ந க  துறைவன் கவிதை

எங்கிருந்து தொடங்குவது?

என் கதை எங்கிருந்து தொடங்குவது?
அந்த குக்கிராமத்திலிருந்தா?
அந்த நகரத்திலிருந்தா?
எங்கிருந்து தொடங்கினாலும்
என் வாழ்க்கைக் கதையில்
நானே இல்லாமல் இருக்கிறேன்
நான் இருப்பவன்
நான் வாழ்பவன் அல்ல
நான் இறந்தவன் அல்ல
பிறகு என் கதை நானே
எப்படி எழுதுவது?
என் கதை யார் சேகரித்து வைத்திருப்பது?
என் கதை எழுதப்போவது யார்?
என் கதை முழுமையாக
எழுத அவரால் முடியுமா?
பார்த்ததை, கேட்டதை, யாரோ சொன்னதை,
சொல்லாததை வைத்து தானே
அவர் எழுத முடியும்
அதை எப்படி என் முழு கதையாக ஏற்பது?
அரைகுறையாக, விடுபட்ட
மறைக்கப்பட்ட சம்பவங்கள்
விமர்சகன் சொல்லும்போது
அடுத்த பதிப்பில் இடம் பெறுமா?
என் கதைக்கானவர் இன்றில்லை
என் கதை எழுதியவர்
என் கதை பிரதிகள் விற்றவர் இன்றில்லை
என் கதையே இன்று இங்கில்லை
என் கதையை நாளை யாரேனும்
ஒருவர் தேடி மறுபதிப்பு வெளியிடலாம்
அப்பொழுது, படித்துப் பாருங்கள்

அதில் நான் இருப்பது தெரியும்