வாலாட்டி- தேவன் ஜெயக்குமார் | Vaalatti Movie Review

“வாலாட்டி” – திரைப்பார்வை

இயக்கம் : தேவன் ஜெயக்குமார் தயாரிப்பு : விஜய்பாபு ஒளிப்பதிவு : விஷ்ணு பணிக்கர் படத்தொகுப்பு : அயூப்கான் இசை : வருண் சுனில் 113 நிமிடப் படம் தமிழ் மொழி பொதுவாகவே பெரும்பாலானோர்க்கு நாய்கள் என்றாலே ஒவ்வாமையாகத்தான் இருக்கும். எனக்கு…
மஞ்சும்மல் பாய்ஸ் திரைப்பட விமர்சனம் (Manjummal Boys Movie Review)

‘மனிதர் உணர்ந்து கொள்ள இது மனித காதல் அல்ல’ – மஞ்சும்மல் பாய்ஸ் திரைப்பட விமர்சனம்

மஞ்சும்மல் பாய்ஸ் கதை நிஜக்கதை. 2006 ஆம் ஆண்டு கேரள மாநிலம் எர்ணாகுளம் மாவட்டம், கொச்சி அருகே உள்ள மஞ்சும்மல் எனும் பகுதியிலிருந்து கொடைக்கானலுக்கு சுற்றுலாவாக வந்த நண்பர்கள் குழு, அனைத்து பகுதிகளையும் சுற்றிவிட்டு இறுதியாக அவர்கள் பார்த்த இடம் தான்…
Mohanlal Neru Malayalam Movie Review நேரு திரை விமர்சனம்

நேரு (உண்மை/நேர்மை).. திரை விமர்சனம்

எது நேரு.. மலையாள திரையுலகம் இதுவரை கதையாடாத நுட்பமான வாழ்வியல், சமூக மற்றும் அரசியல் கதைகளை திரையாடி வருகிறது. தன்பாலின உறவாளரான கணவனை நீதிமன்றம் சென்று விவாகரத்து செய்கிற காதல் தி கோர் சினிமாவின் அதிர்வலைகள் இன்னும் அடங்கவில்லை. அதற்குள் இதோ…
madappalli united malayalam movie reviewed by r.ramanan திரை விமர்சனம்: மடப்பள்ளி யுனைட்டெட் - இரா.இரமணன்

திரை விமர்சனம்: மடப்பள்ளி யுனைட்டெட் – இரா.இரமணன்

2022இல் வெளிவந்த திரைப்படம். அஜய் கோவிந்த் என்பவர் இயக்கியுள்ளார். எழுத்தாளர், இயக்குனர், கார்ப்பரேட் பயிற்சியாளர் என பன்முக ஆளுமையான இவர் 40க்கும் மேற்பட்ட ஆவண படங்களை இயக்கியுள்ளார். கல்வி நிறுவனங்களில் நடைபெறும் 'ராகிங்' எதிர்ப்பு செயலாளர்.இந்தப்படத்தின் கதையை இவரும் ஷைகீனா கே.ரஃபிக்…
திரைவிமர்சனம்: THE TEACHER (மலையாள மொழி திரைப்படம்) – விமர்சனம் கருப்பு அன்பரசன்

திரைவிமர்சனம்: THE TEACHER (மலையாள மொழி திரைப்படம்) – விமர்சனம் கருப்பு அன்பரசன்




திரைக்கலைஞர் அமலாபால்
தேவிகா டீச்சராக நடித்து
விவேக் இயக்கத்தால் வெளிவந்திருக்கும் “தி டீச்சர்” மலையாளத் திரைப்படம் தமிழில் மொழி மாற்றம் செய்யப்பட்டும்
நெட் பிலிக்ஸ் ..ஓ டி டி தளத்தில் வெளியாகியிருக்கிறது.

