சாதியைப் பேசத்தான் வேண்டும். இப்பல்லாம் யாருங்க சாதி பாக்குறா என்ற கேள்வி பல்முனைகளில் இருந்து கேட்டபடியே இருக்கிறது. ஆனாலும் முன்னெப்போதும் விட தற்போதுதான் சாதி தொழில்நுட்பத்தின் துணையுடன் முன்னிலும் வீரியமாக புதிய தலைமுறை இளைஞி/இளைஞர்களிடமும் புலனக்குழுக்களாகவும், வலையொளிப் பரவலாகவும், எக்ஸ் தளப் பேச்சாகவும், இன்ஸ்டா காணொலிகளாகவும் மீளுற்பத்தி செய்யப்பட்டு மேலும் உறுதியான அடித்தளம் இடப்படுகின்றன என்பதைக் காண முடிகிறது. அது பள்ளிகளிலும் கல்லூரிகளிலும் கிராம வீதிகளிலும் நகரத் தெரு முனைகளிலும் உயிர்ப்பலி வரை கொண்டு வந்து அச்சுறுத்துகிறது. இந்நிலையில், சாதியைப் பேசத்தான் வேண்டும் என்ற இந்நூல் நம் சூழலில் முக்கியமானதாகிறது.
நூலாசிரியர் சூரஜ் யங்டே ஆப்பிரிக்க பல்கலைக்கழகம் ஒன்றில் (ஜோஹன்னஸ்பர்க்கில் உள்ள விட்வாட்டர்ஸ்ட்ராண்ட் பல்கலைக்கழகம்) முனைவர் பட்டம் பெற்ற முதல் தலித் இந்தியரும், இந்தியா மற்றும் இங்கிலாந்தின் அங்கீகாரம் பெற்ற சர்வதேச மனித உரிமை வழக்கறிஞரும் ஆவார். பல குறிப்பிடத்தக்க விருதுகளையும் (டாக்டர் அம்பேத்கர் சமூக நீதி விருது – கனடா 2019, ரோஹித் வெமுலா நினைவு அறிஞர் விருது – 2018) பெற்றுள்ளதோடு, செல்வாக்குமிக்க 25 இளம் இந்தியர்களில் ஒருவராகவும், தலித் இளைஞருள் மிகவும் செல்வாக்கு படைத்தவராகவும் ஊடகக் குழுமங்களால் தேர்வு செய்யப்பட்டவராவார்.
நூலாசிரியர் சூரஜ் ‘அறிமுகம்’ பகுதியிலும் நூலின் பல்வேறு இடங்களிலும் குறிப்பிட்டுள்ள தனது சொந்த வாழ்வியல் அனுபவங்கள் சரண்குமார் லிம்பாலே, அரவிந்த் மாளகத்தி, ஓம்பிரகாஷ் வால்மீகி, பேபி காம்ப்ளே போன்ற வட இந்திய தலித் எழுத்தாளர்களின் வாழ்வியல் அனுபவங்களுடன் ஒப்புநோக்கத்தக்கது. மன அதிர்வுகளை ஏற்படுத்துபவையாகவும், கடந்த 35 ஆண்டு கால ஒரு தலித் உயிரியின் வாழ்வின் சிறப்புக் கூறுகளைப் பேசுவதாகவும் அமைந்துள்ளன. இந்நூலை ஏன் ஆறு பிரதானத் தலைப்புகளின் கீழ் பிரித்துள்ளார் என்பது குறித்தும் அவை என்னென்ன விசயங்களை எதற்காகப் பேசுகின்றன என்பது குறித்தும் அறிமுகத்தில் கோடிட்டு விடுகிறார்.
‘ஒரு தலித்தாக’ என்ற முதல் இயலில் இந்தியச் சூழலில் எவ்வாறு ஒரு தலித் தன்னிலை உருவாகிறது – உருவாக்கப்படுகிறது என்பதையும் அது எவ்வாறு பிறரால் ‘தலித்தாக’ உணரப்படுகிறது – தலித்தாலேயே எவ்வாறு ‘தலித்தாக’ உணரப்படுகிறது என்பதையும் தலித் காதல், தலித் அன்பு, (மிக முக்கியமாக நான் கருதிய) தலித் நகைச்சுவை, தலித் உலகளாவல் என்பனவற்றின் வழியே விரிவாகச் சுட்டிக்காட்டுகிறார்.
