ஆன்மீகத்திற்கான விளம்பர அறிவியல் கட்டுரை – பொ.இராஜமாணிக்கம்

ஆன்மீகத்திற்கான விளம்பர அறிவியல் கட்டுரை – பொ.இராஜமாணிக்கம்



ராமநவமி அன்று அயோத்தி ராமர் கோயில் சிலை மீது  சூரிய ஒளியை  விழ வைக்க அறிவியல் நிறுவனங்கள் மீது நிர்பந்தம்…

அயோத்தியில் கட்டப்பட்டு வரும் ராமர் கோயிலின் உட்புறம் வைக்கப்பட்டுள்ள குழந்தை ராமர் சிலையின் தலை மேல் 2024 வருட ராமநவமி அன்று சூரியக் கதிர்கள் விழும்படி செய்யக்கூடிய ஆடிகளின் தொகுப்பால் ஆன கருவி ஒன்று அமைக்கப்பட உள்ளது. இதன் வடிவமைப்புக்காக சி எஸ் ஐ ஆர் (CSIR) என்ற மத்திய ஆராய்ச்சி நிறுவனமும மத்திய கட்டிட ஆராய்ச்சி மையமும் (CBRI) இணைந்து செயல்பட ஆட்சியாளர்கள் நிற்பந்திதுள்ளனர். இதற்கான அறிவியல் தகவல்களை அளிப்பதற்காக ஐ ஐஏ (IIA) என்ற இந்திய வானியல் மையமும் ஐயுக்கா (IUCCA) என்ற வானியல் மையமும் ஈடுபட வேண்டுகோள் விடப்பட்டுள்ளது.

இதன்படி ராமநவமி அன்று சூரியக் கதிர்கள் விழுவதற்கான கண்ணாடி கொண்ட அமைப்பு, கம்ப்யூட்டர் இணைப்பு என அமோகமாய் தயாரிப்பு வேலைகள் ஆரம்பிக்கப்பட்டுள்ளதாய்த் தெரிகிறது. இதை அறிவியலார்கள். வானியல் ஆய்வாளர்கள் கடுமையாக விமர்சனம் செய்து வருகின்றனர்.

சூரிய ஒளி விழும் கோவில்கள், சிலைகள்:

நமது நாட்டின் பல்வேறு கோவில்களில் கோவிலுக்குள்ளேயோ அல்லது கருவறைக்குள்ளேயோ சூரிய ஒளி விழும்படி கட்டிக்கலை நிபுணத்துவத்துடன் பண்டைய காலத்தில் கட்டப்பட்டுள்ளது உண்மையில் பாராட்டுக்குரியதாகும். இது பக்தர்களை மேலும் பக்தி பரவசத்தை ஊக்கப்படுத்த உதவுகிறது.

  1. திருச்சி சங்கரபாளயம் அருள்மிகு காசிவிசுவனாதர் கோவிலின் சிவலிஙகத்தில் ஆவணி 7,8,9 தேதிகளிலும் (ஆகஸ்ட்.-செப்) காலை 06-6.30 மணியளவில் சுமார் ரெண்டு அடி உயரமுள்ள  சிலையில் ஒளி விழுகிறது.
  2. வின்னம்பள்ளி கிராமத்தில் உள்ள அகஸ்தீஸ்வரர் கொவிலில் உள்ள மூன்றடி சிவலிங்கத்தில் பஙுனி மாதம் ஒரு வார காலம் தினமும் அரை மணி நேரம் ஒளி விழுகிறது
  3.  ஆந்திராவில் சிரிகாகுளம் அருகில் உள்ள அரசவள்ளி என்ற ஊரில் உள்ள சூரியநாராயண கோவிலில்  ஒவ்வொரு வருடமும் மார்ச் மாதம் இரண்டாவது வாரத்தில் கருவறையில் கடவுளின் காலில் சூரிய ஒளி விழுவதை பக்தர்கள் பார்த்து பரவசமடைகின்றனர்.
  4. கோல்காபுர் மஹாலக்‌ஷ்மி கோவிலில் மாலை 6 மணி அளவில் உள்ளே நுழையும் சூரிய ஒளி 6.13க்கு கருவறைக்குள் சென்று மூன்றடி உயரமுள்ள சாமி சிலையில் விழுகிறது. இதன் ஒளி அளவு 48 லக்ஸ் எனவும் அளவிட்டு உள்ளனர். மீண்டும் நவம்பர் மாதம் இதே போன்று நிகழ்கிறது. 
  5. ஹைதரபாத் அருகில் உள்ள கல்பாகுர் கிராமத்தில் உள்ள அனந்த பத்ம சாமி கோவிலில் தினசரி காலை ஒளி கோவிலுக்குள் விழுகிறது. இது காக்கதீய அரசர்களால் கி.பி 7 நூற்றாண்டில் கட்டப்பட்டது 
  6. கர்னாடாகவில்பசவங்குடி கஙதேஸ்வர் ஆலயத்தில் சங்கராந்தி சமயத்தில் 20மீட்டர் ஆழத்தில் உள்ள தெற்கு நோக்கிய ஆலயத்தில் நவம்பர் டிசம்பர் மாதங்களில் சூரிய ஒளி விழுகிறது.
  7. திருப்பதி அருகில் உள்ள நாகலாபுரம் வேதனாராயன்ண கோவிலில் மார்.25,26,27 தேதிகளில் மாலை 6 மணி முதல் 6.15 வரை சூரிய வெளிச்சம் விழுகிறது.
  8. உத்தர்காண்ட் மாநிலம் அல்மொர்ராவில் உள்ள இரண்டாவது சூரியக் கோவில் என்று கருதப்படும் கதர்மார் சூரியக் கோவிலில் சூரிய வெளிச்சம் கடவுள் சிலையில் அக்டோபர் 22 அன்றும் பிப்ரவரி 22 அன்றும் விழும் படி உள்ளது. அக்.22 உத்ராயணத்தில் இருந்து சூரியன் தக்க்ஷியணம் செல்லும் போதும் பிப்ரவரி 22 தக்‌ஷியாணத்தில் இருந்து உத்ரயணம் செல்லும் போதும் சூரிய ஒளி விழுவது போல் கட்டிக் கலையை அமைத்துள்ளனர் என்பது பாராட்டுக்குரியது.  
  9. சரியாக அக்டோபர் இரண்டு அன்று காந்தி சிலையில் சூரிய ஒளி படுமாறு குமரி முனை நினைவகம் அமைக்கப்பட்டுள்ளது.

