பவன் கொராடா (தமிழில்: சித்தார்த்தன் சுந்தரம்) எழுதிய “இந்தியப் பொருளாதார வளர்ச்சி மிகைமதிப்பீடு – நிபுணர்கள் கருத்து” கட்டுரை

“இந்தியப் பொருளாதார வளர்ச்சி மிகைமதிப்பீடு – நிபுணர்கள் கருத்து” கட்டுரை

2012 ஆம் ஆண்டுக்கும் 2023-ஆம் ஆண்டுக்கும் இடைப்பட்ட சுமார் 11 ஆண்டு காலத்தில் இந்தியா தனது ஆண்டு பொருளாதார வளர்ச்சியை மிகைமதிப்பீடு செய்துள்ளதாக பொருளாதார நிபுணர்களின் புதிய அறிக்கை வெளிப்படுத்துகிறது

2012 மற்றும் 2023-ஆண்டுகளுக்கு இடையில் பொருளாதார வளர்ச்சி மிகைமதிப்பீடு செய்யப்பட்டிருந்தாலும், இதற்கு மாறாக, 2005 முதல் 2011 ஆண்டு வரையிலான வளர்ச்சி காலங்களில் இந்தியப் பொருளாதாரத்தின் வளர்ச்சி 1 முதல் 1.5 சதவிகிதப் புள்ளிகள் வரை குறைமதிப்பீடு செய்யப்பட்டதாகவும் அந்த ஆய்வறிக்கை கூறுகிறது.

2012 மற்றும் 2023-ஆண்டுகளுக்கு இடையில் இந்தியா தனது ஆண்டு பொருளாதார வளர்ச்சியை 2 சதவீத அளவு வரை மிகைமதிப்பீடு செய்துள்ளதாக இந்தப் புதிய ஆய்வறிக்கை தெரிவிக்கிறது.

மூத்த பொருளாதார அறிஞர்களான அபிஷேக் ஆனந்த், ஜோஷ் ஃபெல்மன் மற்றும் அரவிந்த் சுப்ரமணியன் ஆகியோரால் எழுதப்பட்ட இந்த அறிக்கையை பீட்டர்சன் சர்வதேசப் பொருளாதார நிறுவனம் (The Peterson Institute for International Economics) இந்த மாதம் (மார்ச்’26) வெளியிட்டது. 2005 முதல் 2011 ஆண்டு வரையிலான பொருளாதார வளர்ச்சிக் காலங்களில் இந்தியப் பொருளாதாரத்தின் வளர்ச்சியானது 1 முதல் 1.5 சதவீதம் வரை குறைவாக மதிப்பிடப்பட்டுள்ளது என்றும் அந்த ஆய்வறிக்கை குறிப்பிடுகிறது.

மத்திய அரசு இந்த ஆண்டு பிப்ரவரி மாத இறுதியில் அறிமுகப்படுத்திய திருத்தப்பட்ட மொத்த உள்நாட்டு உற்பத்தி (GDP) கணக்கீட்டு முறையை மதிப்பீடு செய்வதற்கு, இந்த வரலாற்று மறுமதிப்பீடு ஓர் அளவுகோலாகப் பயன்படும் நோக்கம் கொண்டது என்று ஆய்வாளர்கள் குறிப்பிடுகின்றனர்.

ஆனந்த், மெட்ராஸ் மேம்பாட்டு ஆய்வுக் கழகத்தில் வருகைதரு ஆய்வாளராகவும், ஃபெல்மன், ஜே.எச். கன்சல்டிங் நிறுவனத்தில் முதன்மை ஆலோசகராகவும், அரவிந்த் சுப்ரமணியன், பீட்டர்சன் நிறுவனத்தில் மூத்த ஆய்வாளராகவும் இருந்து வருகிறார்கள், இவர் இந்தியாவின் முன்னாள் தலைமைப் பொருளாதார ஆலோசகராகவும் பதவி வகித்தவர். அதிகாரப்பூர்வமாக அறிவிக்கப்பட்ட 6 சதவிகித வளர்ச்சிக்கு மாறாக, 2011 முதல் 2023 வரை பொருளாதாரம் சராசரியாக 4 முதல் 4.5 சதவிகிதம் வரை மட்டுமே வளர்ந்ததாக அவர்கள் மதிப்பிடுகின்றனர்.