‘புதிய தலித் எழுச்சி’ என்ற இயலில் இனம், பாலினம், சமூகம், பொதுவெளி போன்றவை தலித்தின் வாழ்வியலில் என்னவாக இருக்கின்றன என்பதைக் காட்டுகிறார். அரசு, நீதிமன்றம் போன்ற அமைப்புகள் தலித்துகளைக் கையாளும் முறைமையும் அதற்கான எதிர்வினைகளாக தலித்துகள் மத்தியில் ஏற்பட்டுள்ள எழுச்சியையும் இவ்வியல் பேசுகிறது. கோவில், பணியிடங்கள் போன்ற பொதுவெளிகளில் தலித்தின் இருப்பு எவ்வாறு தலித் தேசியவாத உருவாக்கம் வழியாக தலித் விடுதலை மற்றும் பரிபூரண விடுதலை என்ற கருத்தியலை நோக்கிக் கட்டமைக்கப்படுகிறது என்பதை விளக்கிச் செல்கிறார். தலித் விடுதலைக்கான பொருள், தலித் அதிகாரத்தைத் தீர்மானிப்பதில் அடங்கி உள்ளது என்று சரியாகச் சொல்லும் சூரஜ், அத்தகைய அதிகாரமானது சாதி, மதம், பாலினம், பாலியல், நிறம், இனம் மற்றும் தேசியம் ஆகியவற்றால் பிரிக்கப்படாத மதச்சார்பற்ற – உலகளாவிய விடுதலைச் சிந்தனைக்கான இடமாகும் என்று தெளிவான புரிதலுடன் முன்வைக்கிறார். அங்கு ஆதரவு குரல்களையும், எதிரொலிப்புகளையும் சமநிலைக்குள் கொண்டுவரும் சாத்தியங்கள் இருக்க வேண்டும் என அவர் கூறுவது கவனிக்கத்தக்கக் கூற்றாகும்.
‘தலித்துகளின் பல நிறபேதங்கள்’ என்ற இயலில் அடையாள தலித்துகள் – அவர்களுள் பழமைவாத தலித்துகள், எதிர்வினை தலித்துகள் என்றும், உயரடுக்கு தலித்துகள் – அவர்களுள் ஊதியம் பெறும் கபடதாரிகள், மூன்றாம் தலைமுறை தலித்துகள் என்றும், சுய பற்றுடைய தலித்துகள், தீங்கிழைக்கும் தலித்துகள், தீவிர தலித்துகள் – அவர்களுள் தலித் அறிவாளிகள், தலித் பெண்கள், தலித் பவுத்தர்கள், அம்பேத்கரிய புத்த மதத்தினர், அம்பேத்கர் தம்ம மரபினர், அம்பேத்கரை இறைத்தன்மையாக்குவோர் என வகைவாரியாகப் பிரித்து, ஒவ்வொரு பிரிவினருக்குமான வகைமாதிரிகளையும் எடுத்துக்காட்டி ஒவ்வொரு வகைமையிலும் உள்ள நிறை/குறைகளை சாய்வின்றி சுட்டிக்காட்டி இறுதியாக அதிகாரப் படிநிலை ஒழுங்கைச் சிதைக்கும் சக மனிதநேயத்தின் மீதான நம்பிக்கையே தலித் வாழ்வியலுக்கான ஆதாரமாக இருக்க முடியும் என்பதை விளக்குகிறார்.