இப்படியாக பல்வேறு கோவில்களில் சூரிய ஒளி விழும் நிகழ்வு உருவாக்கப்பட்டுள்ளது. அந்தகாலத்தில் இத்தகு அமைப்பு கட்டுமான சவால் ஆகும். எனவே இவை கட்டிடக்கலையின் வரலாற்றில் சிறப்பம்சம் ஆகும். ஒரு குறிப்பிட்ட இடத்தில் குறிப்பிட்ட நாளில் குறிப்பிட்ட நேரத்தில் சூரிய ஒளி எந்தக் கோணத்தில் விழும் என்பதைக் கணக்கில் கொண்டு மேற்கூரையில் துளை செய்யவேண்டும். அப்படி செய்தால் அந்த நாளில் அந்த குறிப்பிட்ட நேரத்தில் சிலையின் மீது சூரிய ஒளி விழும். இதில் எந்தவிதமான அபூர்வ சக்தி இருப்பதாகக் கூற முடியாது. சில கோயில்களில் ஆண்டில் ஒருநாள் மட்டும் என்று இல்லாமல் இரண்டு வெவ்வேறு காலகட்டங்களில் ஒளி பாய்வதும் நடைபெறுகிறது. இது உத்தராயணம் தட்சிணம் என்ற சூரிய உதயத்தின் இயற்கை நிகழ்வோடு சம்பந்தப்பட்டதாகும்.

எனவே அயோத்தி ராமர் கோவிலில் வருடாந்திரம் பிற கோயில்களில் விழுவது போல் ராம நவமி நாளன்று இயல்பாக ஒளி விழாது. கட்டிடக் கலை மூலம் இந்த அமைப்பை உருவாக்க முடியாது.எனவே ராம நவமியன்று சிலையில் செயற்கையாக ஒளி விழும்படியாக பல்வேறு ஆடிகளை இணைத்து கணினி மூலம் இயக்கி அந்தந்த ஆண்டு ராம நவமி ஏற்படும் அன்று ஒளி விழும்படி கருவி அமைப்பை ஏற்பாடு செய்து வருகின்றனர்.

ஏன்  ஒளி பிரதிபலிப்புக் கருவி தேவை?

ராம நவமி என்பது ஒரு திதி ஆகும். திதி என்பது நிலாக் காலண்டர் அடிப்படையில் கணக்கிடப்படுகிறது. ராம நவமி என்பது சுக்ல பட்சம் என்ற தேதியில் வருகிறது. சுக்ல பட்சம் என்பது அமாவாசையில் துவங்கி பெளர்ணமியில் முடியும். 15 நாட்கள் நிலா வளர்ந்து பௌர்ணமி அன்று நிறைவு பெறுகிறது. இதில் ராம நவமி ஒவ்வொரு மாதமும் ஒன்பதாம் நாள் வருகிறது. அடுத்த 15 நாட்கள் கிருஷ்ணபட்சம் துவங்கி தேய்பிறை ஆகி அமாவாசை ஆகிறது. நிலா காலண்டர் 29.5 நாட்கள் என்பதால் சுக்கில பட்சம் அடுத்த ஆண்டு அதே தேதியில் வருவதில்லை. எடுத்துக்காட்டாக 2024 ஏப்ரல் 17 வரும் ராம நவமி 2025ல் ஏப்ரல் 6ல் வருகிறது.

