K.Punithan’s Poetry

புத்தா ரோபோ பேசுவதில்
புள்ளினங்களின் மொழி
இருந்தது
அரண்மனை விட்டு
வெளியேறும் போது
உலோக காலம் விட்டு
காகத்தின் எச்சில் முளைத்த
விதையின் தொன்ம காலம்
நோக்கி நகர்ந்த
ரோபோவின் கதை இருந்தது
குயிலின் மொழி
உணவு கொண்டு போகும்
எறும்புகளின் சாரை
ஜென் கதைகள்
மனம் எனும் மூலிகையின்
வாசம் ப்ரோக்ராம் செய்யப்பட்டிருந்தது
வாழை இலை மேல்
மழைத் துளி தங்கும்
மெழுகில் முழுக்க பூசப்பட்டிருந்தது
யசோதரவின்
பெண் மொழியும்
தேநீர் மொழியும்
அதில் சேர்க்கப்பட்டிருந்தன.