‘தலித் நடுத்தர வர்க்கத்தினர்’ என்ற இயலில் பொதுவாக மேல்நோக்கி இயங்கும் உணர்வுகளைக் கொண்ட தலித் நடுத்தர வர்க்கத்தின் வரையறை, பண்புகள் போன்றவற்றைக் குறிப்பிட்டு, இவ்வர்க்கத்துக்கு அரசால் கிடைத்த தாராளங்கள், ஒட்டு மொத்த இந்திய அரசு நிர்வாகத்தில் (இந்த அலகைச் சேர்ந்தவர்களே தலித் நடுத்தர வர்க்கத்தின் பெரும்பான்மையினர்) தலித்துகளின் பங்கீடு, இரண்டாம் தலைமுறைப் பயனாளிகள் என தலித் கருத்தியல் உருவாக்கத்துக்குப் பெரும் பங்காற்றும் இந்த நடுத்தர வர்க்கத்தினர் பற்றிய விரிவான விவரணைகளும் புள்ளிவிபரங்களும் நமக்குப் புதிய திறப்புகளைக் காட்டிச் செல்கின்றன. ‘படித்த மக்கள் என்னுடைய நம்பிக்கையை ஏமாற்றிவிட்டார்கள், உயர்கல்வி முடித்ததும் அவர்கள் சமூக சேவை செய்வார்கள் என நான் எதிர்பார்த்தேன். ஆனால், என் கண்முன்னே பெரியவர்களும் சிறியவர்களுமான அலுவலர்களின் கூட்டம் அவர்களின் வயிற்றை நிரப்புவதிலேயே குறியாக இருக்கிறது’ என்ற அம்பேத்கரின் (1956 மார்ச் 18, ஆக்ரா உரை) வருத்தம் தோய்ந்த நிலை இன்றும் தொடர்வதை மிகுந்த கவலையுடன் இந்த இயல் பதிவு செய்வதோடு, அந்நிலை மாற மேற்கொள்ள வேண்டிய நடைமுறைகள், கைக்கொள்ள வேண்டிய பாதைகள் பற்றியும் பேசுகிறது.
‘தலித் முதலாளித்துவம்’ என்ற இயலில் தலித் முதலீட்டிய உருவாக்கத்தில் DICCI (Dalit Indian Chamber of Commerce and Industry)-ன் பங்கு, தொழில்துறையிலும் யாரும் சீண்டாத/விரும்பாத தொழிற்பிரிவுகளை தலித் முதலாளிகளுக்கு ஒதுக்கும் அவலம், இந்தியப் பத்திரிகைத் தொழிலில் தலித்துகளின் இடம் மற்றும் பங்கு, தலித்துகள் பனியாமயமாதல், பிற மேற்கத்திய நாடுகளைப் போலன்றி சாதியவாதத்தையும் நிலப்பிரபுத்துவத்தையும் கைவிடாத இந்திய முதலாளித்துவப் போக்கு போன்றவை உரிய ஆதார ஆவணங்களுடன் விரிவாக அலசப்படுகின்றன. தலித் முதலாளித்துவம் என்ற கருத்தை முன்வைப்பதால் – முதலாளித்துவமே சாதியத்துக்குத் தீர்வு என்பது கற்பனையான ஒன்று என்பதையும் தெளிவுபடுத்துகிறார் சூரஜ். மேலும் அம்பேத்கர் தலித் மூலதனத்தை ஊக்குவிப்பவராகவும் தலித் மூலதன ஆர்வலராகவும் பொருளாதார அடிப்படையில் இருந்தாலும், உலகத் தொழிலாளர்களுடன் தலித் நலன்களை இணைப்பதை நோக்கமாகக் கொண்ட தொழிலாளர் அரசியலையே கடைசிவரை வழி நடத்தினார் எனக் கூறுவது முக்கியமானதும் கவனத்திற்கொள்ள வேண்டியதுமாகும்.
‘பிராமணியத்துக்கு எதிரான பிராமணர்கள்’ என்ற இறுதி இயலை நூலின் முனைப்பான பகுதியாக நான் காண்கிறேன். ஒட்டுமொத்த இந்திய ஊடகங்களில் 85 விழுக்காடு பிராமண ஊடகங்களாகவே இருப்பதன் அரசியல், இந்தியாவின் ஊடகங்களால் ஊதிப் பெருக்கப்பட்ட ஊழல்கள் எல்லாமே தலித் – பகுஜன்களைக் குறிவைத்தே இருப்பது தற்செயலல்ல என்றும் அப்போது மட்டும் ஊழல் ‘சாதிப்புத்தி’யாக் காட்டப்படும் அவலம் போன்றவை இவ்வியலில் சிறப்புப் பகுதிகள் எனலாம். அதே நேரம் ஹர்ஷத் மேத்தா, விஜய் மல்லையா, ராமலிங்க ராஜூ போன்ற ஆதிக்க சாதியினர் செய்த ஊழல்களில் சாதியின் பங்கு பெரிதுபடுத்தப்படுவதில்லை என்பதோடு அவர்கள் இன்றளவும் எதிர்நாயக பிம்பங்களாகவும் (வங்கி மோசடி ஹர்சத் மேத்தா ‘சந்தை குரு’வானது போல) மாற்றப்பட்டுள்ளனர் என்ற உண்மையும் முகத்தில் அறைகிறது.