அதிகாரப்பூர்வ மொத்த உள்நாட்டு உற்பத்தி (GDP) புள்ளிவிவரங்களுக்கும் உண்மையான பொருளாதாரச் செயல்பாட்டிற்கும் இடையே உள்ள கூர்மையான வேறுபாட்டை இந்த ஆய்வறிக்கை எடுத்துக்காட்டுகிறது. படம் 1-இன் படி (மேலே காண்க), வங்கிக் கடன், ஏற்றுமதி, மின்சார நுகர்வு மற்றும் வரி வருவாய் உள்ளிட்ட ஏறக்குறைய அனைத்து முக்கியக் குறியீடுகளும் 2005 மற்றும் 2011-க்கு இடையில் இரட்டை இலக்க ஆண்டுச் சராசரி வளர்ச்சியைப் பதிவுசெய்து, பின்னர் 2012-2024 காலகட்டத்தில் சரிந்தன. இருப்பினும், அதிகாரப்பூர்வ மொத்த உள்நாட்டு உற்பத்தி எண்கள் இதற்கு முரணான ஒரு சித்திரத்தை அளிக்கின்றன; உண்மையான செலவினங்களும் உற்பத்தியும் குறைந்தபோதிலும், அவை சீரான, தடையற்ற வளர்ச்சியைக் காட்டுகின்றன.

இந்தக் கூட்டுத் தவறு (compounding error), சராசரி குடிமகனின் வாழ்க்கைத்தரத்தின் சித்திரத்தை கணிசமாக மாற்றுகிறது. 2025-ஆம் ஆண்டு நிலவரப்படி, உண்மையான மொத்த உள்நாட்டு உற்பத்தியின் முழுமையான அளவு சுமார் 22% மிகைப்படுத்தப்பட்டுள்ளது என்றும், உண்மையான நுகர்வின் அளவு சுமார் 31% மிகைப்படுத்தப்பட்டுள்ளது என்றும் ஆய்வாளர்கள் மதிப்பிடுகின்றனர். இதன் விளைவாக, சராசரி வாழ்க்கைத்தரம் அதிகாரப்பூர்வ மதிப்பீடுகள் குறிப்பிடுவதை விட கணிசமாகக் குறைவாக உள்ளது.

இந்தத் தவறான மதிப்பீட்டிற்குக் காரணம் இரண்டு முதன்மை வழிமுறைச் சிக்கல்கள் என்று இந்தக் கட்டுரை குறிப்பிடுகிறது. முதலாவதாக, பரந்த முறைசாராத் துறையின் வளர்ச்சியை மதிப்பிடுவதற்கு, அரசாங்கம் முறைசார்ந்த, பதிவுசெய்யப்பட்ட நிறுவனங்களின் தரவுகளைப் பயன்படுத்தியது.

2015-க்குப் பிறகு பணமதிப்பிழப்பு, சரக்கு மற்றும் சேவை வரி அமலாக்கம் மற்றும் கோவிட்-19 பெருந்தொற்று ஆகியவற்றால் சிறு கடைகள் மற்றும் ரொக்க அடிப்படையிலான வணிகங்கள் போன்ற ஒழுங்கமைக்கப்படாத நிறுவனங்கள் விகிதாசாரமற்ற முறையில் பாதிக்கப்பட்டதாக ஆய்வாளர்கள் கூறுகின்றனர். இதன் விளைவாக, முறைசாராத் துறையும் பெரிய நிறுவனங்களைப் போலவே அதே ஆரோக்கியமான வேகத்தில் வளர்ந்ததாகக் கருதியது, பொருளாதாரத்தின் ஒட்டுமொத்த செயல்திறனை செயற்கையாக அதிகரித்து காட்டுகிறது. 

