No Comments
No Comments
வரும் 2022-23 கல்வியாண்டு முதல் 6ஆம் வகுப்பிலிருந்து 12ஆம் வகுப்பு வரை உள்ள மாணவர்களுக்கான பாடத்திட்டத்தின் ஒரு பகுதியாக பகவத் கீதை கற்பிக்கப்படும் என்று குஜராத் மாநில அரசின் கல்வி அமைச்சர் அறிவித்திருப்பது, அரசு மதச்சார்பின்மைக் கொள்கையை அப்பட்டமாக மீறும் நடவடிக்கையாகும். அரசாங்கத்தால் நடத்தப்படும் பள்ளிகள் எதுவும் எவ்விதமான மத போதனைகளையும் அளிக்கக்கூடாது என்பது அனைத்து மதச்சார்பற்ற அரசுகளின் அடிப்படைக் கொள்கையாகும்.
இந்தக் கொள்கையை அமெரிக்கா, பிரான்சு, ஜப்பான் முதலான பல நாடுகள் பின்பற்றுகின்றன. தனியார் பள்ளிகள் எவ்விதமான மத போதனைகளையும் அளித்திட சுதந்திரம் அளிக்கப்பட்டிருக்கிறது. ஆனால் அரசுப் பள்ளிகளுக்குக் கிடையாது. பகவத் கீதை என்பது ஒரு மதஞ்சார்ந்த நூலாகும். இது, இந்து மதத்தின் பாரம்பர்யங்கள் மற்றும் சித்தாந்தத்தின் அடிப்படையில் வாழ்க்கை முறை மற்றும் நடத்தையை மேற்கொள்ளவேண்டும் என்று கோருகிறது. அதன் மதப் பின்னணியை ஓரங்கட்டிவிட்டு, மாணவர்களுக்கு அறநெறி மற்றும் நெறிமுறைகளைக் கூறும் ஒரு நூலாக அதனைச் சித்தரித்திட முடியாது. கடவுளால் உண்டாக்கப்பட்ட இந்துக்களில் நால் வர்ணப் பிரிவை எவராலும் மாற்ற முடியாது என்கிற கீதையின் சில அம்சங்கள் குறித்து இந்துக்களிலேயே விமர்சிப்பவர்கள் உண்டு. கீதை படுபிற்போக்குத்தனமான ஒன்று என்பது குறித்தோ அல்லது அது சில பிற்போக்குத்தனமான சிந்தனைகளைக் கொண்டிருக்கிறது என்பது குறித்தோ உண்மையில் பிரச்சனை கிடையாது. அரசாங்கத்தின் கீழ் இயங்கும் பள்ளிக்கூடங்கள் குறிப்பிட்ட ஒரு மதத்தைச் சார்ந்த அறிவுரைகளை எப்படி அளித்திட முடியும் என்பதே முன்னுக்கு வந்திருக்கும் பிரச்சனையாகும்.
அரசமைப்புச்சட்டத்தின் கீழ், அடிப்படை உரிமைகள் குறித்து விவரித்திடும் 28(1)ஆவது அத்தியாயம் கூறுவதாவது: “அரசின் நிதி உதவியின்கீழ் இயங்கிடும் எந்தவொரு கல்வி நிறுவனமும் மதஞ்சார்ந்த எந்தவிதமான அறிவுரையையும் அளித்திடாது.” அரசாங்கத்தால் நடத்தப்படாத கல்வி நிலையங்களில் அல்லது அரசின் நிதி உதவியுடன் நடத்தப்படும் தனியார் கல்வி நிறுவனங்களில், ஏதேனும் மதஞ்சார்ந்த அறிவுரைகள் அளிக்கப்படுமானால், அதனைச் செவிமடுக்கும் மாணவர் வயதுக்கு வராதவராக (மைனராக) இருந்தால், அவருடைய பாதுகாவலரின் அனுமதியைப் பெறாமல், அத்தகைய அறிவுரைகளைச் செவிமடுக்க அனுமதிக்கக் கூடாது என்று அது மேலும் கூறுகிறது. எனவேதான், பகவத் கீதை தொடர்பான குஜராத் அரசு மேற்கொண்டுள்ள முடிவு, அரசின் நிதியின்கீழ் நடத்தப்படும் பள்ளிகளில் எவ்விதமான மதஞ்சார்ந்த அறிவுரைகளும் அளிக்கப்படக்கூடாது என்கிற நம் அரசமைப்புச் சட்டத்தின் அடிப்படை அம்சங்களுக்கு எதிரான ஒன்றாக மாறுகிறது.
குஜராத் பாணியை இப்போது இதர பாஜக ஆளும் மாநிலங்களும் பின்பற்றத் தொடங்கியிருக்கின்றன. கர்நாடகப் பள்ளிக் கல்விக்கான அமைச்சர், கல்வியாளர்களுடன் கலந்தாலோசனை செய்து, பள்ளிகளில் பகவத்கீதை அறிமுகப்படுத்தப்படுவது குறித்து பரிசீலிக்கப்படும் என்று கூறியிருக்கிறார். “பகவத் கீதை, இந்துக்களுக்கானது மட்டுமல்ல, அது எல்லோருக்குமானது” என்றும் அவர் திருவாய் மலர்ந்திருக்கிறார். இதே கர்நாடக அரசாங்கம்தான் கல்வி நிறுவனங்களில் முஸ்லீம் மாணவிகள் ஹிஜாப் அணிவதைச் சட்டவிரோதமாக்கி இருக்கிறது. ஒன்றிய அமைச்சர் பிரகலாத் ஜோஷியும், “பகவத் கீதை நமக்கு அறநெறிகளையும், நெறிமுறைகளையும் போதிக்கிறது. ஒவ்வொரு மாநில அரசாங்கமும் இதுபற்றிச் சிந்தித்திட வேண்டும்,” என்று கூறியிருக்கிறார்.
இந்திய அரசமைப்பின் ஆணிவேராக விளங்கும் மதச்சார்பின்மையை வேரறுத்திட வேண்டும் என்பதற்கான ஆர்எஸ்எஸ்/பாஜக-வின் ஒட்டுமொத்த திட்டத்தின் ஒரு பகுதியே இவ்வாறு அரசுப்பள்ளிகளில் இந்து மதம் சம்பந்தமான புத்தகங்களையும், புராணங்களையும் புகுத்துவதற்கான முயற்சிகளாகும். பள்ளிப் பாடப்புத்தகங்களில் கீதையைப் புகுத்துவதனை நியாயப்படுத்திட “இந்தியக் கலாச்சாரம் மற்றும் அறிவு முறைகள்” பாடப்புத்தகங்களில் சேர்க்கப்பட வேண்டும் என்கிற புதிய கல்விக் கொள்கையின் பரிந்துரைகளை குஜராத் கல்வி அமைச்சர் மேற்கோள் காட்டியிருக்கிறார். இதேபோன்றே அரசின் பல துறைகளிலும் அரசின் நிதி உதவியுடன் இந்து மத அடையாளங்களைப் புகுத்துவதற்கான முயற்சிகள் நடந்துகொண்டிருப்பதும், இந்து மதக் கோவில்களைப் புதுப்பித்திட நடவடிக்கைகள் மேற்கொள்வதும் வழக்கமான ஒன்றாக மாறியிருக்கிறது. இதற்கு பிரதமர் காசி விஸ்வநாத் கோவிலுக்கான பாதையைத் துவக்கி வைத்திருப்பது சிறந்த எடுத்துக்காட்டாகும்.
அரசு, நாட்டு மக்களில் பெரும்பான்மையாகவுள்ளவர்களின் மதத்திற்கு ஆதரவும் அரவணைப்பும் அளிப்பதும், அதற்கு அரசின் நிறுவனங்களிலும் அமைப்புமுறைகளிலும் சலுகைகள் அளிப்பதும் நாட்டில் ஆட்சியாளர்கள் மதச்சார்பின்மை தொடர்பாக பெயரளவில் செயல்படுவதென்பதற்கும் முடிவுகட்டிவிட்டது. ‘ஜிகாத் காதல்’ (‘love jihad’), மதமாற்றம் மற்றும் கால்நடைகள் வெட்டப்படுவதற்குத் தடை முதலானவற்றிற்கு எதிரான சட்டங்கள் சிறுபான்மை மக்களைக் குறிவைத்தே பாஜக ஆளும் மாநில அரசாங்கங்களால் கொண்டுவரப்பட்டுள்ளன. அதேபோன்றே ஒன்றிய அரசு நிறைவேற்றியுள்ள, குடியுரிமைத் திருத்தச் சட்டமானது ஒருவருக்குக் குடியுரிமை வழங்குவதற்கு அவருடைய மதத்தையும் பரிசீலித்திட வேண்டும் என்று விதி ஏற்படுத்தி இருக்கிறது. குஜராத்தில், பகவத் கீதையைப் பள்ளிகளின் பாடப்புத்தகங்களில் சேர்த்திருப்பதை, அங்கே பிரதான எதிர்க்கட்சியாக இருந்துவரும் காங்கிரஸ் உட்பட பல கட்சிகள் வரவேற்றிருக்கின்றன. காங்கிரஸ் செய்தித் தொடர்பாளர் இதுகுறித்துக் கூறுகையில், “பள்ளிப் பாடப் புத்தகங்களில் பகவத்கீதையை அறிமுகப்படுத்தியிருப்பதை நாங்கள் வரவேற்கிறோம், ஆனால், அரசாங்கம்தான் கீதையிலிருந்து முதலில் பாடம் படிக்க வேண்டியது அவசியமாகும்,” என்று கூறியிருக்கிறார். இதேபோன்றே ஆம் ஆத்மி கட்சி செய்தித் தொடர்பாளரும், “நாங்கள் குஜராத் அரசின் முடிவை வரவேற்கிறோம். இது மாணவர்களுக்குப் பயனளிக்கும்” என்று கூறியிருக்கிறார்.