பிராமணியத்துக்கு எதிரான இயக்கங்களை வழிநடத்திய முற்போக்கு பிராமணர்கள் மற்றும் ஆதிக்க சாதியினர் பற்றிய விபரங்கள், மகாத்மா ஜோதிராவ் பூலே, அண்ணல் அம்பேத்கர் ஆகியோரின் பிராமண/ஆதிக்க சாதித் தோழர்கள், பூலே மற்றும் அம்பேத்கரின் சிந்தனைகளை, இயக்கங்களை மக்களிடையே எடுத்துச் சென்ற பிராமணர்கள்/தலித் அல்லாத பிற சாதியினர் குறித்த தரவுகள், சம்பவங்கள் என்று வியக்கத்தக்க செய்திகள் அடங்கிய பகுதியாக உள்ளது இது. குறிப்பாக இந்துத்துவ அடிப்படைவாதிகளால் தூக்கிப் பிடிக்கப்படும் பழமைவாதியான பாலகங்காதர திலகரின் மகனான ஸ்ரீதர் பண்ட் திலக், அம்பேத்கரின் சமூகச் செயல்பாடுகளில் தீவிரமாகப் பங்கேற்று, தனது சொந்த சாதியினரால் பிரச்சினைகளுக்கு ஆளாக்கப்பட்ட தகவல்கள் முக்கியமானவை. அம்பேத்கர் முன்னெடுத்த மனுஸ்மிருதி எரிப்பை முன்மொழிந்த சகஸ்ரபுத்தே, பூலேவுடன் இணைந்து தனது சொந்த நிலத்தைப் பெண்கள் பள்ளி தொடங்கக் கொடுத்து பெண்கல்வி பற்றிப் பரப்புரை மேற்கொண்ட சிப்லுங்கர், அம்பேத்கருடன் வட்ட மேசை மாநாட்டில் ஒரு தொழிலாளர் பிரதிநிதியாகக் கலந்து கொண்டதோடு ‘நம்மால் ஏன் ஒரு தலித் தலைமையை உருவாக்க முடியவில்லை’ என்று தொலைநோக்குடன் தமது சொந்த சாதி பிராமணர்களிடம் அறைகூவிய எம்.என்.ஜோஷி போன்றோர் பற்றிய தரவுகள் இக்காலத் தலைமுறையினர் அறியவேண்டியவை. ஒரு காத்திரமான தலித் அரசியல் உருவாக்கத்திற்கு உதவியிருக்க வேண்டிய பிராமண/தலித் அல்லாத பிற சாதியினர் பங்களிப்பு வெறும் செயலற்ற கோபமாகவும், வெறும் சீர்திருத்த செயல்பாடாகவும் சுருங்கிப் போனதன் காரணங்களையும் ஆராய்ந்துள்ள சூரஜ், சாதியற்ற சமூகத்திற்கு தீண்டத்தகாதோர் அல்லாத சாதிகளின் பங்களிப்பின் அவசியத்துவம் குறித்துப் பேசுகிறார்.
நூலின் மற்றுமொரு சிறப்பம்சம் – தலித் பிரச்சினைகளையும் அவற்றுக்கான விடுதலை உள்ளிட்ட அரசியலையும் ஆப்ரோ – அமெரிக்கக் கறுப்பின விடுதலைச் செயல்பாட்டு அரசியலுடன் ஒப்பிட்டு – உலகளாவிய விடுதலை அரசியலில் இருந்து சாதகமான – ஒப்புமைமிக்க – அம்சங்களை இங்கு இந்தியச் சூழலில் பொருத்தி ஆய்ந்து பரிந்துரைகளை முன்வைக்கும் போக்காகும்.