பள்ளியின் உடற்பயிற்சி ஆசிரியராக பணியாற்றும் தேவிகா டீச்சர்..
பயிலும் பள்ளி ஆண் மாணவர்கள் தங்களுக்கு பயிற்றுவிக்கும் பெண் ஆசிரியையை, ஆசிரியராக பார்க்க மறுத்த பார்வையிலும், எண்ணத்திலும் வளர்த்த, வளர்ந்த ஆண் பிள்ளைகள் என்கிற மதப்பில் ஆசிரியரின் அக்கறை மிகுந்த வார்த்தைகளை சாதகமாக பயன்படுத்திக் கொண்டு, அவருக்கு இனிப்பில் மயக்க மருந்து கொடுத்து,
மயங்கியதும் பாலியல் கொடுமைக்கு உள்ளாக்கி, அதை வீடியோவாகவும் எடுத்து வைத்துக் கொள்வார்கள்.

மயக்கம் தெளிந்து தன் நிலை உணர்ந்த தேவிகா டீச்சர் யாரிடமும் பகிர முடியாமல் தன் தோழியோடு மட்டுமே
பகிர்ந்திருப்பார். இதை வெளியே சொன்னால் வீடியோவை வெளியிட்டு விடுவோம் என்றும் அந்த மாணவர்கள் அவரை மிரட்டியதையும் சேர்த்தே சொல்லி இருப்பார் தன் தோழியிடம். அதெல்லாம் ஒன்று நடக்காது நீ தைரியமாக இரு என்ற தோழி அவருக்கு ஆறுதலாகவும் துணையாகவும் இருப்பார்.

திருமணமாகி நான்கு வருடம் கடந்த பின்னும் தாய்மை அடையாதிருந்தவர் இந்த நிலையில் அவரின் பீரியட் நேரம் தள்ளிப் போகிறது. அதிர்ச்சியடைந்த தேவிகா தன்னை மருத்துவ பரிசோதனைக்கு உட்படுத்திய பொழுது; கர்ப்பப்பையில் கரு உருவாகி இருப்பது உறுதி செய்யப்படுகிறது. குற்ற உணர்ச்சியின் காரணமாக கரு உருவாகி இருப்பதை கணவரிடமும் சொல்லத் தயங்குகிறார். தன் வயிற்றில் வளரும் கருவை கலைக்க முற்பட்டதை அறிந்த கணவனிடம் பள்ளியில் நடைபெற்ற அனைத்து விஷயங்களையும் சொல்கிறார். ஆறுதலாக இருக்க வேண்டிய கணவன் அவரை தகாத வார்த்தை சொல்லி கடுமையான முறையில் நடந்து கொள்கிறான். அவரின் சுதந்திர செயல்பாட்டை கேள்விக்குள்ளாக்கி தகாத வார்த்தைகளை பயன்படுத்துகிறான் அவருக்கு எதிராக.

தேவிகா டீச்சருடைய கணவனின் அம்மா கல்யாணி.. கல்யாணி எளிய மக்களுக்கு ஆதரவாக அவர்களின் உரிமைக்காக அவரின் வாழ்வாதாரத்திற்காக தொடர்ந்து களத்தில் போராடிவரும் வீரமிகுந்த பெண்.. களப்போராளியாக இருக்கும் அவர் ஒரு கம்யூனிஸ்ட்.

தனக்கு நியாயம் வேண்டும் என்று தேவிகா டீச்சர் காவல் நிலையத்திற்கு செல்ல முற்படும்பொழுது
“இதை அப்படியே விட்டுவிடலாம்..
காவல் நிலையத்திற்கு சென்றால், நம்முடைய குடும்ப கௌரவம் என்னாவது.. எல்லோரும் தவறாகத்தான் பேசுவார்கள்” என்று சுய கௌரவத்திற்காக டீச்சரின் நடவடிக்கை கட்டுப்படுத்தும் போது அடங்க மறுக்கிறார் தேவிகா டீச்சர்.