குஜராத்தில் உள்ள எதிர்க்கட்சிகள் இதற்கு அளித்திருக்கும் பிரதிபலிப்பு ஒரு புதிய எதார்த்த நிலையைக் காட்டுகிறது. அதாவது, அங்கே இந்துத்துவா மிகவும் உறுதியாக ஒரு மேலாதிக்க நிலைக்கு உயர்ந்திருப்பதை இது காட்டுகிறது. இந்தியா ஒரு மதச்சார்பற்ற நாடாக நீடிக்க வேண்டும் என்று விரும்புகிற இடது மற்றும் ஜனநாயக சக்திகள் அனைவரும், இந்த எதார்த்த நிலையைக் கணக்கில் எடுத்துக்கொண்டு, எதிர்காலத்தில் தங்கள் போராட்ட உத்திகளை வகுத்திட வேண்டும்.
(மார்ச் 23, 2022)
நன்றி: பீப்பிள்ஸ் டெமாக்ரசி
No Comments
இரண்டு வயது குழந்தைக்குத் தாயான இருபது வயது பெண் ஒருவர் மீது நடத்தப்பட்ட காட்டுமிராண்டித்தனமான அந்த வன்முறை – தில்லியில் அந்த இளம்பெண் சந்தித்த சித்திரவதை வீடியோ அதிகமாகப் பகிரப்பட்டதை அடுத்து பரவலான கோபத்தை மக்களிடம் ஏற்படுத்தியுள்ளது. தன்னுடைய வீட்டிலிருந்த அந்தப் பெண்ணிடமிருந்த குழந்தையைப் பறித்துக் கொண்ட பிறகு அவர் கடத்தப்பட்டு வலுக்கட்டாயமாக வேறு பகுதிக்கு அழைத்துச் செல்லப்பட்டார் என்று ஊடகங்களில் வெளியாகியுள்ள முதல் தகவல் அறிக்கையில் குறிப்பிடப்பட்டுள்ளது. மேலும் பாலியல் பலாத்காரத்திற்கு உள்ளாக்கப்பட்டு, கொடூரமான முறையில் தாக்கப்பட்டதுடன் மொட்டை அடித்து, முகத்தில் கருப்பு சாயம் பூசப்பட்டு, கழுத்தில் காலணிகளை மாலையாக அணிவித்து அவமானப்படுத்தப்பட்டு அந்தப் பெண் கேலி செய்யப்பட்டார் எனவும், அந்தப் பகுதியில் இருந்த தெருக்களில் அவர் இழுத்துச் செல்லப்பட்டதாகவும் அந்த அறிக்கையில் கூறப்பட்டிருந்தது.
வெளியான அந்த வீடியோ அந்தப் பெண் எதிர்கொண்ட வன்முறையின் ஒரு பகுதியை மட்டுமே நமக்குக் காட்டியுள்ளது. அந்தப் பெண்ணைத் தள்ளும் போதும், தலையைப் பிடித்து இழுத்து அறையும் போதும் கைதட்டி கேலி செய்கின்ற ஆண்களும், பெண்களும், குழந்தைகளும் அவரைச் சூழ்ந்து நிற்பதைக் காண முடிகிறது. மற்றொரு வீடியோ இளைஞன் ஒருவன் அந்தப் பெண்ணைத் தரையில் தள்ளி உதைப்பதையும், கொடூரமாக பெல்ட்டால் அடிப்பதையும் காட்டுவதாக இருக்கிறது. அது உண்மையில் மிகவும் பயங்கரமானது. இந்த நிகழ்வுகள் அனைத்துமே பட்டப்பகலில் நடந்தவையாகும். அந்தக் கொடுமை ஏறத்தாழ ஒரு மணி நேரத்திற்கும் மேலாக நீடித்திருக்கிறது. இவ்வாறு மிகவும் மோசமாக அந்தப் பெண் தாக்கப்பட்டு இழுத்துச் செல்லப்பட்டது எங்கோ ஒரு தொலைதூரக் கிராமத்தில் நடந்திருக்கவில்லை. இந்தியத் தலைநகரின் கிழக்கு பகுதியில் எப்போதும் பரபரப்பாக உள்ள ஒரு பகுதியிலேயே அந்த நிகழ்வு நடந்தேறி இருக்கிறது.
கடந்த ஆண்டு நவம்பர் மாதம் தற்கொலை செய்து கொண்ட இளைஞர் ஒருவரின் குடும்பத்தினரின் பழிவாங்கும் நடவடிக்கையாகவே அந்தப் பெண் மீது தாக்குதல் நடத்தப்பட்டது என்று தற்போது தெரிய வந்துள்ளது. அந்த இளைஞரின் மரணத்திற்கு இந்த இளம்பெண்தான் காரணம் என்று இளைஞரின் குடும்பத்தினர் குற்றம் சாட்டியிருந்தனர். அன்றிலிருந்தே அந்தக் குடும்பத்தினர் அந்தப் பெண்ணுக்கும், அவரது குடும்பத்தினருக்கும் தொடர்ந்து தொல்லை கொடுத்து வந்திருக்கின்றனர். அந்தப் பெண் வேலை செய்து வந்த கடைக்குச் சென்றும் அவர்கள் தகராறு செய்ததால் வேலையை விட்டு அந்தப் பெண் வெளியேற வேண்டியதாயிற்று. தொடர்ந்து விடுக்கப்பட்ட வன்முறை அச்சுறுத்தல் காரணமாக அவர் தனது கணவர், குழந்தையுடன் வீட்டை மாற்றிக் கொள்ள வேண்டியதாயிற்று. அவரின் தங்கையும் மிரட்டப்பட்டார். தில்லி காவல்துறையிடம் பலமுறை புகார் அளித்தும் எந்தவொரு நடவடிக்கையையும் யாரும் எடுக்கவே இல்லை.
அந்த வீடியோ வெளியான பிறகு, அந்தப் பெண்ணைத் தாக்கியவர்களை ‘விலங்குகள்’ என்று குறிப்பிட்ட தில்லி மகளிர் ஆணையத்தின் தலைவர் தாக்கியவர்கள் சட்டவிரோத மதுபான வியாபாரத்தில் ஈடுபட்டுள்ளனர் என்றும் அவர்கள் நன்கு அறியப்பட்ட குற்றவாளிகள் என்றும் தெரிவித்திருந்தார். அவர் காவல்துறை நடவடிக்கை எடுக்க வேண்டுமென்று அதற்கான கெடுவையும் விதித்தார். தேசிய மகளிர் ஆணையத்தின் முன்னாள் தலைவர் பெண்ணைத் தாக்கியவர்களை அசுரர்கள் என்று குறிப்பிட்டார். பாதிக்கப்பட்ட அந்தக் குடும்பத்தை நேரில் சென்று சந்தித்த பாஜக நாடாளுமன்ற உறுப்பினர் கெளதம் காம்பீர் குற்றவாளிகளை கொடூரமான மிருகங்கள், விலங்குகள் என்று குறிப்பிட்டதுடன் தில்லி குடிமக்களுக்கு நீதி வழங்கப்படும் என்றும் உறுதியளித்தார். சம்பவம் நடந்து நான்கு நாட்களுக்குப் பிறகு, ஏழு பெண்கள் உட்பட ஒன்பது பேர் கைது செய்யப்பட்டுள்ளனர். இப்போது அந்த மிருகங்களும், அசுரர்களும் சிறைக்குள் அடைக்கப்பட்டு விட்டதால், அந்த விஷயம் அத்துடன் முடிந்து விட்டதா என்ன?
நீதிக்காகவும், பெண்களுக்கு எதிரான குற்றங்களைத் தடுப்பதற்காகவும் போராடிக் கொண்டிருப்பவர்கள் நன்கு அறிந்தவையாகவே இதுபோன்று எழுகின்ற கேள்விகள் இருக்கின்றன. அந்தப் பெண்ணின் மீதான தாக்குதலுக்கு ஒரு வாரத்திற்கு முன்பாக அவருடைய தங்கையால் அளிக்கப்பட்ட புகாரின் மீது தில்லி காவல்துறை ஏன் எந்தவொரு நடவடிக்கையும் எடுக்கவில்லை? உரிய நேரத்தில் காவல்துறையினர் நடவடிக்கை எடுத்திருப்பார்கள் என்றால் நிச்சயம் அந்த இளம்பெண்ணைக் காப்பாற்றியிருக்க முடியும்.