நூல் நெடுக, W.E.B. டூ போயிஸ், புக்கர் டி வாஷிங்டன், கூகி வா தியாங்கோ, ஃபிராய்டு, நீட்சே, எட்வர்ட் செய்த், ழான் பால் சார்த்தர், மார்ட்டின் லூதர் கிங், மால்கம் எக்ஸ், ஜோசப் பெர்னார்டோ போன்ற மேலை நாட்டு விடுதலை அரசியல் அறிஞர்களின் கூற்றுகள், நூல்கள் தேவையான இடத்தில் எடுத்துக்காட்டப்பட்டதுடன், பூலே, அம்பேத்கர், நூரணி, ஆனந்த் டெல்டும்டே, காஞ்சா அய்லய்யா உள்ளிட்ட பல்வேறு இந்திய ஆளுமைகளின் நூல்களும் கருத்துகளும் எடுத்தாளப்பட்டுள்ளமை நூலுக்கான உருவாக்கத்தில் ஆசிரியரின் கடும் உழைப்பைக் காட்டுவதுடன் நூலின் பேசுபொருளுக்கும் கூடுதல் கனமும் கவனமும் சேர்க்கின்றன.
இந்நூலை ஆங்கிலம் வழி தமிழாக்கம் செய்துள்ளார் அனிதா பொன்னீலன். நூல் நெடுக மொழிபெயர்ப்பு என்னை நூலில் இருந்து பல இடங்களில் விலக்கமாகவே வைக்கத் தலைப்பட்டது. கடும் பிரயத்தனங்கள் மேற்கொண்டு குறிப்புகள் (References) காட்டும் நூல் இணைப்புகள் மற்றும் தேடலின் வழியாகவே நூலுக்குள் என்னைத் தக்க வைக்க முடிந்தது. மொழிபெயர்ப்பானது நம்மை நூலின் மையக் கருத்துக்குள் ஈர்த்துக் கொள்ள உதவுவதற்குப் பதிலாகப் பல இடங்களில் நூல் பேசும் பொருளில் இருந்து நம்மை விலக்கித்தான் வைக்க முயல்கிறது. பல இடங்களில் (அதிலும் குறிப்பாகக் கோட்பாடு சார்ந்த இடங்களில் – வாழ்க்கை சம்பவங்கள், நிகழ்வுகள் போன்ற இடங்களில் இயல்பாக இருக்கும் மொழிபெயர்ப்பு) கூகுள் மொழியாக்கத்தைப் போன்ற தட்டையான அமைப்பை ஒத்திருந்தது. கோட்பாட்டு ரீதியிலான வாக்கியங்களைப் பெயர்க்கும் போது வார்த்தைக்கு வார்த்தை மொழிபெயர்த்த தன்மை தெரிகிறது. அதன் ஒட்டுமொத்த பொருளை உள்வாங்கி தமிழுக்குத்தக முழு வாக்கியமாக்கி மொழிபெயர்ப்பது ஆகச் சிறந்த ஒரு வாசிப்பனுவத்தை இடையூறின்றித் தரும் என்று நினைக்கிறேன். ஒரு வேளை மூல நூலின் மொழிச் செறிவு அல்லது மொழியமைவு கூட இத்தகைய மொழிபெயர்ப்புச் சிக்கலுக்குக் காரணமா எனத் தெரியவில்லை.
காட்டாக, ‘கையேடு’ தொழிலாளர்கள் என்றொரு பதம் ‘தலித் நடுத்தர வர்க்கத்தினர்’ என்ற இயலில் சில இடங்களில் பயன்படுத்தப்பட்டுள்ளது. குறிப்புகள் (References) பகுதி நூலின் இறுதியில் மூல நூலில் உள்ளது போல முழுக்க ஆங்கிலத்தில் அந்நூலில் உள்ளவாறே பிரசுரிக்கப்பட்டுள்ளது. அது மிகவும் பயன்தரும் வகையில் இருந்தது. குறிப்புகளை ஆராயும் போதுதான் மேற்படி ‘கையேடு’ தொழிலாளர்கள்/’கையேடு’ தோட்டியினர் என்பது ‘Manual” labourers/scavengers-ன் மொழியாக்கம் (?) எனப் புரிந்து கொண்டேன்.