ஜனவரி 14, அக்டோபர் 2 என்கிறது போன்ற சூரிய நாட்காட்டியில் குறிப்பிட்ட நாளில் துளை மூலம் நேரடியாக ஒளி விழச் செய்யமுடியும். ஆனால் பங்குனி உத்திரம், ராம நவமி போன்றவை நிலவின் ஓட்டத்தோடு தொடர்புடையவை. எனவே ஆண்டுதோறும் ஒரே நாளில் இந்த விழாக்கள் ஏற்படாது. எனவே குறிப்பிட்ட திசையில் மேற்கூரையில் துளை செய்து இந்த வியப்பு நிகழ்வை ஏற்படுத்த முடியாது.

ஒவ்வொரு ஆண்டும் மாறுபட்ட தேதிகளில் ராம நவமி வருவதால் இயற்கையாக கட்டிடக்கலையில் கொண்டு வருவது சிரமம். இதே தேதியில் 19 வருடத்திற்குப் பின்னர் தான் ராமநவமி வரும்.அதை வேண்டுமென்றால் கட்டிடக் கலையில் கொண்டு வரலாம்.ஏனென்றால் பூமி சூரியனைச் சுற்றி வருவதற்கு 3651/4 எடுத்துக் கொள்கிறது. நிலா பூமியை 29.5 நாட்களில் சுற்றி வருகிறது. இதைக் கணக்கிட்டால் சூரியன், பூமி,நிலா ஆகியன மூன்றும் ஒரே நேர்கோட்டில் வருவதற்கு 19 வருடங்கள் ஆகும். இதை மெடோனிக் சைக்கிள் (Metonic cycle) என்கின்றனர்.

எனவே ராமர் சிலையில் கட்டிடக் கலையின் மூலம் வெளிச்சத்தை விழ வைக்க வேண்டுமென்றால் 19 வருடத்திற்கு ஒருமுறை தான் வாய்ப்பு உள்ளது. எனவே தான் வருடந்தோறும் சூரிய ஒளியை ராமர் சிலை மேல் விழ வைக்க கணிணி, மின்னனு, எந்திரவியல், ஒளியியல் தொழில்நுட்பங்கள் மூலம் கருவியை உருவாக்க வேண்டியுள்ளது.

ஆன்மீகத்திற்கான விளம்பர அறிவியல்:

காந்தி நினைவிடத்தில் குறிப்பிட்ட நாள் அன்று ஒளி விழச் செய்வது என்பது பார்வையாளர்களுக்கு வியப்பை ஏற்படுத்தும். ஆனால் கோவிலில் வலிந்து இவ்வாறு ஏற்பாடு செய்வது எழுத்தறிவு பரவலாக இல்லாத வட இந்தியாவில் பொதுமக்களை இந்த வியப்பைக் காட்டி மயக்கும் நோக்கமோ என சந்தேகம் கொள்ளச் செய்கிறது.

இங்கு ஏற்பாடு செய்ய திட்டமிட்டுள்ள ஒளி பிரதிபலிக்கும் கருவியை பள்ளி இறுதியாண்டு மாணவர்கள் அல்லது இளம்கலை வகுப்பு மாணவர்கள் வடிவமைக்க முடியும். வானவியல் கணக்கீடு, ஒளியியல் பிரதிபலிப்பு & ஒளி குவித்தல், எந்திரவியலில் கியர் சிஸ்டம், மின்னணுக் கணிணியியலில் ஆட்டொமேடிக் சிஸ்டம் இவைகளை ஒருங்கிணைத்து கல்லூரி மாணவர்களே செய்ய முடியும் என்கிறார் ஹோமி பாபா அறிவியல் கல்வி மையத்தின் வானியல் அறிஞர் முனைவர் அனிகெட் சுலே.