காவல்துறையினர் யாருமே இல்லாத நிலையில் ஏராளமான மக்கள் பார்த்துக் கொண்டிருக்கும் போது பொது இடத்தில் வைத்து இளம்பெண் ஒருவரை அடித்து தாக்குகின்ற அளவிற்கான குற்றம் ஏன் நிகழ்ந்தது? பகிரங்கமாக தன்னை இழுத்துச் சென்ற அவர்கள் தன்னை ஓர் அறைக்குள் அடைத்து வைத்ததாகவும், அங்கே தான் மிகவும் கொடூரமாகத் தாக்கப்பட்டதாகவும் பாதிக்கப்பட்ட அந்தப் பெண் கூறியுள்ளார். காவல்துறை சரியான நேரத்தில் வந்திருந்தால், நடத்தப்பட்ட வன்முறையின் ஒரு பகுதியிலிருந்தாவது அந்தப் பெண்ணைக் காப்பாற்றியிருக்க முடியும். இந்த வழக்கில் காவல்துறையின் பங்கு – பல வழக்குகளைப் போலவே – நம்மைப் புண்படுத்துவதாகவே இருக்கிறது. ஆனாலும் காவல்துறையின் உடந்தை அல்லது அதன் கடமை தவறிய செயல் குறித்து எந்தவொரு விசாரணையும் நடத்தப்படவில்லை. மற்றொரு அதிர்ச்சிகரமான, கொடூரமான உண்மை என்னவென்றால், ஒருவேளை அந்த வீடியோ பகிரங்கப்படுத்தப்பட்டிருக்கவில்லை என்றால் அந்த வன்முறையில் ஈடுபட்டவர்களால் அந்தக் குற்றத்திலிருந்து எளிதாகத் தப்பியிருக்கவும் முடியும். இந்த வழக்கில், இதுபோன்ற பலவற்றில் ஏற்கனவே நிரூபிக்கப்பட்டுள்ளவாறு, பாதிக்கப்பட்டவர் மீதான தங்கள் அதிகாரத்தின் நீட்டிப்பை உறுதிப்படுத்திக் கொள்ளும் வகையில் அந்த வீடியோ வன்முறையை நிகழ்த்தியவர்களாலேயே படமாக்கப்பட்டிருக்கலாம்.
அந்தப் பெண் தாக்கப்பட்ட போது அங்கே பார்வையாளர்களாக நின்றவர்கள் அனைவரும் அந்த நிகழ்விற்குப் பொறுப்பானவர்கள் இல்லையா? சதி வழிபாட்டிற்கு எதிரான சட்டம் 1987ஆம் ஆண்டு இயற்றப்பட்ட நேரத்தில், சதியின் பெயரால் கொலை நடப்பதற்கு அனுமதிக்கின்ற பார்வையாளர்களிடம் இருக்க வேண்டிய பொறுப்பு பற்றி சமூக ஆர்வலர்களிடையே விவாதம் எழுந்தது. அந்தக் கொலை நடக்கப் போகிறது என்று தெரிந்திருந்தால், அத்தகைய குற்றத்தைத் தடுக்க வேண்டிய சட்டப்பூர்வமான கடமை குடிமக்களுக்கு இருக்க வேண்டும் என்றே அப்போது ஏற்றுக் கொள்ளப்பட்டது. ‘அதிகாரிகள் மட்டுமின்றி, அத்தகைய பகுதியில் வசிப்பவர்கள், தங்களுடைய பகுதியில் சதி நடக்கவிருக்கிறதா, அல்லது சதி நடத்தப்பட்டுள்ளது என்று நம்புவதற்கு காரணம் என்று ஏதாவது இருந்தால் அல்லது அது குறித்து அறிந்திருந்தால், உடனடியாக அருகில் உள்ள காவல் நிலையத்தில் அந்த உண்மையைத் தெரிவிக்க வேண்டும். அவ்வாறு செய்யாவிட்டால், அவர்கள் அபராதம் அல்லது இரண்டு ஆண்டுகள் வரை சிறைத்தண்டனையைச் சந்திக்க நேரிடும்’ என்ற சட்டப்பிரிவு சேர்க்கப்பட்டது.
‘கௌரவம்’ என்ற பெயரிலே நடத்தப்படுகின்ற குற்றங்களுக்கு எதிரான சட்டத்திற்காக நடந்த போராட்டத்தின் போது, அப்போதைய தேசிய மகளிர் ஆணையம், பெண் ஆர்வலர்களுடன் இணைந்து தயாரித்த வரைவறிக்கையில் நடத்தப்பட்ட ‘கௌரவக் கொலை’ பற்றி புகாரளிக்காதவர்களுக்கு அபராதம் விதிக்கப்படும் என்று குறிப்பிடப்பட்டிருந்தது. இன்னும் அந்த சட்ட வரைவு நிலுவையிலே இருந்து வருகிறது. பெண்களுக்கு எதிரான குற்றங்களைத் தடுக்க வேண்டிய சந்தர்ப்பங்களில் குடிமக்களின் பொறுப்பு மிகவும் முக்கியமானது. இந்த ஷாஹ்தாரா வழக்கிலும் பாதிக்கப்பட்ட பெண்ணின் தங்கை மட்டுமே காவல்துறையினரைத் தொடர்ந்து அழைத்து தனது சகோதரியைக் காப்பாற்றியிருந்தார்.
இந்தச் சம்பவம் மற்றொரு உண்மை முற்றிலுமாகப் புறக்கணிப்படுவதை எடுத்துக் காட்டுவதாகவும் இருக்கிறது. பசுவதைத் தடுப்பு என்ற பெயரில், ‘லவ் ஜிஹாத்’ என்ற பெயரில் அல்லது தாடி வளர்ப்பதற்கு, வெள்ளைத் தொப்பி அணிவதற்கு எதிராக செயல்பட்டு வருகின்ற கும்பல்கள், பொதுவெளியில் கொலைகளை நடத்துபவர்கள், அவமானப்படுத்துபவர்கள், அடித்து உதைப்பவர்கள் எல்லாம் கொடூரமான மிருகங்கள், விலங்குகளாக இருக்க மாட்டார்களா? இதுபோன்ற குற்றச்செயல்களுக்கு ஆதரவையும் பாதுகாப்பையும் வழங்கி, கும்பல் படுகொலை போன்ற குற்றச் செயல்களை ஊக்குவித்து வருகின்ற அரசியல் தலைவர்களை கௌதம் காம்பீர் எவ்வாறாக விவரிப்பார்? ஷாஹ்தாராவில் இழைக்கப்பட்டுள்ள குற்றத்தின் மீது நமது வேதனையையும், கோபத்தையும், அச்சத்தையும் வெளிப்படுத்துகின்ற அதே வேளையில் இதுபோன்ற குற்றங்கள் அதிகாரப் பதவிகளில் அமர்ந்துள்ள தலைவர்களால் ஊக்குவிக்கப்பட்டு வருகின்ற கொடூரமான, ரத்தத்தில் தோய்ந்துள்ள கும்பல் படுகொலைக் கலாச்சாரத்தின் மூலம் மிகவும் சாதாரணமாக்கப்பட்டதன் விளைவு என்பதை நாம் ஒருபோதும் மறந்து விடக் கூடாது.
இந்திய தலைநகரில் பொதுவெளியில் இளம்பெண் அடித்து தாக்கப்பட்ட அந்தச் சம்பவம், மிகவும் மோசமான தற்செயலான நிகழ்வாக இந்திய குடியரசு தினத்தன்று நிகழ்ந்துள்ளது. நடைபெற்றுள்ள அந்தச் சம்பவம் தங்கள் எதிரிகளிடமும் பொறுப்புள்ளவர்களாக நடந்து கொள்கின்ற குடிமக்களை உருவாக்கத் தேவையான விழுமியங்களை மேம்படுத்துவதில் இருந்து விலகிப் பயணித்திருக்கும் நமது அரசியல், சமூக செயல்பாடுகளின் அடையாளமாக இருக்கிறதா?
https://www.ndtv.com/opinion/the-filmed-assault-and-lynching-of-a-young-mother-in-delhi-2741335
நன்றி: என் டிடிவி
தமிழில்: தா.சந்திரகுரு
No Comments
[2021ஆம் ஆண்டு முழுவதும் துன்பங்களே நிறைந்திருந்தாலும், வெற்றிக் களிப்பைக் கொண்டாடும் விதத்தில் முடிவுற்றுள்ளது.]
விடைபெற்றுக்கொண்டிருக்கும் 2021ஆம் ஆண்டு முழுவதும் துன்பங்கள் நிறைந்த ஆண்டாக இருந்தபோதிலும், மக்களுக்கு வெற்றிக்களிப்பை அளிக்கும் விதத்தில் முடிவுக்கு வந்தது.
கோவிட்-19 கொரோனா வைரஸ் தொற்றின் இரண்டாவது அலை மார்ச் – மே மாதங்களுக்கிடையே மக்களை நாசப்படுத்தியது. மோடியும் அவருடைய அரசாங்கமும் கொரோனா வைரஸ் தொற்றை வென்று விட்டோம் என்று தம்பட்டம் அடித்தபோதிலும், இவ்வாறு கொரோனா வைரஸ் தொற்றின் இரண்டாவது அலை மக்களைத் தாக்கியபோது அதனை எதிர்கொள்ள நாடு தயாராக இல்லை. இதன் விளைவாக, பல்லாயிரக்கணக்கானோர் மடிந்தனர். இவற்றில் பல பதிவு செய்யப்படவேயில்லை. ஆக்சிஜன் கிடைக்காமல் நோயாளிகள் மூச்சுத்திணறி இறந்த கொடுமையையும், ஏராளமான சடலங்கள் கங்கையில் மிதந்து சென்றதையும் உலகம் முழுதும் ஊடகங்களால் எடுத்துச்செல்லப்பட்டு நம் நாட்டின் அவலநிலையை உலகுக்குப் பறைசாற்றின. இவ்வளவு மோசமாக நாட்டு மக்களை நாசப்படுத்தியிருந்தபோதிலும்கூட இதற்காகப் பிரதமர் கிஞ்சிற்றும் கவலைப்பட்டதாகத் தெரியவில்லை.