இரண்டாவதாக, ‘உண்மையான’ வளர்ச்சியைக் கணக்கிடுவதற்கு, பணவீக்கக் குறைப்பான்கள் (deflators) எனப்படும் குறைபாடுள்ள பணவீக்கக் கருவிகளை இந்த வழிமுறை சார்ந்திருந்தது என்று இந்தக் கட்டுரை குறிப்பிடுகிறது. ஒரு பொருளாதாரத்தின் உண்மையான வளர்ச்சியைக் கண்டறிய, புள்ளிவிவரவியலாளர்கள் பணவீக்கத்தைக் கழிக்க வேண்டும். இருப்பினும், இந்தியாவில் இதைக் கணக்கிடப் பயன்படுத்தும் முறைகள் நுகர்வோருக்கு விற்கப்படும் பொருட்களின் இறுதி விலைகளை விட, மூலப்பொருட்களின் விலைகள், குறிப்பாக எண்ணெய் விலைகளுடன் பிணைக்கப்பட்டிருந்தன என்று இந்த அறிக்கையாளர்கள் குறிப்பிடுகின்றனர்.

உலகளாவிய எண்ணெய் விலைகள் கடுமையாக வீழ்ச்சியடைந்தபோது, அது செலவுகளைக் குறைத்து, பெருநிறுவனங்களின் இலாபங்களை அதிகரித்தது. அரசாங்கம் தவறான பணவீக்கக் கணக்கீட்டு முறைகளைப் பயன்படுத்தியதால், இலாபத்தில் ஏற்பட்ட இந்தத் தற்காலிக உயர்வு, உற்பத்தி செய்யப்பட்ட பொருட்களின் பௌதீக அளவில் ஏற்பட்ட உண்மையான அதிகரிப்பாகத் தவறாகக் கணக்கிடப்பட்டது

மேற்கண்ட விளக்கப்படம், ஆசிரியர்களால் பயன்படுத்தப்பட்ட கணிதத் திருத்தங்களின் அளவை விவரிக்கிறது. குறைபாடுள்ள பணவீக்கக் கணக்கீட்டு முறைகள் (பணவீக்கக் குறைப்பான்கள்) மற்றும் முறைசாராத் துறையின் (unorganized sector) மிகைமதிப்பீடு ஆகிய இரண்டு முக்கியப் பிழைகளைச் சரிசெய்வதன் மூலம், “உண்மையான” பொருளாதார உற்பத்தி, அதிகாரப்பூர்வமான 5.9%-இலிருந்து மதிப்பிடப்பட்ட 4.0 முதல் 4.4%-ஆகக் குறைகிறது.

“பணவீக்கக் குறைப்பான்கள் மற்றும் தரவுச் சிக்கல்களின் நிகர விளைவாக, 2011-க்குப் பிந்தைய காலகட்டத்திற்கான உண்மையான மொத்த உள்நாட்டு உற்பத்தி வளர்ச்சி மிகைமதிப்பீடு செய்யப்பட்டது,” என்று அந்த ஆய்வறிக்கை குறிப்பிடுகிறது.

2015 ஆம் ஆண்டு ஜனவரியில் திருத்தப்பட்ட தேசிய வருமானக் கணக்குகளின் வழிமுறையானது, ஐக்கிய நாடுகளின் தேசியக் கணக்குகள் அமைப்புடன் ஒத்திசைவதை நோக்கமாகக் கொண்டிருந்தபோதிலும், போதுமானதாக இல்லாத தரவு ஆதாரங்களைச் சார்ந்திருந்ததும், பொருத்தமற்ற பணவீக்கக் குறைப்பான்களைப் பயன்படுத்தியதும் மதிப்பீடுகளைப் பாதித்தன என்று பொருளாதார வல்லுநர்கள் குறிப்பிடுகின்றனர்.