ஆனால் சிஎஸ் ஐ ஆர், மத்திய கட்டிடக்கலை ஆய்வு மையும், இந்திய வானியல் நிறுவனம், ஐயுக்கா போன்ற அறிவியல் சார் பெரும் நிறுவனங்களின் மனித வளத்தை இதற்கு பயன் படுத்த வேண்டியதில்லை என்றும் இதற்கென ஆராய்ச்சி நிதியை வீணடிக்க வேண்டாம் எனவும் இந்தியாவில் உள்ள அறிவியலார்கள் இடித்துரைக்கின்றனர் . இது ராமர் கோவிலைப் பிரபலப்படுத்துவதற்கும் ஆன்மீகத்திற்கான செய்யப்படும் மாபெரும் அறிவியல் விளம்பரம் என அறிஞர்களும் செயல்பாட்டாளர்களும் கருதுகின்றனர்.

– பொ.இராஜமாணிக்கம்

இந்திய அறிவியல் வளர்ச்சியின் உண்மையான ஆணிவேர்….. ஆயிஷா இரா நடராசன்

இந்திய அறிவியல் வளர்ச்சியின் உண்மையான ஆணிவேர்….. ஆயிஷா இரா நடராசன்




அறிவியல் கண்டுபிடிப்புகளை தொழில்துறையோடு இணைக்கும் அமைப்பு மட்டுமே எதிர்காலத்தை நோக்கிய வளர்ச்சிப் பாதையில் நாட்டை எடுத்துச் செல்ல முடியும்.

-சாந்தி ஸ்வரூப் பட்னாகர்
இந்திய விஞ்ஞானி

Ayesha Ira Natarasan was the real anchor of Indian scientific development இந்திய அறிவியல் வளர்ச்சியின் உண்மையான ஆணிவேர்….. ஆயிஷா இரா நடராசன்

திடீரென்று சி.எஸ்.ஐ.ஆர் புகழ் பெற்றுவிட்டது இந்தியாவின் பிரம்மாண்ட அறிவியல் ஆய்வு நிறுவனத்திற்கு முதல் பெண் இயக்குனர் ஜெனரலாக டாக்டர் கலைச்செல்வி நியமிக்கப்பட்டதால் இந்த பரபரப்பு.

நம் நாட்டில் அறிவியல் தொழில்நுட்பம் என்றாலே நாம் இந்திய விண்வெளி ஆய்வு நிறுவனத்தையும் (இஸ்ரோ) பாதுகாப்பு தளவாட ஆய்வகத்தையும் (டி.ஆர்.டி.ஏ) முன்னிலைப்படுத்தி ஏதோ ஏவுகணை மற்றும் ராக்கெட் விடுவதே அறிவியல் என்று நாம் மட்டுமல்ல நம் குழந்தைகளையும் நம்ப வைத்து இருக்கிறோம்.

ஆனால் இந்திய நாடு தனது விடுதலையின் 75ஆம் ஆண்டு கொண்டாட்டங்களை முன்னெடுக்கும் இத்தருணத்தில் இந்திய அறிவியலின் உண்மையான ஆணிவேரை அறிய வேண்டி உள்ளது. இந்திய விண்வெளி ஆய்வு நிறுவனத்தையும், பாதுகாப்பு தளவாட ஆய்வகங்களையும் நாம் குறைத்து மதிப்பிடவில்லை ஆனால் நாட்டின் சோதனையான காலகட்டங்களில் துணை நின்று ‘கரை சேர்த்து’ ஆபத்பாந்தவனாக விளங்கிய ஒரு சாதனை அமைப்பை மறந்து விட வேண்டாம் என்றே மனம் பதறுகிறது.

விடுதலையின் போது பஞ்சமும் பட்டினியும், கல்வி அறிவின்மையும் நாட்டை பீடித்திருந்த சமூக நோய்கள் மதவெறி, அதீத மூட-நம்பிக்கை, பெண்ணடிமை என பட்டியல் நீண்டாலும் நாட்டின் ஒட்டுமொத்த உற்பத்தியும், தனிநபர் வருமானமும் மிகவும் ஆபத்தான நிலையில் இருந்தன. ஏழை நாடு என்றும் மூன்றாம் உலக நாடு என்றும் பிறகு வளர்ந்து வரும் நாடு என்றும் நாம் முன்னேறிட பெரும்பங்கு வகித்தது அறிவியல் மற்றும் தொழில் துறை ஆராய்ச்சி மன்றம் (Council of Scientific and Industrial Research) எனும் இந்திய அறிவியல் தொழில்நுட்ப நிறுவனம் ஆகும். இந்தியாவின் வளர்ச்சிக்காக ஐந்தாண்டு திட்டங்கள் அறிமுகமான 1950க்கு முன்பே அந்த நிறுவனம் உருவாக்கப்பட்டு விட்டது. ஹோமி ஜஹாங்கீர் பாபா, விக்ரம் சாராபாய் போன்றவர்களை இந்திய அறிவியல் தொழில்நுட்ப வளர்ச்சியின் பிதாமகர்களாக கொண்டாடும் நாம் சாந்தி ஸ்வரூப் பட்னாகர் எனும் மாமனிதரை பற்றி அவ்வளவாக பேசுவதும் இல்லை. அவரை அடுத்த தலைமுறைக்கு அறிமுகம் செய்வதும் இல்லை.Ayesha Ira Natarasan was the real anchor of Indian scientific development இந்திய அறிவியல் வளர்ச்சியின் உண்மையான ஆணிவேர்….. ஆயிஷா இரா நடராசன்