இதேபோன்றுதான் தடுப்பூசிகள் சம்பந்தமாக, அவற்றைப் போதுமான அளவிற்குக் காலத்தில் கொள்முதல் செய்ததிலோ, நாட்டிற்குள்ளேயே உற்பத்தியை அதிகரிப்பது தொடர்பாகவோ மற்றும் விரைவாக அவற்றை மக்களுக்கு விநியோகிப்பதிலோ ஏராளமான அளவில் குளறுபடிகள் செய்ததையும் பார்த்தோம். நாட்டில் முதன்முதலாக அனைவருக்கும் இலவசமாகத் தடுப்பூசிகள் செலுத்தப்படுவதற்குப் பதிலாக, அதற்கும் விலை வைத்து விநியோகிக்கும் முறையை அறிமுகப்படுத்தினார்கள். ஒன்றிய அரசாங்கம், உச்சநீதிமன்றத்தில், டிசம்பர் 31க்குள் (18 வயதுக்கு மேற்பட்ட) வயது வந்த அனைவருக்கும் இரு முறை தடுப்பூசிகள் (two doses of vaccines) முழுமையாகச் செலுத்தப்படும் என்று கூறியது. இது சாத்தியமில்லை என்பது அனைவரும் அறிவோம். டிசம்பர் இறுதிக்குள், நாட்டிலுள்ள வயது வந்தவர்களில் 65 சதவீதத்தினருக்கும் குறைவானவர்களுக்கே முழுமையாக தடுப்பூசிகள் செலுத்தப்பட்டிருக்கின்றன. இதன்மூலம் 35 சதவீதத்தினர் தடுப்பூசி முழுமையாகச் செலுத்தப்படாது விடப்பட்டுள்ளனர். நாட்டை விழுங்கப் போவதாக ஓமிக்ரான் வைரஸ் தொற்று அச்சுறுத்திக்கொண்டிருக்கும் நிலையில் நாட்டில் இத்தகைய அவலநிலை நீடிக்கிறது.
மோடி அரசாங்கம், கோவிட்-19 பெருந்தொற்றை எதிர்கொள்வதற்குத் தேவையான அளவிற்குத் தடுப்பூசிகளைத் தயாரித்து, மக்களுக்குச் செலுத்துவதற்கான, திட்டமிடுதலிலும், தயாரிப்பு வேலைகளிலும், அவற்றை வெற்றிகரமாக எதிர்கொள்ளும்விதத்தில் சுகாதாரப் பாதுகாப்பு அமைப்பைப் பலப்படுத்துவதிலும் மோசமான முறையில் படுதோல்வி அடைந்தது மட்டுமல்ல, இவ்வாறு நாட்டில் நிலைமைகள் மோசமாக இருக்கும் காலத்தை, தன்னுடைய பிளவுவாத மதவெறி மற்றும் கார்ப்பரேட் ஆதரவு நிகழ்ச்சிநிரலை உந்தித்தள்ளவும் பயன்படுத்திக்கொண்டது.
ஒன்றிய அரசின் பட்ஜெட்டில் பொதுத்துறை நிறுவனங்கள் சுமார் 1.75 லட்சம் கோடி ரூபாய் அளவிற்கு தனியாருக்குத் தாரை வார்க்க இலக்கு அறிவிக்கப்பட்டதையும் பார்த்தோம். இதனைத்தொடர்ந்து பொதுத்துறை நிறுவனங்களின் சொத்துக்களை விற்று பணமாக்கும் திட்டமும் (monetization of the public sector assets) அறிவிக்கப்பட்டதைப் பார்த்தோம். இவ்வாறு சொத்துக்களை விற்று சுமார் ஆறு லட்சம் கோடி ரூபாய் திரட்டப்போகிறார்கள். இது, நாட்டின் துறைமுகங்கள், விமானத் தளங்கள், ரயில்வே பாதைகள், நிலம் மற்றும் சொத்துக்களை குத்தகைக்கு விடுகிறோம் என்ற பெயரில் தனியாருக்குத் தாரைவார்க்கும் செயலே தவிர வேறல்ல.
பொதுத்துறை வங்கிகளில் கார்ப்பரேட்டுகள் வாங்கிய கடன்கள் தள்ளுபடி செய்யப்படுவது தொடர்கிறது. நிதித்துறையில் பொதுத்துறை வங்கிகளில் இரண்டு தனியாரிடம் தாரை வார்க்கப்பட இருக்கிறது. ஆயுள் இன்சூரன்ஸ் கழகத்தின் பங்குகளைத் தனியாருக்குத் தாரை வார்த்திடவும் முடிவு செய்திருக்கிறார்கள்.
மோடி அரசாங்கம் அம்பானிக்கும், அதானிக்கும் அப்பட்டமான முறையில் சலுகைகள் அளித்ததன் மூலம், அவர்கள் கொரோனா வைரஸ் பெருந்தொற்றுக் காலத்தில்கூட மக்களிடம் மிகவும் அசிங்கமானமுறையில் கொள்ளை லாபம் அடித்ததைக் காட்டின. அம்பானியின் நிகர சொத்தின் மதிப்பு 2021இல் 92.7 பில்லியன் டாலர்கள் அளவிற்கு உயர்ந்தது. அதானியின் சொத்து மதிப்பு 78.7 பில்லியன் டாலர்கள் அளவுக்கு உயர்ந்தது.
மக்களைப் பொறுத்தவரை அவர்கள் மீது மேலும் மேலும் சுமைகள் ஏற்றப்பட்டன. மிகவும் அதிகமான அளவில் நாசத்தை ஏற்படுத்திய கோவிட் தொற்றின் இரண்டாவது அலை உச்சத்தில் இருந்த சமயத்தில், அதிகரித்த வேலையில்லாத் திண்டாட்டமும், விலைவாசி உயர்வும் மக்களுக்குச் சொல்லொண்ணா துன்பங்களை ஏற்படுத்தியது. பெட்ரோல் மற்றும் டீசலின் விலைத் தொடர்ந்து ஏற்றிக்கொண்டே இருந்ததன் விளைவாக பணவீக்கம் அதிகரித்து மக்கள் வாங்கிவந்த சொற்ப வருமானங்களும் சரிந்து, பல லட்சக்கணக்கான மக்களை வறுமைக்குழிக்குள் தள்ளியது. மக்களை வறுமைக்குழிக்குள் தள்ளிய மற்றொரு காரணி, வேலைவாய்ப்பு சுருங்கியதால் வருமானங்கள் இழப்பு ஏற்பட்டதுமாகும். 2020-21 கொரோனா வைரஸ் பெருந்தொற்றுக் காலத்தில் கூடுதலாக வறுமைக் குழிக்குள் தள்ளப்பட்ட மக்களின் எண்ணிக்கை சுமார் 7 முதல் 8 கோடி இருக்கும் என்று மதிப்பிடப்பட்டிருக்கிறது.
ஒன்றிய அரசு, ஆர்எஸ்எஸ்-இன் இந்துத்துவா நிகழ்ச்சிநிரலை வெறித்தனமாகப் பின்பற்றிக் கொண்டிருக்கிறது. ஜம்மு-காஷ்மீர் மாநிலத்தின் சிறப்பு அந்தஸ்தைப் பறித்தபின், அதன் அடையாளத்தையே சமூக ரீதியாகவும், அரசியல் ரீதியாகவும் மாற்றுவதற்கான வேலைகளில் ஈடுபட்டிருக்கிறது. ஜம்மு-காஷ்மீரில் காஷ்மீர் பள்ளத்தாக்கின் அந்தஸ்தைக் குறைக்கும் விதத்தில் அதன் சட்டமன்ற இடங்களும் சட்டமன்ற இடங்களுக்கான மறுசீரமைப்பில் செய்யப்பட்டுக் கொண்டிருக்கிறது. சட்டமன்ற இடங்கள் இவ்வாறு மறுசீரமைக்கப்பட்டு குறைக்கப்படுவது, அதன் பின்னர் தேர்தல்கள் நடத்துவது, அதன்பின்புதான் மாநில அந்தஸ்து என்னும் வரிசைக்கிரமம் அமித் ஷாவால் ஏற்படுத்தப்பட்டிருக்கிறது. அதே சமயத்தில், அங்கே மக்கள் மீதான ஒடுக்குமுறையைக் கைவிடுவதற்கான எண்ணமோ, அவர்களின் குடிமை உரிமைகளைப் பறித்திருப்பதை மீளவும் அளிப்பதற்கான எண்ணமோ இருப்பதாகத் தெரியவில்லை.
பாதுகாப்புப் படையினர் காஷ்மீரில் ஆட்சி செய்வதைப்போலவே, இப்போது வட கிழக்கு மாநிலங்களிலும் ஆட்சி செய்யத் தொடங்கியிருக்கின்றனர். நாகாலாந்து மாநிலத்தில் ராணுவத்தினரால் 13 அப்பாவி பொதுமக்கள் கொல்லப்பட்டிருப்பது, அங்கே ராணுவத்தின் ஆட்சி தொடர்வதற்காகவே வந்திருக்கிறது என்பதற்கான கடுமையான நினைவூட்டலாகும்.