டீச்சருக்கு ஆதரவாக கம்யூனிஸ்ட் கல்யாணியும் அவரின் தோழர்களும். டீச்சரின் அப்பா அம்மா தங்கை உள்ளிட்ட குடும்பமும் அவரோடு நிற்கிறார்கள்.

காவல்துறையின் லத்திக்கு பெண்களை கருவுறச் செய்யும் வாய்ப்பு இருந்திருந்தால் இத்தனை நாட்களில் பல நூறு முறை நான் கருவுற்று இருப்பேன் என்று காவல்துறையின் நடவடிக்கை குறித்து பேசி, தேவிகாவை பார்த்து “நீ எடுக்கும் எந்த முடிவிற்கும் நான் உன்னோடு இருப்பேன்.. முடிவெடுக்கும் அதிகாரம் உன்னுடையது” என்று உறுதி கூறுகிறார்.

சமூகத்தில் பெண் ஒருவர் ஆண்களால் பாலியல் சீண்டலுக்கு உள்ளாக்கப்படும் பொழுது அதை நேர்கொண்டு தைரியமாக எதிர்கொள்ள வேண்டிய கணவன் எப்படியெல்லாம் ஆணாதிக்க சிந்தனைக்குள்ளும் பொய்யான கௌரவத்திற்குள்ளும் இருக்கிறான் என்பதையும்.. ஆணாதிக்க சிந்தனைகளுக்கு ஆட்பட்டு இருக்கும் நீதித் துறையும், காவல்துறையும் இங்கு ஒரு சார்பாகவே பார்த்து பழகி இருக்கும் இந்நிலையில்; காவல்துறையின் துணையோடு சட்டத்தில் இருக்கும் ஓட்டைகளின் வழியாக தப்பித்திடும் ஆண்களுக்கு எதிராக உடனடி நடவடிக்கை எந்த வகையில் எப்படி எடுக்கப்பட வேண்டி இருக்கிறது என்பதனையும் கம்யூனிஸ்டுகளின் துணையோடு செய்து முடிப்பார் தேவிகா டீச்சர்.

சட்டம் தனக்கான நீதி வழங்கும் என்கிற நம்பிக்கை சாதாரண மக்களுக்கு ஏற்படாத பொழுது அவர்கள் எப்படியான நடவடிக்கைக்குள் தங்களை ஈடுபடுத்திக் கொள்ளும் கட்டாயத்திற்கு உட்படுகிறார்கள் என்பதற்கு தேவிகா டீச்சர் முன்னுதாரணம்.

சட்டமும் ஜனநாயகம் வேண்டுமானால் களப்போராளி கல்யாணியின் செயலையும் தேவிகா டீச்சரின் நடவடிக்கையும் தீர்ப்பையும் எதிர்க்கலாம்..

ஆனால் எளிய மக்கள் சாதாரண மக்கள் எல்லா வர்க்கத்திலும் இருக்கக்கூடிய பெண்கள் தேவிகா டீச்சரின் நடவடிக்கையை கொண்டாடுவார்கள் அதில் வரக்கூடிய கம்யூனிஸ்டுகளை கொண்டாடுவார்கள்.

உடன் பயணிக்கும் ஆண், தன்னை நம்பாத பொழுது பெண் என்கிற சக்தி தனியாக வலுவாக நிற்க வேண்டும்; நிற்கும் என்பதற்கு உதாரணம்தான் “தி டீச்சர்” திரைப்படம்.

தனியா கெத்தாகா நிற்பார்கள் கம்யூனிஸ்ட் கல்யாணியும் தேவிகா டீச்சரும் படம் முழுவதிலும். தேவிகா டீச்சராக அமலாபால் நிறைவான நடிப்பை தந்திருக்கிறார்.

கம்யூனிஸ்ட் கல்யாணியாக வரும் பெண் நடிப்பில் முத்திரை பதிக்கிறார்.

இயக்குனர் விவேக் அவர்களுக்கு அன்பும் வாழ்த்துக்களும்.

கருப்பு அன்பரசன்

நூல் அறிமுகம்: சுபாஷ்சந்திரன் ”பணமும் அர்ப்பணமும்” (மலையாளம்) – சுந்தரராமன்

நூல் அறிமுகம்: சுபாஷ்சந்திரன் ”பணமும் அர்ப்பணமும்” (மலையாளம்) – சுந்தரராமன்




நூல் : பணமும் அர்ப்பணமும்
மொழி : மலையாளம்

ஆசிரியர் : சபாஷ் சந்திரன்
விலை : ரூ. 110
வெளியீடு : மாத்ருபூமி புக்ஸ், கோழிக்கோடு
விற்பனை : 2765381. 0495 2765388.
www.mathrubhumiboos.com

மலையாள மொழிப் பத்திரிகை மாத்ருபூமியின் சிறுவர் வெளியீடான பால பூமியில் ஆசிரியராக இருந்த சபாஷ் சந்திரனின் அவர்கள் அந்த இதழில் எழுதி வெளிவந்த, சிறுகதைகளின் தொகுப்பே இந்த பணமும் அர்ப்பணமும் என்ற சிறுவர் புத்தகம்.

இதில் இடம் பெற்றுள்ள முப்பத்தைந்து கதைகளும் உண்மை, நேர்மை, இலட்சியம், தியாகம், நம்பிக்கை, அறிவு, திறமை, ஒழுக்கம் போன்ற நேர்மறை சிந்தனைகளை சிறுவர்கள் மனதில் விதைப்பதாக இருக்கின்றன.

எடுத்துக் காட்டாக சில கதைகளின் சாராம்சங்களையும் அதன் நீதி போதனைகளையும் சொல்லி இக்கட்டுரையை முடிக்கலாமென்று எண்ணுகிறேன்.

பிரார்த்தனையும் ஆணவமும் என்ற முதற்கதையில் பிரார்த்தனையால் ஏற்பட்ட ஆணவத்தின் பலனை வெளிப்படுத்தியிருக்கிறார். ஆணவம் அழிவை நோக்கியே நம்மை அழைத்துச் செல்லும் என்ற சிறு உண்மையை விளக்குகிறார்.

கல்வி, செல்வம் இதில் எது நிலைத்து நிற்கும் என்ற விவாதத்திற்கு வித்யாதரனும் தனாகரனும் என்ற கதை ஓர் எடுத்துக்காட்டு. ஒன்றிலிருந்து ஒன்று உருமாறி மற்றொன்றாய் வருகிறது என்பதை திராட்சை ரசமும் செங்கலும் என்ற கதை வெளிப்படுத்துகிறது. செங்கல் என்பதன் உருவாக்கத்தையும், மது என்பதின் தயாரிப்பையும் ஒப்பிட்டு பகவான் ராமகிருஷ்ணரின் கருத்து மூலம் வெளிப்படுத்தி இருப்பது சுவாரஸ்யமாக இருக்கிறது. மதுவின் ஆபத்தைப் பற்றிய அவரின் அறிவுரை பிஞ்சு உள்ளங்களில் பசுமரத்தாணியாய் பதியும்.

கத்தியும் பேனாவும் என்ற கதையில் கத்தியினால் ஏற்பட்ட தோல்வியும், பேனாவினால் ஏற்பட்ட பெரும் பலனும் விளங்குகிறது. கத்தியை தீட்டாதே, புத்தியை தீட்டு என்று புத்திமதி சொல்கிறது.

ஆசிரியர் சுபாஷ்சந்திரன் மலையாளத்தின் முன்னணி எழுத்தாளர், சிறுவர்களுக்கான நிறைய தொகுப்புகள் வெளியிட்டிருந்தாலும், அவரின் மனுஷ்யனு ஒரு …. முகம் என்ற மலையாள நாவல் கேந்திரிய சாகித்ய அகாடமிவிருது, கேரள சாகித்ய அகாடமி விருது, வயலார் விருது, ஓடக்குழல் விருது என பன்னிரெண்டு பரிசுகளைப் பெற்றிருக்கின்றது. இந்த புத்தகம் A preface to Man என்று ஆங்கிலத்திலும் வெளி வந்திருக்கிறது.

இனி சில கதைகளுக்கு வருவோம். பணிவும் விவேகமும் என்ற கதை மூலம் விவேகத்தோடு கூடிய பணிவே வெற்றியை பெற்றுத் தரும் என்று விளக்குகிறார். ஒரு யானை தன் இனத்தில் யாரோடும் நண்பனாகாமல் மற்ற மிருகங்களிடம் நெருக்கமாக இருக்கும்போது, ஆபத்துக் காலத்தில் மற்ற மிருகங்களைவிட தன் இனத்து யானையே உதவிக்கு வருமென்று விளக்குகிறார். புது வருடத்தின் தேவதை என்ற கதை சோம்பலையும் அதை துரத்துவதையும் நாசூக்காகவும் நையாண்டியாகவும் ஒரு குழந்தையின் மூலம் விளக்குகிறார். வாசிப்பும் பேச்சும் என்ற கதை மூலம் பேச்சை விட செயலே சிறந்தது என்று இயம்புகிறார்.

புத்தகத்தின் தலைப்பைப் பெற்றிருக்கும் பணமும் அர்ப்பணமும் என்ற கதை ராஜராஜசோழன் காலத்தை ஒட்டியதாக வருகிறது. வறுமையிலும் ஒரு பெண்ணின் அர்ப்பணிப்பும் மன்னரின் மனமாற்றமும் அழகாக விளக்கப்பட்டுள்ளது.

ஒன்பது வயது முதல் பதினாலு வயது வரை உள்ள சிறுவர், சிறுமியரின் வாசிப்பு ரசனையை மேம்படுத்தும் வகையில் அமைந்திருக்கிறது இந்நூலின் கதைகள். எல்லா சிறுவர் கதைகளிலும் உள்ளது போலவே இக்கதைகளிலும் காடுகள் வருகிறது, மலை வருகிறது, கடல் வருகிறது. மற்றும் யானைகள், பூனைகள், சிங்கம் புலிகள், வண்டுகள், குருவிகள், கிளிகள் போன்றவைகள் கதாபாத்திரங்களாக உலா வந்து சிறுவர்களின் மனதில் சந்தோச சலனத்தை உண்டு பண்ணுகின்றன. கற்பனை மனோபாவத்தை வளர்க்கின்றன. மேலும் மன்னர்கள், ராஜரிஷிகள் துறவிகள், திருடர்கள் இராஜகுமாரன்கள் கதை மாந்தர்களாக வருகிறார்கள். எல்லா கதைகளும் சொற் சிக்கனமும் வாசிப்பு லாகவமும், நீதி போதனைகளும் கொண்டவைகளாகவே உள்ளன.

அரேபியா, ஜப்பான் போன்ற வெளி நாடுகளும், கெளசாம்பிகா, மித்ரபுர், குருசேத்திரம், மகதம், காந்தாரம் போன்ற இந்திய நாடுகளும் கதைகளில் கதைச் சூழலாக அமைகிறது. அது வாசிக்கும் சிறுவர்களுக்கு ஒரு மண் சார்ந்த உணர்வை ஏற்படுத்தும்.

இன்றும் நாளையும் என்ற கதை பாண்டவர்கள் மூலம் நன்றே செய்க அன்றே செய்க, அதை இன்றே செய்க என்ற உண்மையை வெளிப்படுத்துகிறார். வண்டுகள் கற்றுத் தந்த பாடம் ஒரு சுற்றுச் சூழல் பேருண்மையை குழந்தைகள் மனதில் விதைக்கிறது. புலியும் பூனையும் என்ற கதை முற்பகல் செய்யின் பிற்பகல் விளையும் என்ற தத்துவத்தை விவரிக்கிறது.