அறிவியல் மற்றும் தொழில்துறை ஆராய்ச்சி மன்றம் ஒரு பிரித்தானிய அரசின் அமைப்பாக 1942ல் தொடங்கப்பட்டபோது அதன் இயக்குனராக சாந்தி ஸ்வரூப் பட்னாகர் நியமிக்கப்பட்டார். ஆனால் அது இந்திய அறிவியல் மற்றும் தொழில் துறை ஆராய்ச்சி மன்றம் என்று மாற்றப்பட வேண்டும் என அவர் போராடினார். நம் தமிழகத்தின் ஆற்காடு ராமசாமி முதலியார் அப்போது ஆங்கிலேய அரசின் நிர்வாக ஆலோசனை அமைப்பில் ஒரு உறுப்பினராக இருந்தார். அப்போது பலம் பொருந்திய மத்திய நாடாளுமன்றத்தில் (Central Legislative Assembly) அவர் வாதிட்டு அதை இந்திய கவுன்சிலாக மாற்ற வைத்தார் வைஸ்ராயின் நிர்வாக குழுமத்திலும் ஆற்காடு ராமசாமி முதலியார் சக்தி வாய்ந்த உறுப்பினரான இருந்ததால் பிரித்தானிய அறிவியல் மற்றும் தொழில் துறை குழுமத்தை(BSIR) இந்திய அறிவியல் மற்றும் தொழில் துறை குடும்பமாக மாற்றி (CSIR) அதற்கு ஒரு கோடி ரூபாய் நிதியையும் பெற்றார்.

விடுதலைக்குப் முன்பே பட்னாகர் ஐந்து தேசிய ஆய்வகங்களை உருவாக்கும் முனைப்பை தொடங்கினார். தேசிய இயற்பியல் ஆய்வகம்
( National Physical Laboratory) தேசிய எரிபொருள் ஆய்வகம் (National Fuel Research station ) தேசிய உலோகவியல் ஆய்வகம் (National Metallurgical Laboratory) ஆகியவை அவற்றில் குறிப்பிடத்தக்கவை. இன்று இந்திய அறிவியல் மற்றும் தொழில் துறை குழுமம் நாடு முழுவதும் 38 ஆய்வகங்கள் 39 தொழில்நுட்ப தொடர்பகங்கள் மற்றும் மூன்று பிரம்மாண்ட கண்டுபிடிப்பு அரங்கங்களையும் நடத்துகிறது.

விடுதலைக்குப் பின் இந்தியாவை பல்துறை தன்னிறைவு கொண்ட வளர்ந்த நாடாக மாற்றும் பிரம்மாண்ட பணியை முதல் பிரதமர் நேரு சி எஸ் ஐ ஆர் இன் வசம் ஒப்படைத்தார். நேரடியாக இந்திய அரசாங்கத்தால் நிதி ஒதுக்க முடியாத காலகட்டம் அது சர் டொராப்ஜி டாட்டா அறக்கட்டளை மற்றும் பொதுமக்களின் நிதி உதவிகளை ஊக்கப்படுத்தி பட்னாகர் ஐந்து முக்கிய ஆய்வகங்களை ஏற்படுத்தி முதலில் ஏழாயிரம் இளம் விஞ்ஞானிகளை பணி அமர்த்தினார். அடுத்தடுத்து வந்த ஐந்தாண்டு திட்டங்களில் இந்த அறிவியல் ஆய்வு நிறுவனம் இந்திய தொழில் துறையை படிப்படியாக தன்னிறைவு அடைய வைத்தது.

சி எஸ் ஐ ஆர் இன் சாதனைகள் பல. நம் நாட்டிற்கு என்று அறிவியல் பூர்வமான நாட்காட்டி ஒன்றை தரமாக தயாரித்து வெளியிட்டது, அவற்றில் ஆரம்ப கால (1955) மகத்தான சாதனைகளில் ஒன்று. இந்திய தேசிய நாட்காட்டியை வடிவமைக்க இந்திய வானியல் விஞ்ஞானி மெக்நாட் சாஹா வின் தலைமையில் அதற்காக ஒரு குழு அமைக்கப்பட்டு அக்குழுவின் பரிந்துரைப் பேரில் இந்திய நாட்காட்டி நாடாளுமன்றத்தில் அறிமுகம் செய்யப்பட்டது.

1952 ல் முதல் இந்திய பொது தேர்தலின் போது சி எஸ் ஐ ஆர் இன் அடுத்த பங்களிப்பை பார்க்கிறோம் தேர்தலில் மோசடிகளை தடுக்க குறிப்பாக ஒருவரே பலமுறை வாக்களிப்பதை தவிர்க்க அழியாத மையை தேசிய இயற்பியல் ஆய்வகம் மூலம் சி எஸ் ஐ ஆர் வெள்ளி – நைட்ரேட்டை பயன்படுத்தி கண்டுபிடித்து வழங்கியது இந்த மை இன்றும் உற்பத்தி செய்யப்படுவதோடு பல நாடுகளுக்கு ஏற்றுமதியும் செய்யப்படுகிறது.

இந்திய தோல் பதனிடும் தொழில்துறையின் அபரீத வளர்ச்சி அடுத்த சாதனை. உள்ளூர் சிறு தொழில் முனைவோரை தாங்கி பிடித்து சிறு சிறு அளவில் வளர்ச்சிக்கு உதவுதல் என்பது தான் இந்தியா மாதிரியான பெருமக்கள் தொகை கொண்ட மூன்றாம் உலக நாட்டின் வாழ்க்கை தரத்தை மேம்படுத்த முடியும். தோல் பதனிடும் துறையில் விடுதலையின் போது சுமார் 25 ஆயிரம் பேர் ஈடுபட்டிருந்தனர். 1970களில் அரசும் அறிவியல் மற்றும் தொழில் துறை ஆராய்ச்சி மன்றமும் இணைந்து எடுத்த அபாரமான அறிவியல் தொழில்நுட்ப புரட்சி காரணமாக இன்று இத்துறையில் நாடு முழுவதும் குக்கிராமங்கள் உட்பட 4.5 லட்சம் பேர் நேரடியாக வேலை பெறுகிறார்கள். அவர்களில் பெரும்பாலானவர்கள் பெண்கள் மத்திய தோல் ஆராய்ச்சி நிறுவனம்(Central Leather Research Institute) எனும் பிரம்மாண்ட ஆய்வகம் ஒன்றை சி எஸ் ஐ ஆர் சென்னையில் நடத்தி வருகிறது. இந்த ஆய்வகத்தின் மூலம் தோல் பதனிடுதலில் அடுத்தடுத்த பல சந்ததிகளை நாம் பயிற்சி கொடுத்து உருவாக்கி வருவதோடு 1960 களில் 68-ம் இடத்தில் இருந்த இந்திய தோல் தொழில் துறையை இன்று உலகின் நான்காம் இடத்திற்கு உயர்த்தி இருக்கிறோம். அவ்விஷயத்தில் விஞ்ஞானி இயெல்வரத்தி நயுடம்மா எனும் மாமனிதரின் அர்ப்பணிப்பை நாடு மறக்காது.

Ayesha Ira Natarasan was the real anchor of Indian scientific development இந்திய அறிவியல் வளர்ச்சியின் உண்மையான ஆணிவேர்….. ஆயிஷா இரா நடராசன்

நம் அறிவியல் மற்றும் தொழில்துறை ஆராய்ச்சி மன்றத்தின் பங்களிப்பு இன்றி பசுமைப் புரட்சி சாத்தியமாகி இருக்காது. வேளாண் – வேதியியல் (Agro-Chemical) மற்றும் வேளாண் – இயந்திரவியல்( Mechanisation of Agriculture) என அறிவியல் மயமான வேளாண்மையை 1960 களிலேயே அறிமுகம் செய்தது அது ஹிந்துஸ்தான் உயிரி – வேதியியல் ஆய்வகம் மற்றும் ஹிந்துஸ்தான் பூச்சிக்கொல்லி ஆய்வகம் போன்ற ஆராய்ச்சி நிலையங்களில் கண்டுபிடித்து தரப்பட்ட வேளாண் இடுபொருட்கள் அயல்நாட்டிலிருந்து அவற்றை வரவழைக்கும் ஏராளமான செலவீனத்தை மிச்சப்படுத்தி நம் நாட்டை இந்த விஷயத்தில் தன்னிறைவு அடைய வைத்தது வரலாறு. நாடு முழுவதும் தனது ஆய்வக உற்பத்தி சாலைகளில் சிஎஸ்ஐஆர் உருவாக்கி கொடுத்த விவசாய இயந்திரங்கள் டிராக்டர் ஊர்திகள் (பஞ்சாப் டிராக்டர்ஸ் லிமிட்டட் ஆய்வகம்) என்று அடுக்கிக் கொண்டே போகலாம்.