இந்துத்துவா ஆட்சியாளர்களுக்கு, ஒரு வலுவான ராணுவ அரசை நிறுவுவது அவசியமாகும். அப்போதுதான் அவர்களால் அந்நிய மற்றும் உள்நாட்டு எதிரிகளுடன் (external and internal enemies) போராட முடியும். உள்நாட்டில் அவர்கள் எதிரிகள் என்று கருதுவது முஸ்லீம்களைத்தான் என்பது தெளிவு. முஸ்லீம்களுக்கு எதிராக, வெறுப்பை உமிழ்ந்திடும் உரைகள், சமூக ஊடகங்களில் பிரச்சாரங்கள், சிறுபான்மையினரைக் குறி வைத்து பாஜக தலைவர்கள் குரைத்தல் திட்டமிட்டு படிப்படியாக அதிகரித்துக் கொண்டிருக்கின்றன. இவற்றின்காரணமாக பாஜக ஆளும் மாநில அரசாங்கங்கள் சிறுபான்மையினருக்கு எதிராகத் தொடர்ந்த பல சட்டங்களை நிறைவேற்றியிருக்கின்றன.
உத்தரப்பிரதேசத்திலும், மத்தியப் பிரதேசத்திலும் சமீபத்தில் கர்நாடகாவிலும் கட்டாய மதமாற்றத் தடைச்சட்டங்கள் நிறைவேற்றப்பட்டிருக்கின்றன. உத்தரப்பிரதேசத்திலும், மத்தியப் பிரதேசத்தில் நிறைவேற்றப்பட்டுள்ள சட்டங்களில் ‘புனித ஜிகாத்’ (‘love jihad’)எனக் குற்றஞ்சாட்டி, மதக் கலப்புத் திருமணங்கள் செய்துகொள்ளும் முஸ்லீம் இளைஞர்கள் கைது செய்யப்பட்டிருக்கின்றனர். கர்நாடகாவில், கிறிஸ்தவர்கள் மீது கவனம் திருப்பப்பட்டிருக்கிறது.
மதவெறியர்களால் முஸ்லீம்கள் மற்றும் அவர்களுடைய வாழ்வாதாரங்கள்மீது தொடர்ந்து தாக்குதல்கள் தொடுக்கப்பட்டு வந்தநிலையில், தற்போது இந்த ஆண்டில் கிறித்தவர்கள் மீதும் அவர்களுடைய தேவாலயங்கள் மீதும் தாக்குதல்கள் கூர்மையானமுறையில் அதிகரித்திருப்பதையும் பார்க்க முடிந்தது. இத்தகைய தாக்குதல்கள் கிறிஸ்துமஸ் அன்றும் நடந்திருக்கிறது. வெளிநாட்டு நிதி உதவி ஒழுங்குமுறைச் சட்டத்தின்கீழ் அனுமதி வாங்கி நிதி வசூல் செய்துவந்த அன்னை தெரசா கருணை இல்லங்களுக்குக்கூட அவ்வாறு அளிக்கப்பட்ட அனுமதி மறுக்கப்பட்டது.
மொத்தத்தில், இந்த ஆண்டு, ஒன்றிய அரசாங்கத்தால் கோவிட் பெருந்தொற்று மிக மோசமானமுறையில் கையாளப்பட்டதையும், வேலையில்லாத் திண்டாட்டம் மற்றும் விலைவாசி உயர்வால் மக்கள்மீதான சுமைகள் ஏற்றப்பட்டிருப்பதையும், சிறுபான்மையினர் மீது அனைத்துப் பக்கங்களிலிருந்தும் தாக்குதல்கள் தொடுக்கப்படுவதையும் பார்த்தது.
இவ்வாறு அடிமேல் அடிவாங்கிய மக்கள் இப்போது அவற்றை எதிர்த்துநின்று, திருப்பித் தாக்கத் தொடங்கியிருக்கிறார்கள். பாஜக, ஏப்ரலில் நடைபெற்ற ஐந்து சட்டமன்றத் தேர்தல்களில் மேற்கு வங்கம், தமிழ்நாடு, கேரளாவில் கடும் பின்னடைவுகளை எதிர்கொண்டது. அஸ்ஸாமில் மட்டும்தான் அது மிகவும் குறைவான பெரும்பான்மையுடன் ஆட்சி அதிகாரத்தைத் தக்க வைத்துக்கொள்ள முடிந்தது.
ஒன்றிய அரசின் நேரடிக் கட்டுப்பாட்டின்கீழ் நிர்வகிக்கப்படும் சண்டிகார் மாநகராட்சிக்கு, இந்த ஆண்டு நடந்த சமீபத்திய தேர்தலில், பாஜக தன்னுடைய பணபலத்தையும் அதிகாரபலத்தையும் இறக்கிவிட்டிருந்தபோதிலும், இந்துத்துவா அடிப்படையிலான மதவெறிப் பிரச்சாரத்தை முடுக்கிவிட்டபோதிலும், படுதோல்வி அடைந்தது. அங்கே, தனிப்பெரும் கட்சியாக மேலெழுந்துவந்துள்ள ஆம் ஆத்மி கட்சியிடம் மாநகராட்சியை இழந்தது.
மக்கள் மத்தியில் போராட்டங்களும், கிளர்ச்சிகளும் அதிகரித்துவரும் பின்னணியில் பாஜக இத்தகைய தேர்தல் தோல்விகளைச் சந்தித்தள்ளது. 2021ஆம் ஆண்டு முழுவதுமே விவசாயிகளின் வீரஞ்செறிந்த போராட்டத்தால் ஆதிக்கம் செலுத்தியது. விவசாயிகள் போராட்டம் இந்தியாவில் வெகுஜனப் போராட்டங்களின் வரலாற்றில் ஒரு புதிய அத்தியாயத்தைத் துவக்கி இருக்கிறது. தில்லியைச் சுற்றியுள்ள பகுதிகளில் ஓராண்டு காலத்திற்கும் பத்தாயிரத்திற்கும் மேற்பட்ட விவசாயிகள் எவ்விதத்தொய்வுமின்றிக் கிளர்ச்சிப் போராட்டங்களை நடத்தி வந்த பின்னர், மோடி அரசாங்கம் இறங்கிவந்து, மூன்று வேளாண் சட்டங்களையும் ரத்து செய்திருக்கிறது. விவசாயிகளின் உறுதியான ஒன்றுபட்ட போராட்டத்தின்முன்னே ஒன்றிய அரசாங்கத்தை சரணாகதி அடைய வைத்துள்ளது. இந்த வெற்றியானது உழைக்கும் மக்களுக்கு ஒரு தெளிவான செய்தியை அனுப்பியிருக்கிறது. அது என்னவென்றால், நீங்கள் ஒன்றுபட்டுப் போராடினால், வெற்றி பெறுவது திண்ணம் என்பதேயாகும்.
விவசாய இயக்கம், கூட்டு நடவடிக்கைகளின்போது, தொழிலாளர்கள்-விவசாயிகள் ஒற்றுமை வளர்ந்துகொண்டிருப்பதையும் பார்த்தது. இது எதிர்காலப் போராட்டங்களுக்கும், இந்துத்துவா-கார்ப்பரேட் ஆட்சியாளர்களுக்கு எதிரான போர்க்களத்திற்கும் அடிப்படையாக அமைந்திடும். புத்தாண்டு இத்தகைய நல்லதொரு அறிகுறியுடன் துவங்குகிறது.
(டிசம்பர் 29, 2021)
நன்றி:பீப்பிள்ஸ் டெமாக்ரசி
1
கர்நாடக சட்டமன்றத்தில் மத மாற்ற எதிர்ப்பு சட்டமுன்வடிவு நிறைவேற்றப்பட்டிருப்பது, மதச் சிறுபான்மையினர் உரிமைகள் மற்றும் மதச் சுதந்திரத்தின் மீது நேரடியாக ஏவப்பட்டுள்ள தாக்குதலாகும். இத்தகைய சட்டங்கள் பாஜக ஆளும் மாநிலங்களான உத்தர்காண்ட், உத்தரப் பிரதேசம், மத்தியப் பிரதேசம் மற்றும் முன்பு குஜராத் ஆகிய மாநிலங்களில் நிறைவேற்றப்பட்டிருக்கின்றன. இந்தச் சட்டத்திற்கு ‘மதச் சுதந்திரச் சட்டம்’ (‘Freedom of Religion Act’) எனப் பெயரிடப்பட்டிருந்தபோதிலும், இந்தச் சட்டங்கள் மூலமாக அரசமைப்புச்சட்டத்தின் 25ஆவது பிரிவின்கீழ் அளிக்கப்பட்டுள்ள அடிப்படை உரிமையின்கீழ், மதத்தின் அடிப்படையில் தொழில்புரிவதையோ, நடைமுறைப்படுத்துவதையோ, பிரச்சாரம் செய்வதையோ கட்டுப்படுத்திடும் விதத்தில் நேரெதிர் நடவடிக்கைகள் மேற்கொள்ளப்பட்டிருக்கின்றன.
‘கர்நாடகா மதச்சுதந்திர உரிமைப் பாதுகாப்புச் சட்டமுன்வடிவு’ (`Karnataka Protection of Right to Freedom of Religion Bill’), பாஜக அரசு ஆளும் மாநிலங்களில் இதுதொடர்பாக நிறைவேற்றப்பட்டுள்ள சட்டங்களை அப்படியே முன்மாதிரியாகக் கொண்டிருக்கிறது. நரேந்திர மோடி குஜராத் மாநிலத்தில் முதலமைச்சராக இருந்தபோது நிறைவேற்றப்பட்ட 2003 குஜராத் மதச் சுதந்திரச் சட்டம் (Gujarat Freedom of Religion Act, 2003), உண்மையில் மதக் கலப்புத் திருமணங்களின் பின்னால் ஒருவர் தன் மதத்திலிருந்து மற்றொரு இணையரின் மதத்திற்கு மாறுவதற்கான சுதந்திரத்தைத் தடை செய்து, பறித்துவிட்டது.
இப்போது கர்நாடகாவில் கொண்டுவரப்பட்டிருக்கும் சட்டமுன்வடிவானது, கட்டாய மதமாற்றத்திற்கு மூன்று முதல் ஐந்து ஆண்டுகள் வரை சிறைத் தண்டனை விதிக்க வகைசெய்கிறது. மேலும், இவ்வாறு கட்டாய மத மாற்றத்திற்கு உட்படும் நபர் இளையவராக (மைனராக), பெண்ணாக, அல்லது தலித்/பழங்குடியினத்தைச் சேர்ந்தவராக இருந்தால், மூன்று ஆண்டுகள் வரையிலான சிறைத்தண்டனை என்பது பத்து ஆண்டுகள் வரையிலான சிறைத்தண்டனை என்று மாற்றப்பட்டிருக்கிறது. இந்தச் சட்டமுன்வடிவானது, மாநிலத்தில் பல பகுதிகளில் கிறித்தவ தேவாலயங்கள் மீதும் அவர்கள் கூடும் இடங்களின்மீதும் விரிவான அளவில் தாக்குதல்கள் நடைபெற்றுவரும் பின்னணியில் கொண்டுவரப்பட்டிருக்கிறது.
மக்கள் சிவில் உரிமைகள் யூனியன், (PUCL- People’s Union of Civil Liberties) கர்நாடகாவில் கிறித்தவர்கள் மீதான வெறுப்புக் குற்றங்கள் தொடர்பாக வெளியிட்டுள்ள அறிக்கை, இந்த ஆண்டு ஜனவரியிலிருந்து நவம்பர் வரையிலும், கிறித்தவர்களின் தேவாலயங்கள் மற்றும் பிரார்த்தனை செய்யும் இடங்களில் 39 தாக்குதல்கள் நடைபெற்றுள்ளதாகக் கூறியிருக்கிறது. இந்தத் தாக்குதல்கள் அனைத்துமே, கட்டாய மதமாற்றத்திற்கு எதிராக மேற்கொள்ளப்பட்டதாக இதனை நடத்தியுள்ள ஆர்எஸ்எஸ் இயக்கத்தின் பல்வேறு அமைப்புகள் தெரிவித்திருக்கின்றன. எனினும் இவை அனைத்து வழக்குகளுமே பொய்யானவை என்றும் அந்த அறிக்கையில் குறிப்பிடப்பட்டிருக்கிறது. கர்நாடக மாநிலத்தின் மொத்த மக்கள்தொகையில் கிறித்தவர்கள் வெறும் 1.87 சதவீதத்தினரேயுள்ள நிலையில் சங்கிகளின் பிரச்சாரம் பொய்யும் புரட்டும் மிகுந்தவை என்பது புலனாகும். 2011 மக்கள்தொகைக் கணக்கெடுப்பின்போது கிறித்துவர்கள் மக்கள்தொகை மேலே குறிப்பிட்டதுபோன்று 1.87 சதவீதமாக இருந்த அதே சமயத்தில் 2001 மக்கள் தொகைக் கணக்கெடுப்பின்படி அது 1.9 சதவீதமாகும்.
அதாவது முன்பிருந்ததைவிட இப்போது குறைந்திருக்கிறது. இப்போது இந்தச்சட்டமுன்வடிவு நிறைவேற்றப்பட்டு, சட்டமானால், பின் கிறித்தவ மக்கள் மத்தியில் தொடர்ந்து அச்ச உணர்வு இருந்து கொண்டிருக்கும். கிறித்தவ தேவாலயங்களில் கட்டாய மதமாற்றம் நடைபெறுவதாக புகார்கள் அளிக்கப்பட்டு, அவற்றின்மீது நடவடிக்கைகள் எடுக்கப்பட்டு, இயல்பான மதஞ்சார்ந்த நடவடிக்கைகளுக்காக அவர்கள் தண்டிக்கப்படக் கூடும். இந்தச் சட்டமுன்வடிவானது, பாஜக ஆளும் மாநிலங்களில் கொண்டுவந்திருப்பதைப் போல, தலித்/பழங்குடியினர் கட்டாய மதமாற்றம் செய்யப்படுவதற்கு, கடும் தண்டனைகளை விதித்திருக்கிறது. ஏழைகளாக உள்ள தலித்துகளும் பழங்குடியினரும் மிக எளிதாக மத மாற்றத்திற்கு ஆளாகிவிடுகிறார்கள் என்று ஆர்எஸ்எஸ் பரிவாரங்கள் நீண்டகாலமாகக் கூறிவரும் கூற்று இவ்வாறு சட்டம் கொண்டுவந்திருப்பதில் பிரதிபலிக்கிறது. ஆர்எஸ்எஸ் இயக்கமானது, தலித்துகளும், பழங்குடியினரும் தங்கள் ஒடுக்குமுறை தன்மையிலிருந்து விடுபடுவதற்காகவும், கண்ணியத்தையும் சமூக அந்தஸ்தையும் பெறுவதற்காகவும் கிறித்தவத்திற்கோ அல்லது இஸ்லாமுக்கோ மாறுவதை எந்தக்காலத்திலும் ஏற்றுக்கொண்டதில்லை.
“கட்டாய மதமாற்றத்திற்கு” எதிரான பிரச்சாரம் என்பது ஆர்எஸ்எஸ் உருவான காலத்திலிருந்தே அதன் பிரதான நிகழ்ச்சிநிரலின் ஒரு பகுதியாகும். உண்மையில், விசுவ இந்து பரிஷத் அமைப்பு அமைக்கப்பட்டதே, இவ்வாறு மதம் மாறியவர்களை மீளவும் இந்து மதத்திற்குக் கொண்டு வருவதற்காகவே யாகும். ஆர்எஸ்எஸ் இயக்கமானது, 2014இல் மோடி அரசாங்கம் அமைக்கப்பட்டதிலிருந்தே, “தாய்வீட்டுக்குத் திரும்புவோம்” (“ghar wapsi”) என்கிற பிரச்சாரத்தைத் திட்டமிட்டு, நடத்திக்கொண்டு வந்திருக்கிறது. சமீபத்தில், ஆர்எஸ்எஸ் தலைவரான மோகன் பகவத், “வழிதவறிச் சென்ற எங்கள் சகோதரர்களை மீளவும் கொண்டு வருவதற்கான மார்க்கமே இது” என்று கூறி “தாய்வீட்டுக்குத் திரும்புவோம்” பிரச்சாரத்தை நியாயப்படுத்திப் பேசியிருக்கிறார். ஆர்எஸ்எஸ்-இன் தர்க்க நியாயத்தின்படி, “தாய்வீட்டுக்குத் திரும்புவோம்” என்பது ஒரு நபர் தன் சொந்த மதத்திற்குத் திரும்புவது என்பதேயாகும். அதனால்தான், 2018இல் நிறைவேற்றப்பட்ட உத்தர்காண்ட் மதச் சுதந்திரச் சட்டம் (Uttarakhand Freedom of Religion Act), “தாய்வீட்டுக்குத் திரும்புவோம்” திட்டத்தை, தங்கள் சொந்த மதத்திற்குத்திரும்புகிறார்கள் என்று கூறி, சட்டபூர்வமாக்கி இருக்கிறது.
கட்டாய மதமாற்றத்திற்கு எதிரான பிரச்சாரத்துடன் ‘புனித ஜிகாத்திற்கு’ (‘love jihad’) எதிரான பிரச்சாரத்தையும் சங்கிகள் இப்போது இணைத்துக்கொண்டு, இந்து-முஸ்லீம் மதத்தினருக்கிடையே நடைபெறும் திருமணங்களைத் தடை செய்து, முஸ்லீம் இளைஞர்களைத் தண்டித்திட நடவடிக்கைகள் எடுத்துக்கொண்டிருக்கிறார்கள். ‘புனித ஜிகாத்திற்கு’ எதிராக ஏற்கனவே உத்தரப்பிரதேச அரசும், மத்தியப் பிரதேச அரசும் சட்டங்கள் நிறைவேற்றியிருக்கின்றன.
இப்போது கர்நாடகாவில் கொண்டுவரப்பட்டுள்ள சட்டமும், மதக் கலப்புத் திருமணங்களை கிரிமினல் குற்றமாக்கி இருக்கிறது. இந்தச் சட்டமுன்வடிவானது, அவசரகதியில் கொண்டுவரப்பட்டு நிறைவேற்றப்பட்டிருக்கிறது. இது கர்நாடக மாநிலத்தில் உள்ள சட்டமன்ற மேலவைக்கு, நிறைவேற்றப்படுவதற்காக அனுப்பப்பட வேண்டும். அங்கே பாஜக-விற்கு பெரும்பான்மை இல்லை. அங்கே காங்கிரஸ் கட்சியும் மதச்சார்பற்ற ஜனதா தளமும் ஒன்றுபட்டு நின்று இதனை எதிர்த்தால், இதனைத் தோற்கடிக்க முடியும். படுபிற்போக்குத்தனமான இந்தச் சட்டமுன்வடிவு நிறைவேற்றப்படாமல் நிறுத்தப்பட்டாக வேண்டும்.
(டிசம்பர் 22, 2021)
நன்றி: பீப்பிள்ஸ் டெமாக்ரசி
No Comments
கேரளாவில் மக்களின் சமூக சேர்மானம் என்பது நிகரற்ற ஒன்றாகும். இங்கே மொத்த மக்கள் தொகையில் முஸ்லீம்களும், கிறித்தவர்களும் 45 சதவீதத்தினராகும். மேலும் கேரளாவில் மூன்று மதத்தினருக்கிடையேயான தொடர்புகள் மிகச் சிறந்தமுறையில் பின்னிப்பிணைந்து தனித்துவத்துடன் விளங்கிவருகிறது. அவர்கள் அனைவரும் பரஸ்பரம் நல்லிணக்கத்துடன் வாழ்ந்து வருகிறார்கள். இம்மூன்று மதத்தினரிடையேயும் உள்ள மக்கள் அனைவருமே தங்கள் மதங்களுக்கும் அப்பாற்பட்டு தங்கள் சமூக-கலாச்சாரப் பண்புக்கூறுகளில் அனைவரும் மலையாளி என்ற அடையாளத்துடன் வாழ்ந்து கொண்டிருக்கிறார்கள்.
இவ்வாறு கேரள மக்கள் மத்தியில் அனைத்து மதத்தினரும் சகோதரத்துத்துவத்துடன் வாழ்ந்து வருவதற்கு அரசியலில் ஏற்பட்டுள்ள ஒரு வலுவான மதச்சார்பின்மைப் பாரம்பர்யம் காரணமாகும். இத்தகையப் பாரம்பர்யத்தை உருவாக்கியதில் இடதுசாரிகள் மிகப்பெரிய அளவில் பங்களிப்பினைச் செய்திருக்கிறார்கள்.
சமீப காலங்களில், ஆர்எஸ்எஸ்/பாஜக மூலமாக இந்துத்துவா அமைப்புகள் கேரள மக்கள் மத்தியில் நிலவிவரும் இத்தகைய பரஸ்பர நல்லிணக்க சகோதரத்துவப் பிணைப்பைச் சீர்குலைத்திட தங்களால் முடிந்த வேலைகளைச் செய்து வருகின்றன. இந்தப் பின்னணியில்தான் பாலா பிஷப், கத்தோலிக்க தேவாலயங்களின் ஒரு பகுதியாக விளங்கும் சைரோ-மலபார் தேவாலயத்தைச் சேர்ந்த ஜோசப் கல்லரங்கத், ஆற்றிய உரையை ஒருவர் பார்த்திட வேண்டும். அவர் கோட்டயம் மாவட்டத்தில் ஒரு தேவாலயத்தில் உரையாற்றும்போது, முஸ்லீம் தீவிரவாத நபர்களால் மேற்கொள்ளப்படும் ‘ஜிகாத் காதல்’ (‘love jihad’) மற்றும் ‘ஜிகாத் போதை’ (‘narcotic jihad’) ஆகியவற்றுக்கு எதிராக எச்சரிக்கை விடுத்துள்ளார். ‘ஜிகாத் காதல்’ குறித்து கத்தோலிக்க தேவாலயங்கள் இதற்கு முன்பு பிரச்சனைகள் எழுப்பியுள்ள அதே சமயத்தில், ‘ஜிகாத் போதை’ அச்சுறுத்தல் என்று கூறியிருப்பது புதிய ஒன்றாகும்.
இவரது கூற்றின்படி, ஜிகாத்துகள் போதை மருந்துகளைப் பயன்படுத்தி, முஸ்லீம் அல்லாதவர்களை அழிக்கிறார்களாம். இத்தகைய அபாண்டமான குற்றச்சாட்டு, இயற்கையாகவே, கேரள சமூகத்தில் அச்சத்தையும், அவநம்பிக்கையையும் ஏற்படுத்தி இருக்கிறது.
நாட்டில் இதர பகுதிகளில் இயங்கிவருவதுபோல கேரளாவிலும் போதை மஃபியாக்கள் இயங்கி வருகிறார்கள். ஆனாலும் இந்த மஃபியாக்களை எந்தவொரு தீவிரவாத மதக் குழுவுடனும் பிணைத்துக் கூறுவது முற்றிலும் தவறான ஒன்றாகும். இத்தகைய தொடர்பு இருப்பதாக எந்தவித சாட்சியமும் இல்லை என்று முதலமைச்சர் பினராயி விஜயன் விளக்கமளிக்க வேண்டியிருந்தது. “எந்த மதமும் இத்தகைய போதை மருந்துகளைப் பயன்படுத்தவில்லை. அதன் நிறம் சமூக-விரோதம்.” என்று அவர் கூறியுள்ளார். “சமூக இழிவுகள் மீது மதச்சாயம் பூசப்படக் கூடாது” என்று அவர் மேலும் கூறியுள்ளார்.
இவ்வாறு அரசியல் வானில் “ஜிகாதிஸ்ட் சதி”யைத் தள்ளுபடி செய்ய நடவடிக்கைகள் எடுத்துக்கொண்டிருக்கும் அதேசமயத்தில், பாஜக, பிஷப்பின் பேச்சுக்கு ஆதரவு தெரிவித்திருப்பதுடன், ஜிகாதிஸ்டுகளின் நடவடிக்கைகளுக்கு எதிராக ஒன்றிய அரசு சட்டம் கொண்டுவர வேண்டும் என்று கூறியிருக்கிறது. பாஜக-வைப் பொறுத்தவரை, முஸ்லீம்களுக்கும் கிறித்துவர்களுக்கும் இடையே பிளவினை ஏற்படுத்திடவும், கேரளாவிலும் இஸ்லாமோஃபோபியா (Islamophobia) என்னும் முஸ்லீம்களுக்கு எதிராக மதவெறித் தீயை விசிறிவிட இவருடைய பேச்சு ஒரு நல்ல சந்தர்ப்பம் என்றும் கருதுவது போல் தோன்றுகிறது.
கேரளாவில், ‘ஜிகாத் காதல்’ (‘love jihad’)-ஐப் பொறுத்தவரை, சில ஆண்டுகளுக்கு முன்பு, ஒரு சங்கடமான நிகழ்வு நடைபெற்றது. 21 பேர் தங்கள் குடும்பங்களிலிருந்து வெளியேறி ஆப்கானிஸ்தானில் இயங்கிக்கொண்டிருந்த ஒரு பயங்கரவாத அமைப்பான ஐஎஸ்ஐஎஸ்-கோராசான் (ISIS-Khorasan) என்னும் அமைப்புடன் தங்களை இணைத்துக்கொள்வதற்காக, அங்கே சென்றனர். இவர்களின் மத்தியில் இரண்டு கிறித்தவப் பெண்களும் இருந்தனர். இவர்கள் அப்போதுதான் இஸ்லாம் மதத்திற்கு மாறியிருந்தனர். பின்னர் அவர்களின் கணவர்களுடன் ஆப்கானிஸ்தானத்திற்குச் சென்றனர். உண்மையில் இவர்களில் ஒருவர் ஒரு கிறித்தவரைத்தான் திருமணம் செய்து கொண்டிருந்தார். பின்னர் அவர்களிருவரும் இஸ்லாம் மதத்திற்கு மாறினார்கள். ஜிகாதிஸ்ட்டுகளின் வலைப்பின்னல் இவர்களைத் தேர்வு செய்தபின்னணியில் இவர்களுக்குத் தீவிரவாத சித்தாந்தத்தையும் போதித்தது.
இவ்வாறு இரு கிறித்தவப் பெண்கள் மதம் மாறியது தொடர்பாகவும், அவர்கள் தீவிரவாதத்தின் செல்வாக்கிற்குச் சென்றிருப்பது தொடர்பாகவும், கத்தோலிக்க தேவாலயம் கவலைப்பட்டதைப் புரிந்துகொள்ள முடிகிறது. தங்களுடைய பிரார்த்தனைக் கூட்டங்களில் இவ்வாறு தீவிரவாத செல்வாக்கிற்கு யாரும் இரையாகக்கூடாது என்று எச்சரிக்கை செய்வதும் சரியானதேயாகும். எனினும், இவையெல்லாம் தனிப்பட்ட நிகழ்வுகளேயாகும். மாநிலக் காவல்துறையினரும், தேசியக் குற்றப்புலனாய்வு முகமையும் இவை தொடர்பாக மேற்கொண்ட புலன் விசாரணைகளிலிருந்து முஸ்லீம் அல்லாத பெண்களைக் கவர்ந்திட ‘ஜிகாத் காதல்’ (‘love jihad’) போன்ற முயற்சிகள் திட்டமிட்டு எதுவும் நடைபெறவில்லை என்றே காட்டியிருக்கின்றன.
‘ஜிகாத் காதல்’ மீதான விவாதத்தில் பல்வேறு மதத் தலைவர்களும், சாதி அமைப்புகளின் தலைவர்களும் தங்கள் மத அடிப்படையிலும் சாதிய அடிப்படையிலும், ஆணாதிக்க மனப்பான்மையுடனும், பெண்களுக்குச் சொத்துரிமை இல்லை என்ற அடிப்படையிலும் பேசி வருவது இவ்விஷயத்தை மேலும் குழப்புகின்றன. காதல் மற்றும் திருமணம் போன்ற விஷயங்களில் பெண்களுக்கும் கருத்துக்கள் இருக்கும் என்றோ, அவர்கள் தாங்கள் விரும்பிய ஆடவரைத் தேர்ந்தெடுக்கலாம் என்றோ இவர்கள் மறைமுகமாக மறுக்கிறார்கள்.
