எஸ்.காமராஜ் எழுதிய “இந்தியாவில் தலித்துகள்: சிறு வரலாறும் சில தழும்புகளும்” – நூல் அறிமுகம்

“இந்தியாவில் தலித்துகள்: சிறு வரலாறும் சில தழும்புகளும்” – நூல் அறிமுகம்

“இன்னும் இளமையோடு இந்தியாவில் இருப்பது தலித்துகளின் மோசமான நிலமை மட்டுமே “

எழுத்தாளர் எஸ். காமராஜ் எழுதிய “இந்தியாவில் தலித்துகள்: சிறு வரலாறும் சில தழும்புகளும்” நூல், இந்தியச் சமூக அமைப்பில் பல நூற்றாண்டுகளாக விளிம்பில் வைக்கப்பட்டுள்ள தலித் மக்களின் வரலாறு, அவர்களின் மீதான ஒடுக்குமுறைகள் மற்றும் அவர்கள் கடந்துவந்த பாதை ஆகியவற்றை ஆழமாகப் பேசும் மிக முக்கியமான ஒரு நூலாகும்.

இந்நூல் இந்தியாவின் தொன்மைச் சமூக அமைப்பில் சாதியம் எவ்வாறு வேரூன்றியது என்பதையும், அதிலிருந்து தலித் மக்கள் எதிர்கொண்ட சமூகப் புறக்கணிப்புகளையும் சுருக்கமாகவும் அதே சமயம் செறிவாகவும் விவரிக்கிறது.

வெறும் வேதனைகளையும் கண்ணீரையும் மட்டும் பேசாமல், தலித்துகளின் மீதான ஒடுக்குமுறைகளுக்கு எதிரான வரலாற்று ரீதியான எதிர்ப்புக் குரல்களையும், உரிமைகளுக்கான அவர்களின் போராட்டங்களையும் இந்நூல் பதிவு செய்கிறது.

தலைமுறைகளாக சாதிய ஒடுக்குமுறைகளால் இச்சமூகத்தின் மீது ஏற்படுத்தப்பட்ட வன்முறைகள், காயங்கள் மற்றும் சமூகத் தகுதியின்மை ஆகியவைதாம் இந்நூலில் நமக்கு நூலாசிரியர் வழங்கி உள்ளார்.

மிக அடர்த்தியான வரலாற்றுத் தகவல்களையும் சமூகவியல் கோட்பாடுகளையும் பாமர வாசகரும் புரிந்துகொள்ளும் வகையில் எளிய நடையில் எழுதியிருப்பது இநூலின் மிகப்பெரிய பலமாகும்.

உணர்ச்சிவசப்படுவதைத் தாண்டி, வரலாற்று உண்மைகள், சாதியக் கட்டமைப்பின் கோர முகங்கள் மற்றும் நவீன காலத்தில் தலித்துகள் முகங்கொடுக்கும் சவால்களைப் பகுத்தாய்வுப் பார்வையுடன் அணுகியுள்ளார்.

சுதந்திரத்திற்குப் பிறகும் அரசியலமைப்புச் சட்டங்கள் அமலில் இருக்கும் காலத்திலும், இந்தியாவில் தலித்துகளுக்கு எதிரான வன்முறைகள் மற்றும் வன்கொடுமைகள் எவ்வாறு வடிவம் மாறுகின்றன என்பதை இந்நூல் சுட்டிக் காட்டுகிறது.

இந்நூலில் 10 அத்தியாயங்களை கொண்ட கட்டுரைகளை எழுதியுள்ளார் நூலாசிரியர்.

ஒடுக்கப்பட்டவர்களே கண்காணாத தூரத்திற்கு விலகிப் போங்கள்

ஆரிய ஆக்கிரமிப்பு

துரம் அபசரா ரே சண்டாள

பௌத்தம்

ஆங்கிலக்காலனி மற்றும் கிறிஸ்தவம்

இந்திய விடுதலையும் தலித் விடுதலையும்

ஆங்கிலேயர் காலம்

கலக இயக்கங்களும் கலக இலக்கியங்களும்

உத்தப்புரம்

தொடரும் குரூர சாஸ்திரம் கயர்லாஞ்சி

மேற்கண்ட கட்டுரைகள் ஒவ்வொன்றும் மிக முக்கியமான வரலாற்று தகவல்களை நமக்கு அளிக்கிறது.

‘சிறு வரலாறு’ என்று நூலாசிரியர் குறிப்பிடுவது போல, இந்தியாவின் ஒட்டுமொத்த தலித் வரலாற்றையும் மிகச் சுருக்கமாக முடிக்க முயன்றிருப்பதால், சில வரலாற்று நிகழ்வுகள் மற்றும் தலைவர்களின் பங்களிப்புகள் இன்னும் விரிவாகச் சொல்லப்பட்டிருக்கலாம் என்ற ஆதங்கம் வாசகர்களிடம் எழலாம்.

இந்தியச் சமூகத்தில் சமத்துவம் பேசும் ஒவ்வொருவரும் படிக்க வேண்டிய அவசியமான கையேடு தான் எஸ். காமராஜின் “இந்தியாவில் தலித்துகள்: சிறு வரலாறும் சில தழும்புகளும்”.

சாதியச் சுவர்களின் தன்மையைப் புரிந்துகொள்ளவும், சமூக நீதியின் தேவையை உணரவும் இந்நூல் பெரிதும் உதவுகிறது. அனைவரும் அவசியம் படிக்க வேண்டிய முக்கியமான நூல் இது. நூலாசிரியருக்கும் பாரதி புத்தகாலயத்துற்கும் மிகுந்த பாராட்டுக்கள்.

📚 நூலின் விவரங்கள்: