காமம் பற்றி சீருடையான் கண்டு மொழியும் “ஒற்றைவாசம் “
[தேனிசீருடையான் எழுதிய“ஒற்றைவாசம்” நாவல் அறிமுகம்-ஜனநேசன்]
ஒருமனிதன் தன் வாழ்நாளில் தான் உற்றதில் , பெற்றதில் சிலவற்றை சகமனிதர்க்கு பகிரவேண்டிய அவசியத்தை உணரத்தொடங்கும் கணத்தில் அவன் படைப்பாளியாக உருக்கொள்கிறான் . அதை எழுத்திலோ, ஓவியத்திலோ , பாட்டிலோ ,சிற்பத்திலோ வெளிப்படுத்த முனைகிறான் .
வாழ்வெனும் விரிந்தகன்ற வெளியில் அக்கலைஞன் தன்பார்வையை ஈர்த்த ஒருசிறுபகுதியை புனைவெனும் வெண்திரையில் வண்ணமும் , எண்ணமும் , குழைத்து , தான் கண்டதை, காண நினைப்பதை , கற்றதை , கற்பிக்க விரும்புவதை புனைவென்னும் தூரிகை கொண்டு மறுபடைப்பு செய்வதே நாவல் எனும் புதினம்.
1 ] தனது சொந்த வாழ்வையே புதினமாக எழுதுவது, 2] தன்னைச் சுற்றி நிகழ்ந்ததை எழுதுவது, 3] நிகழ விரும்பியதை எழுதுவது ,4] முன்பு எழுதப்பட்ட காவியத்தை தன்நோக்கில் வியாக்கியானித்து விளம்புவது … இப்படி பலவகைமை உண்டு .இதில் தேனி சீருடையான் தனது வாழ்வை மூன்று புதினங்களில் தந்து ,முதல்கட்டத்தைத் தாண்டி , இரண்டாம்கட்டத்தில் எழுதிய, வேப்பங்கிணறு போன்ற நாவல்களுக்கு அடுத்து புதினம் “ ஒற்றைவாசம்” , மொத்தக் கணக்கில் இது ஆறாவது புதினம். இனி அடுத்தடுத்த வகைப்பாடுகளில் எழுதும் வல்லமை உள்ளவர் சீருடையான் எனும் நம்பிக்கையைத் தரும் புதினம் இது !.
உயிர்வாழ்தலின் இருத்தலை இயக்குவிப்பது பசி எனும் விசையே . இது வயிற்றுப்பசி , இதன் மறு தலை உடல்பசி .இவ்விரண்டும் நிறைவேறியபின் கிளைக்கும் பல்வேறு பசிகள் மனித பரிணாமத்தை அடுத்தடுத்த கட்டங்களுக்கு நகர்த்துகின்றன . வயிற்றுப்பசியைத் தீர்த்து நிமிர்ந்த சாதாரண மனிதனை , அடுத்த பசியான காமம் அவனை உறுத்தியும், உந்தியும் தள்ளும் பாடுகளை எதிர்கொள்ளுவதையும் இரு உறுபசிகளும் தணிந்து கனியும்போது மணக்கும் அன்பும், நேசமுமே “ஒற்றைவாசம் “ புதினம் ! காமத்துக்கு வாசம் உண்டென்பதை குறுந்தொகைப்பாடல் “… நறியவும் உளதோ நீயறியும் பூவே “ என்று அஞ்சிறைத்தும்பியை வினவுகிறதை நாமறிவோம். ஆனால் ,அந்த காமம் அன்பாக எப்படி கமழ்கிறது , கூறுபோட்டு தனித்தனியே பிணைத்து பிரித்து வைத்துள்ள சமூக கட்டுமானங்களை எவ்வாறு ஊடறுத்து மனிதர்களை இணைக்கிறது என்பதை “ஒற்றைவாசம் “ மூலம் தேனி சீருடையான் உணர்த்துகிறார்