இக்கட்டுரையின் ஆசிரியர்களில் ஒருவரும், இந்தியாவின் முன்னாள் தலைமைப் பொருளாதார ஆலோசகருமான சுப்ரமணியன், ‘தி வயர்’ (The Wire) இணையதளத்திற்காக கரண் தாப்பர் நடத்திய ‘தி இன்டர்வியூ’ (The Interview) நிகழ்ச்சியில் பேசுகையில், 2015-ஆம் ஆண்டில் நடைமுறைக்கு வந்த பழைய அளவீட்டு முறை, 2011-12 மற்றும் 2023-24 ஆகிய ஆண்டுகளுக்கு இடைப்பட்ட காலத்தில் மொத்த உள்நாட்டு உற்பத்தி (GDP) வளர்ச்சியை 1.5 முதல் 2 சதவீதம் வரை மிகைப்படுத்திக் காட்டியதாகவும்; அதேவேளையில், 2004-05 மற்றும் 2011-12 ஆகிய ஆண்டுகளுக்கு இடைப்பட்ட காலத்தில் வளர்ச்சியை 1 முதல் 1.5 சதவீதப் புள்ளிகள் வரை குறைத்து மதிப்பிட்டதாகவும் தெரிவித்தார்.

காலகட்டம்	அதிகாரப்பூர்வ கணக்கீட்டின் பிழை	உண்மையான நிலைமை
2005 – 2011	1 முதல் 1.5% வரை குறைமதிப்பீடு (Underestimated)	உண்மையான வளர்ச்சி அதிகாரப்பூர்வ எண்களை விட அதிகமாக இருந்தது.
2012 – 2023	1.5 முதல் 2% வரை மிகைமதிப்பீடு (Overestimated)	அதிகாரப்பூர்வ எண்களை விட வளர்ச்சி மந்தமாகவே (4 – 4.5%) இருந்துள்ளது.

இந்தியாவின் பொருளாதாரச் செயல்பாடு குறித்த இந்தத் தவறான புரிதல், இரண்டு முக்கியக் கொள்கை சார்ந்த விளைவுகளை ஏற்படுத்தியதாக அந்தக் கட்டுரை குறிப்பிடுகிறது. முதலாவதாக, இது பேரியல் பொருளாதாரக் கொள்கையை அளவீடு செய்வதைச் சிக்கலாக்கியது; பொருளாதாரம் உண்மையில் பலவீனமாக இருந்தபோது, ​​அது வலுவாக இருப்பதாக அவ்வப்போது சமிக்ஞை செய்தது. இரண்டாவதாக, இது பொருளாதார சீர்திருத்தங்களுக்கான அவசரத்தைக் குறைத்தது.

4 முதல் 4.5% வரையிலான திருத்தப்பட்ட வளர்ச்சி விகிதம் சமீபத்திய பல பேரியல் பொருளாதார “புதிர்களுக்கு” தீர்வு காண்கிறது என்று ஆசிரியர்கள் குறிப்பிடுகின்றனர். தனியார் முதலீட்டில் நீடித்த பலவீனம், தேக்கமடைந்த தொழிற்சாலைத் திறன் மற்றும் மந்தமான வேலைவாய்ப்பு வளர்ச்சி ஆகியவை, பொருளாதாரம் அதிகாரப்பூர்வமாக அறிவிக்கப்பட்ட வேகத்தில் வளரவில்லை என்பதை அப்போது நிலவிய இந்த யதார்த்த நிலைமைகள் எளிதாக விளக்குகின்றன என்று இவர்கள் கூறுகிறார்கள்.

(இந்தக் கட்டுரை 14/03/2026 அன்று `தி வயர்’ இணையதளத்தில் தரவேற்றம் செய்யப்பட்டது)

📚 எழுதியவர்:

✍️ – ஆங்கில மூலம்: பவன் கொராடா, தி வயர்
தமிழில்: சித்தார்த்தன் சுந்தரம்

******************************************************************************