ஆர்எஸ்எஸ்/பாஜக பரிவாரங்கள் முஸ்லீம்களுக்கு எதிராக மதவெறித் தீயை விசிறிவிடும் தங்கள் இழிநோக்கத்திற்காக, இத்தகைய கிறித்துவ மதவெறிப் பாதிரியார்களையும் தந்திரோபயத்துடன் அணி சேர்த்துக்கொள்ள முயற்சித்துக் கொண்டிருக்கிறார்கள். கேரளாவில் சென்ற சட்டமன்றத் தேர்தலுக்கு முன்பு பல்வேறு கிறித்தவ தேவாலயங்களின் தலைவர்களை, பிரதமர் மோடி சந்தித்ததை நாம் பார்த்தோம்.
கேரளாவில் கிறித்தவர்கள் மத்தியில் மிகப்பெரிய அளவில் இருக்கும் கத்தோலிக்க தேவாலயங்கள், ஆர்எஸ்எஸ்/பாஜக பரிவாரங்களின் உண்மையான சொரூபத்தை அறிந்துகொள்ள வேண்டும். மதச்சிறுபான்மையினருக்கு எதிராக-அவர்கள் முஸ்லீம்களாக இருந்தாலும் சரி, அல்லது கிறித்தவர்களாக இருந்தாலும் சரி, அவர்களுக்கு எதிராக மிகவும் மோசமான முறையில் இந்துத்துவா அமைப்புகள் தொடர்ந்து பிரச்சாரத்தை மேற்கொண்டு வருகின்றன. அவர்களுக்கு எதிராக விஷத்தைக் கக்கிக்கொண்டு வருகின்றன. ‘துன்புறுத்தல் நிவாரணம்’ (‘Persecution Relief’) என்ற அமைப்பின் அறிக்கையின்படி, 2016இலிருந்து 2019வரையிலும் நாடு முழுவதும் கிறித்தவர்களுக்கு எதிராகப் பதிவு செய்யப்பட்டுள்ள வெறுப்புக் குற்றங்கள் (hate crimes) 1,774 ஆகும். 2016இலிருநது கிறித்தவர்களுக்கு எதிராகப் பதிவு செய்யப்பட்டுள்ள வெறுப்புக் குற்றங்களின் எண்ணிக்கை 59.6 சதவீதம் அதிகரித்திருக்கிறது.
ஆர்எஸ்எஸ்/பாஜக பரிவாரங்கள் மதத்தின் அடிப்படையில் மக்களைப் பிரிப்பதற்கான நடவடிக்கைகளில் தொடர்ந்து ஈடுபட்டு வருகின்றன. ஆர்எஸ்எஸ் அமைப்பின்கீழ் இயங்கும் துணை அமைப்புகள் செப்டம்பர் 25 அன்று ‘மலபார் இந்துக்கள் படுகொலை செய்யப்பட்ட தினம்’ (‘Malabar Hindu Genocide Day’) அனுசரித்துக் கொண்டிருக்கிறது. 1921இல் நடைபெற்ற ‘மாப்ளா கலகம்’ (‘Malabar rebellion’) என்பதைத்தான் இவ்வாறு இவர்கள் திரித்து அனுசரித்துக் கொண்டிருக்கிறார்கள். மாப்ளா கலகம் என்பது பிரிட்டிஷ் ஆட்சியாளர்களுக்கு எதிராகவும் நிலப்பிரபுத்துவ அமைப்பு முறைக்கு எதிராகவும் நடைபெற்றதாகும். பிரிட்டிஷ் ராணுவத்தினரால் அந்தக் கலகத்தில் ஈடுபட்ட முஸ்லீம்கள் மிகவும் கொடூரமான முறையில் நசுக்கப்பட்டு, ஒடுக்கப்பட்டார்கள். அதுதான் அந்தக் கலகத்தின் பிரதானமான அம்சமாகும். அக்கலகத்தின் கடைசிக் கட்டத்தில் இந்துக்கள் மீதும் சில தாக்குதல்கள் நடந்தன. ஆயினும் பிரதானமாக மிக அதிக அளவில் ஒடுக்கப்பட்டவர்கள் முஸ்லீம்களாகும்.
ஆர்எஸ்எஸ், தற்போது கேரளாவில் உள்ள கிறித்துவர்களுக்கு இரக்கம் காட்டத் தொடங்கியிருப்பதைத் தொடர்ந்து, இப்போது ‘மாப்ளா கலக’த்தை, இந்துக்களுக்கு எதிரானதாக மட்டுமல்ல, கிறித்தவர்களுக்கு எதிரானதாகவும் காட்டத் தொடங்கியிருக்கிறார்கள்.
கத்தோலிக்க தேவாலயங்களுக்குள்ளும் பல்வேறு மட்டங்களில் செயல்பட்டுவரும் பாதிரியார்களும் மற்றும் இதர பிரிவு கிறித்தவ அமைப்புகளும் இந்தத்துவா சக்திகளால் கட்டவிழ்த்துவிடப்படும் இஸ்லாமோபோபியா (Islamophobia)-வின் ஆபத்துக்களையும், மக்களை மதவெறி அடிப்படையில் பிளவுபடுத்த மேற்கொள்ளப்பட்டுள்ள நடவடிக்கைகளையும் சுட்டிக்காட்டி மக்களுக்கு எச்சரிக்கை விடுத்திருப்பது மகிழ்ச்சி அளிக்கிறது. இவ்வாறு எச்சரித்திருப்பவர்களில் முதலாவதாக யுஹனான் மோர் மெலெடியஸ் (Yuhanon Mor Meletius) என்னும் மாலங்காரா ஆர்தோடாக்ஸ் சிரியன் சர்ச்சின் திருச்சூர் மறைமாவட்டத்தின் பாதிரியார் (metropolitan) வருகிறார். அவர், “மதச்சிறுபான்மையினருக்கு இடையே பிளவினை ஏற்படுத்திட சங் பரிவாரங்கள் மேற்கொண்டுள்ள சூழ்ச்சிகளுக்கு தேவாலயங்களில் உள்ள தலைவர்கள் இரையாவதற்கான சாத்தியக்கூறுகளுக்கு எதிராக” எச்சரித்திருக்கிறார்.
இந்துத்துவாவாதிகள் அள்ளித்தெளித்திடும் பெரும்பான்மை மதவெறியின் ஆபத்துக்களை கேரளாவில் உள்ள மார்க்சிஸ்ட் கம்யூனிஸ்ட் கட்சி தெளிவாகவே புரிந்துகொண்டிருக்கிறது. அதனால்தான் அது ஆர்எஸ்எஸ்/பாஜக பரிவாரங்களை அரசியல் ரீதியாகவும், தத்துவார்த்த ரீதியாகவும் எதிர்த்து முறியடித்திட அனைத்து மதச்சார்பற்ற மற்றும் ஜனநாயக சக்திகளையும் அணிதிரட்டும் நடவடிக்கைகளில் இறங்கியிருக்கிறது. அவ்வாறு நடவடிக்கைகளில் இறங்கும்போது, முஸ்லீம்களுக்கு மத்தியில் செயல்பட்டுவரும் தீவிரவாதக் குழுக்கள் மற்றும் அவற்றின் சித்தாந்தங்களால் ஏற்படும் அச்சுறுத்தலையும் கட்சி நன்கு அறிந்திருக்கிறது. இக்குழுக்களில் சில வெளிநாடுகளில் இயங்கிவரும் இஸ்லாமியத் தீவிரவாத அமைப்புகளால் உருவாக்கப் பட்டவைகளாகும்.
கிறித்துவர்கள் மத்தியிலும் தீவிரவாதக் கருத்துக்கள் சில இடங்களில் காணப்படுகின்றன. ஆயினும் இவை மிகவும் சிறிய அளவிலானதாகும். மதவெறியர்களின் பிரச்சாரம் அதிகரித்துக்கொண்டிருக்கக்கூடிய சூழ்நிலையில், சமூகத்தில் சமூக-பொருளாதாரப் பிரச்சனைகளிலிருந்து எழும் பாதுகாப்பின்மையும் அதிகரித்துக்கொண்டிருக்கக்கூடிய சூழ்நிலையில், மக்கள் மத்தியில் நிலவும் மதச்சார்பின்மை மாண்பை சீர்குலைத்திடுவதற்கும், பல்வேறு மதத்தினருக்கிடையே பதற்றத்தை அதிகப்படுத்துவதற்கும் தொடர்ந்து முயற்சிகள் மேற்கொள்ளப்பட்டு வருகின்றன.
தற்போது பிஷப் ஒருவர் முஸ்லீம்களுக்கு எதிராக வெறித்தனமாகப் பேசிய நிகழ்வு குறித்து சமூக ஊடகங்களில் ஆதரித்தும் எதிர்த்தும் பல்வேறுப் பதிவுகள் வந்திருப்பதைப் பார்க்கிறோம். சமூக ஊடகங்களில் மதவெறி நஞ்சு உமிழப்படுவதைக் கட்டுப்படுத்திட மாநில அரசாங்கம் நடவடிக்கைகள் எடுக்க வேண்டிய அதே சமயத்தில், மதவெறி மற்றும் பிளவுவாத சக்திகளின் வெறிப்பிரச்சாரத்தை முறியடித்து, மக்கள் மத்தியில் நல்லிணக்கத்தைப் பேணிப் பாதுகாத்திட வேண்டிய பொறுப்பும் கடமையும் இடதுசாரி மற்றும் ஜனநாயக சக்திகளையே சாரும். இதனை அவர்கள் சமூகத்தில் உள்ள அனைத்து முற்போக்குப் பிரிவினரின் ஒத்துழைப்புடன் மேற்கொண்டிட வேண்டும்.
நன்றி: People’s Democracy
தமிழில்: ச.வீரமணி
No Comments
No Comments
No Comments