உலகையே அச்சுறுத்திய கொடிய எய்ட்ஸ் (எச். ஐ. வி) உயிர் கொல்லி நோய்க்கு தனது ஹிந்துஸ்தான் மருந்தாய்வு ஆய்வகத்தில் எச்ஐவி எதிர்ப்பு மருந்து தயாரிக்கும் முறையை கண்டறிந்து அறிமுகப்படுத்தியது அடுத்த மைல்க்கல். பிறகு அதை மருந்தாலும் நிறுவனங்கள் கையில் எடுத்தனர். கல்வியகத்திற்கும் தொழில்துறைக்குமான பரஸ்பர ஒத்துழைப்பிற்கு அது முன்னுதாரணம். வருடம் 1990.

1950 களில் சத்துக்குறைபாட்டால் ஐந்து வயதுக்கு உட்பட்ட குழந்தைகளின் இறப்பு சதவிகிதம் அதிகரித்த போது நடந்த எழுச்சி மிக்க பங்களிப்பை யாருமே மறக்க முடியாது. இந்தியா சுதந்திரம் அடைந்த நாட்களில் குஜராத்தின் ஆனந்த நகர் கறவை மாடு விவசாயிகளின் ஒரு குழுவினர் சர்தார் வல்லபாய் படேலை சந்திக்கிறார்கள் தங்கள் வாழ்வாதாரத்தை காப்பாற்றுமாறு கெஞ்சுகிறார்கள். நடுவில் தலையிடும் இடைத்தரகர்களுக்கு பாலை விற்காமல் ஒரு கூட்டுறவு சங்கம் அமைத்து நேரடியாக உற்பத்தியான பாலை விற்குமாறு படேல் யோசனை தெரிவிக்கிறார். சர்தார் படேல், மொரார்ஜி தேசாய், திரிபுவன்தாஸ் படேல் போன்றவர்களின் வழிகாட்டுதலில் கெய்ரா மாவட்ட பால் உற்பத்தியாளர் கூட்டுறவு சங்கம் அமைக்கப்பட்டது. அதுதான் இன்றைய அமுல்.

1950 களில் இந்த சங்கத்தோடு இந்திய அறிவியல் மற்றும் தொழில் துறை மன்றம் ஒப்பந்த அடிப்படையில் எருமை மாட்டுப்பால் பெற்று அந்த பாலை, பால் பவுடராக மாற்றும் தொழில்நுட்பத்தை வெற்றிகரமாக அறிமுகப்படுத்தி கொடுத்தது. நாட்டில் உணவு பஞ்சத்தால் பசியால் தவித்த பல ஊர்களுக்கு அரசால் விலையின்றி பால் – பவுடரை அனுப்பி வைக்க முடிந்தது. பல்லாயிரம் குழந்தைகளின் பசியாற்ற சிஎஸ்ஐஆர் இன் தொழில்நுட்பம் உதவியது. அயல்நாட்டு பால்பவுடர் நிறுவனங்கள் இந்தியாவில் தங்களது உற்பத்தி சாலைகளை உருவாக்க முடியாது என்று மறுத்துவிட்ட பின்னணியில் இது நடந்தது. நம் பசுக்களும் எருமைகளும் தரும் பாலில் தேவையான அளவு சத்து இல்லை என்று அவை அறிவித்த பின்னணியில் இந்த கண்டுபிடிப்பு எவ்வளவு முக்கியமானது என்பதை உணர முடியும். இன்று உலக பால் உற்பத்தியில் நாம் முதலிடமும் பால் பவுடர் உற்பத்தியில் மூன்றாம் இடத்திலும் இருக்கிறோம்.

இந்திய செயற்கைக்கோள் தொழில்நுட்பத்தை தகவல் தொடர்பிற்கும் வெகுஜன தொலைக்காட்சி அறிமுகப்படுத்தியதற்கும் பயன்படுத்துவது என்றும் தொலைதூரக் கல்வி செயல்பாடுகளுக்கு தொலைக்காட்சி ஒளிபரப்பை கொண்டு செல்வது என்றும் 1983ல் திருப்பதியில் நடைபெற்ற இந்திய அறிவியல் மாநாட்டில் அரசின் தொழில்நுட்ப கொள்கையை வெளியிட்டு பிரதமர் இந்திரா அறிவித்திருக்கிறார். உடனடியாக சிஎஸ்ஐஆர் தனது மத்திய மின்னணு பொறியியல் ஆராய்ச்சி நிறுவனம் (பிலானி) மூலம் உள்நாட்டிலேயே தயாரிக்க முடிந்த கருப்பு வெள்ளை தொலைக்காட்சிகளை அறிமுகம் செய்து பிறகு மூன்றே ஆண்டுகளில் வண்ணத் தொலைக்காட்சி பெட்டிகளை உற்பத்தி செய்யும் தொழில்நுட்பத்தையும் வழங்கியது. விஞ்ஞானியும் பேராசிரியருமான யஷ்பாலின் பங்களிப்பு இது.

