய்ரி மில்க்
வாங்கி நீட்டி
எப்போதும் போல
சமாளித்துக் கொண்டிருக்கிறேன்

“ஏன்பா உனக்கு
ப்ளூ கலர் மட்டும்தான்
பிடிக்குதா?”
என்று வினவும்
என் மகளை!

உனக்கு
டெய்ரி மில்க் பிடிக்குமென்பதால்தான்
எனக்கு
நீலம் பிடிக்கிறது
எனும் உண்மை —

அந்த வானத்துக்கும்
இந்தக் கடலுக்கும்
அந்தக் கடவுள் கார்மேகக் கண்ணனுக்கும்
உனக்கும் எனக்கும் மட்டுமே
தெரிந்த ஒரு ரகசியமாய்
உயிரோடு
இருந்து போகட்டும்

அன்பே!

***********************************************

3.

தேர்வறை
நுழையும் சிறார்க்கெல்லாம்
ஒரே சாயல்.

தேர்வு முடிந்து
வெளிவரும் சிறார்க்கெல்லாம்
ஒரே சாயல்.

தேர்வு முடிவு
பார்த்த சிறார்க்கும்
ஒரே சாயல்
இருக்கலாமே…

***********************************************

4. அம்மா அப்பா அம்மா அப்பா

இருக்கின்ற அம்மாவையோ
இல்லாத அப்பாவையோ
தடங்கலின்றி தயக்கமின்றி
எத்தனை முறை வேண்டுமானாலும்
எவ்வளவு தூரத்திலிருந்தும்
வாய் நிறைய கூப்பிட்டுக் கொள்ள
ஓர் அற்புதமான நிகழ்வு
காய்ச்சல்.

***********************************************
5.

வேறெதுவும்
இருந்திடக்கூடாதென்ற பதட்டம் மகனுக்கு.

வேறெதுவும் தான்
சொல்லிடக்கூடாதென்ற
பதட்டம் தாய்க்கு.

‘ வேறெதுவும் இல்லதானம்மா’
‘ வேற ஒண்ணும் இல்லப்பா’

அலைபேசி இணைப்பின் துண்டிப்பிற்கு முன்பாக
ததும்பி வழியும் மவுனம்
கொஞ்சமாய் மனதை
ஆசுவாசப்படுத்தத் தான் செய்கிறது.

***********************************************

6. காதல்: ஒரு ராபின்ஹுட்

ஒரு காதல் என்ன செய்யும்?
பிணி கொண்டவனை
குணமாக்கும்;
பிணி தீர்க்கும் மருத்துவனை
நோயாளியாக்கும்!

ஆயுள் பிரம்மச்சாரியை
குடும்பஸ்தனாக்கும்;
அமைதி குடும்பஸ்தனை
பிரம்மச்சாரி ஆக்கும்.

அதுவொரு
தற்காப்புத் தடுப்பூசி!
மிதமான காதல்களின்
தாக்குதலைத் தடுத்து,
வலிமையான காதல்களிலிருந்து
சிறு தழும்புகளோடு
நம்மைத் தப்புவிக்கும்.

உள்ளவரிடமிருந்து
உறக்கத்தைப் பறித்து,
இல்லாதவர்க்கு
இறகுகளைப் பரிசளிக்கும்—
காதல்…
ஒரு கண்ணியமான ராபின்ஹுட்!

***********************************************

7.

துரை டாக்கீஸில்
பெஞ்ச் டிக்கெட்டில்
பாக்யராஜ் படம்.

குதிரை ரங்க ராட்டினத்தில்
பத்து நிமிடச் சுற்று;
நீலவண்ண குட்டி
வாடகை சைக்கிளில்
அரைமணி நேர சவாரி.

சுயமாய்ச் சம்பாதிக்கும்
ஐநூறு ரூபாய்த் தாள்கள்.

***********************************************

8.

📚 எழுதியவர் : 

✍🏻 அ.சீனிவாசன்

******************************************************************************