Athikaram

வெண் புறாவின் சிறகடிப்பு
வீதிகளில் தோன்றட்டும்
புண் பட்ட மன மெல்லாம்
புத்துணர்ச்சிப் பெறும் மெல்ல
கண் கலங்கும் வேளை இனி
காற்றாகப் பறக்கட்டும்
பண் பட்ட மனிதர் கூட்டம்
பாரினிலே பெருகட்டும்

அடக்குமுறை ஆட்டம் இனி
ஆட்டம் காணச் செய்யட்டும்
சொடக்கு போடும் அதிகாரம்
சொரணையற்றுப் போகட்டும்
எடக்குப் பேச்சை எல்லாம்
ஏனிங்கு நாம் கேட்போம்?
மடக்கி வைத்திடுவோம்
மண்ணை நாம் காத்திடுவோம்

ஆயுத சாலை வந்தால்
அழிந்திடுமே ஊர் உலகம்
தாயவள் எண்ணம் கொண்டால்
தரணியில் தங்கும் இன்பம்
தூய நல் கொள்கை கொண்டு
துவங்கினால் அமைதி கொள்கை
பாய்ந்திடும் உலகமெல்லாம்
பரவசம் பொங்கி வரும்

– ச.லிங்கராசு