1985இல் இந்திய ராணுவத்திற்காக முதல் தானியங்கி தொலைபேசி மையத்தை தனது டெலிகாம் ஆய்வகம் மூலம் நம் நாட்டில் அர்ப்பணித்ததும் சி எஸ் ஐ ஆர் தான்.

உலகே நவீனமயமாகி, மரபணு ரேகை தொழில் நுட்ப முறைப்படி குற்றவியல் வழக்குகள் அணுகப்பட்ட காலகட்டத்தில் அமெரிக்காவிடம் ஜப்பானியிடம் கையேந்தாமல் 1988லேயே தனது ஹைதராபாத் உயிரணு மற்றும் மூலக்கூறியல் மையத்தின் மூலம் மரபணு ரேகை தொழில் நுட்பத்தை அடைந்து அவ்விதம் சாதித்த உலகின் மூன்றாவது நாடு என்கிற பெருமையை நம் நாட்டிற்கு கொடுத்தது இந்திய அறிவியல் மற்றும் தொழில் துறை மன்றம். அதனை சாதித்த விஞ்ஞானி லால்ஜி சிங்.

இந்தியா இன்று கோவிட் 19 எனும் கொடிய காலகட்டத்தை கடந்து தடுப்பூசிகளால் காப்பாற்றப்பட்டிருக்கிறது என்றால் சி எஸ் ஐ ஆர் அமைப்பு இந்திய மருத்துவ ஆராய்ச்சி நிறுவனத்தோடு இணைந்து கோவாக்ஸின் தடுப்பு மருந்தை வழங்கியதோடு விலை மலிவான மருத்துவ முகக்கவசம் முதல் பிபிசி என்று அழைக்கப்பட்ட முழுமையான மருத்துவ தற்காப்பு கவசம் வரை யாவற்றையும் உற்பத்தி செய்யும் தொழில்நுட்பத்தையும் சேர்த்து ஐந்து முனை செயல்திட்டத்தின் மூலம் போர்க்கால அடிப்படையில் செயல்பட்டதை வரலாறு மறக்காது.

இந்திய அறிவியல் மற்றும் தொழில் துறை ஆராய்ச்சி மன்றம் இன்று அணுகாத அறிவியல் தொழில்நுட்ப துறை இல்லை. விண்வெளிப் பொறியியல், முதல் கட்டமை பொறியியல் வரை, கடல் ஆய்வு, மூலக்கூறு உயிரியல், வேதி சுரங்க இயல், நேனோ தொழில்நுட்பம், பெட்ரோலிய பொருட்களின் ஆய்வியல், சூழலியல், சூழலியல் தொழில்நுட்பம் என்று எதையுமே அது விட்டு வைக்கவில்லை.

நம் நாட்டு மருத்துவ குணம்மிக்க மஞ்சள், வேப்ப எண்ணெய் போன்றவைகளின் காப்புரிமைகள் பெரும் போராட்டத்திலும் சி.எஸ்.ஐ. ஆரின் பங்கு மகத்தானது. இந்திய அறிவியல் மற்றும் தொழில் துறை ஆராய்ச்சி நிறுவனம் தனது ஸ்தாபகர் சாந்தி ஸ்வரூப் பட்னாகர் பெயரில் வழங்கும் அறிவியல் தொழில்நுட்ப கண்டுபிடிப்பு விருது, இயற்பியலாளர் கே எஸ் கிருஷ்ணன், மருத்துவ அறிஞர் ராம் பிஹாரி அரோரா, கணிதவியல் நிபுணர் கே எஸ் சந்திரசேகரன், அனுவியல் விஞ்ஞானி ஹோமி சேத்னா தாவரவியல் விஞ்ஞானி டி எஸ் சதாசிவம், மரபியலாளர் கலப்பை முனியப்பா என்று பலரை அங்கீகரித்து உள்ளது. அறிவியல் தொழில்நுட்ப வளர்ச்சியின் உண்மையான ஆணிவேராக விளங்கிவரும் இந்திய அறிவியல் மற்றும் தொழில் துறை மன்றத்தின் சிறப்பை விடுதலையின் 75 ஆம் ஆண்டில் நாம் அங்கீகரித்து கொண்டாடி அடுத்த தலைமுறைக்கு எடுத்துச்செல்ல வேண்டும்.

– ஆயிஷா இரா நடராசன்