முல்லை ஆறு ,வைகையாய் விரிந்து பாய்ந்து செழித்த பழைய மதுரை மாவட்டத்தின் இரு பகுதிகளான தேனி , நிலக்கோட்டை என்ற இரு ஊர்ப்பகுதிகளில் வசிக்கும் இரண்டு அடிதட்டுக் குடும்பங்களையும் அவர்களைச் சுற்றிய வாழ்வியல் பாடுகளையும் பின்னி, பிணைந்து நடமாடும் மனிதர்களான சுகந்தன் , நாகராசன்,மாரிச்சாமி, ஜோதி, சுவாதி, சாந்தி,தங்கவேல், சவுந்திரபாண்டி ,மாரியப்பன் போன்றவர்களை காமச்சுழல் அலைகழிப்பதை , அதிலிருந்து மீள்பவரை, இரையாகுபவரை மண் மணக்கும் சொற்களில், மண்ணுக்குரிய பண்பாட்டுச்சூழலில் நெருடல் இல்லாமல் சரளமான நடையில் புதினத்தை சீருடையான் நகர்த்துகிறார் . உடற்பசி அத்துமீறுவதற்கு தனிமனிதர்கள் மட்டுமல்ல சாதீயகட்டுமானம், சீர் சினத்தி எனும் சமூக சம்பிரதாய பிடிமானங்கள் தரும் அழுத்தங்களே என்பதை மிக லாவாண்யமாக இப்புதினத்தில் அவிழ்க்கிறார்.
அலைகழிக்கும் உடற்பசியிலிருந்து வாழ்வின் திசைவழியில் கதைமாந்தர்களில் சிலர் கற்பு உடலில் இல்லை, உள்ளத்தில் தான் என்றும் , உடற்பசியை தீர்ப்பது மட்டுமே வாழ்வல்ல , சகமனிதர்களை அரவணைத்து வாழ்வதே முக்கியம் என்று சிலரும் ,அமைந்த வாழ்வியல் சூழலில் கிடைத்த துணையோடு முடிந்தவரை சிறப்பாக வாழ்வதே என்று சிலரும் நம்முன் வாழ்ந்து காட்டுகிறார்கள் . வாழ்வைப் புரிந்துகொள்ளாதவர்கள் சிலர் அடையாளமின்றி வீழ்கிறார்கள். பணமே வாழ்வில் வெற்றியை தீர்மானிப்பத்தில்லை . சகமனிதருடன் நேசபாவமும் , அயரா உழைப்புமே முன்னேற்றத்திற்கு பாதை பாவுகிறது என்பதையும் நிகழ்த்திக் காட்டுகிறார்கள் . வாழ்வில் நெருக்கடி முற்றுகையில் சாதீயம் நொறுங்குகிறது! . இவை அனைத்தையும் நெருடலற்று மக்கள்மொழியில் உணர்வோட்டமான இயல்பு நடையில் கதைமாந்தர்கள் வழி தேனி சீருடையான் சொல்லுகிறார் .இப்புதினத்தை வாசிக்கையில் ஒற்றைவாசம் கமழ்த்தும் பல பரிமாணங்களை உணரலாம் !
சுகந்தனும், ஜோதியும், சுவாதியும், சாந்தியும், அம்மாவும் , குழந்தைப் பேறில்லா இருளாயி பெரியம்மா , சிவந்தநாதன், பசுங்கிளி, பெரியராவுத்தர், பரமத்தேவர் போன்ற மனிதர்களோடு, முல்லையாறும் , மழையும், வெயிலும் பாத்திரங்களாகி இப்புதினத்திற்கு வாசனை ஊட்டச் செய்திருக்கிற தேனி சீருடையானின் படைப்பாளுமையை இந்நாவலை வாசிப்பவர் உணருவர் !. இந்நாவலை ஈர்ப்பான அட்டைபடத்தோடு, சிறப்பாக கட்டமைத்த அன்னம் வெளியீட்டார் கதிரும் பாராட்டுக்குரியவர்.!
“ஒற்றை வாசம் “- நாவல்.
ஆசிரியர்; தேனி சீருடையான்.
பக்; 255 .விலை. ரூ. 270/.
அன்னம் வெளீயீடு.தஞ்சாவூர்.7 .