அது போல, ‘சாதி உயிர்கள்: 21ம் நூற்றாண்டின் சிறப்புக் கூறுகள்’ பகுதியில் ‘இடரக்கலை’ என்று ஒரு பதத்தை சில இடங்களில் (சாதி இடரக்கலை, இடரக்கலை தொடர்புகள் என்று) பயன்படுத்துகிறார். அதன் பொருளும் அகராதிகளில் தேடியும் கிடைக்கப்பெறவில்லை. இது போன்ற தடுக்குகள் நூலின் முழுமையான வாசிப்பு ஈடுபாட்டைக் குறைத்து அதன் பொருளையும் சிதைத்து விடுவதைக் கவனித்து மொழிபெயர்ப்பாளர் மறுபதிப்பில் சரிசெய்வார் என்று நம்புகிறேன்.
சமகாலத்தவரும், முதல் தலைமுறை தலித் அறிஞருமான சூரஜ் யெங்டேவின் இந்நூல், வெறுமனே தலித்துகளின் நிலை மற்றும் அரசியலைப் பற்றி மட்டும் பேசவில்லை. ஒட்டு மொத்த இந்தியாவின் சாதீய இருப்பு, அதன் பிராமணீய அடித்தளம், சாதீயத் தகர்ப்புக்கான பாதை குறித்த ஒரு தலித் இளைஞரின் பார்வையாக விரிகிறது. உண்மைதான் – தலித்தைப் பேசுவதாக இருந்தால், சாதியைப் பேசாமல் இருக்க முடியுமா..?
தலித் அரசியல் தேடலில் தவிர்க்கவியலாத முக்கியமான இந்நூல் சில மொழிபெயர்ப்புக் குளறுபடிகளால் அயர்ச்சியை சில இடங்களில் ஏற்படுத்தினாலும் (ஆங்கில மூலத்தில் படித்துப் பார்த்தால் ஒருவேளை உண்மை மொழியாக்க நிலை புரிபடலாம்) விடுதலை அரசியல் உணர்வு கொண்ட அனைவரும் வாசிக்க வேண்டிய நூலே..!
📚 நூலின் விவரங்கள்:
| தலைப்பு | விவரம் |
| நூலின் பெயர்: | சாதியைப் பேசத்தான் வேண்டும் |
| ஆசிரியர்: | சூரஜ் யங்டே (தமிழில்: அனிதா பொன்னீலன்) |
| வெளியீடு: | எதிர் வெளியீடு |
| விலை: | ₹.450 |
| அறிமுகம் எழுதியவர்: | ✍🏻 அன்புச்செல்வன் |
******************************************************************************
நூல் அறிமுகம் செய்வோம் ரூ.10000 பரிசு வெல்வோம்! போட்டி
2025ல் வெளியான புத்தகத்தை வாசிக்க அவகாசம் கேட்ட வாசகர்களின் வேண்டுகொளுக்கு இணங்க இப்போட்டியானது மார்ச் 31 வரை நீட்டிக்கப்பட்டுள்ளது. வரும் உலகப் புத்தக தினத்தன்று (ஏப்ரல் 23, 2026) சென்னையில் நடைபெறும் விழாவில் பரிசு மற்றும் பாராட்டுச் சான்றிதழ் வழங்கப்படும். தாங்கள் எழுதும் நூல் அறிமுக கட்டுரையை bookday24@gmail.com மின்னஞ்சல் முகவரிக்கு அனுப்பி வைக்கவும். இதில் பங்கேற்க விரும்பும் தோழர்கள் அனைவரும் தங்கள் விருப்பத்தை https://forms.gle/XJodwyZc42PRv93Y8 இந்த கூகுள் பார்ம்-ல் நிரப்பி தெரிவித்தால் நன்றாக இருக்கும்.
கூகுள் பார்ம்: https://forms.gle/XJodwyZc42PRv93Y8
தோழமையுடன்
புக் டே இணையதளம்
பாரதி புத்தகாலயம்
9444567935
******************************************************************************
Click to Join Telegram Group Link : https://t.me/+lyAFK8ZE0iczZjE1
Click to Join Facebook: https://www.facebook.com/Book Day – Bharathi Puthakalayam
இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.
புக் டே இணையதளத்திற்கு தங்களதுநூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து படைப்புகளையும், எங்களது bookday24@gmail.com மெயில் அனுப்பிட வேண்டுகிறோம்.