மன்னரும் திருடனும் என்ற கதை ஒரு திருடன் திருந்தினால் வீடு திருந்தும், வீடு திருந்தினால் நாடு திருந்தும் என்ற நம்பிக்கையைக் கொடுக்கிறது. மீனை கொடுப்பதை விட மீன் பிடிக்க கற்றுக் கொடுப்பதே மேல் என்ற தத்துவத்தை பேசிச் செல்கிறது பிரச்சினையும் தீர்வும் என்ற கதை.

கரிக்கட்டையும் வாழ்க்கையும் என்ற ஜப்பானியக் கதை உழைப்பின் உயர்வை உணர்த்திச் செல்கிறது. இறக்கையின் சக்தி ஆணவத்தின் ஆபத்தை உணர்த்துகிறது. கடைசி வாய்ப்பு என்ற கதையில் மகாபலி, வாமனன் மூலம் ஓணப் பண்டிகையின் தத்துவார்த்தங்கள் வெளிப்படுத்தப்படுகின்றன. முத்தாய்ப்பாக கப்பலும் தடியும் மூலம் முயற்சியின் உயர்வு விளக்கப்பட்டுள்ளது.

மொத்தத்தில் முப்பத்தைந்து கதைகளும் பிஞ்சு உள்ளங்களில் நாட்டுப்பற்று, சுற்றுச்சூழல், நேர்மை, நீதி, தியாகம், செம்மை, அறிவின் தேடல் போன்ற உயர்ந்த சிந்தனைகளை விதைத்துச் செல்கிறது என்பது திண்ணம்.

– சுந்தரராமன்

Music Life Series Of Cinema Music (Ullam Isaithathu Mella) Webseries by Writer S.V. Venugopalan. இசை வாழ்க்கை 62: உள்ளம் இசைத்தது மெல்ல - எஸ் வி வேணுகோபாலன் 

இசை வாழ்க்கை 62: உள்ளம் இசைத்தது மெல்ல – எஸ். வி. வேணுகோபாலன்



உள்ளம் இசைத்தது மெல்ல …..

கடந்த வாரக் கட்டுரை, உண்மையில் ஜுர வேகத்தில் எழுதியதுதான். இசையெனும் காய்ச்சல் மட்டுமல்ல, வேகமாக என்னுள் பரவிக் கொண்டிருந்த காய்ச்சல் அது. டிசம்பர் கடைசியில் எழுதி முடித்து, கட்டுரை பதிவேற்றம் செய்யப்பட்ட அன்று எனக்கு தொற்று உறுதி செய்யப்பட்டிருந்தது. நிபுணர் ஒருவரை சந்தித்து, பரிசோதனைகளுக்குப் பிறகு, வீட்டில் தனிமைப்படுத்தி இருக்க அவர் சான்றிதழ் வழங்கியதும், மருத்துவமனை வாசத்திற்குத் தயாராகக் கட்டி எடுத்துச் சென்ற மூட்டைகளோடு வீடு திரும்பினேன். அப்புறம் செய்த உடனடி பணிகளில் ஒன்று தான், இசை வாழ்க்கை கட்டுரையை எல்லோருக்கும் பகிர்ந்து கொண்டது.

எந்தக் களைப்பும் இல்லாதிருக்கச் செய்துவிட்டது 5 நாள் தனியறைத் தனிமை. வாசிப்பும், இசையும், அலைபேசியிலேயே எழுதிக் கொண்டிருந்த கவிதைகள் சிலவும், பகிர்வுகளும் நிற்கவில்லை. மடிக்கணினி மட்டும் தான் அறைக்குள் குடியேறவில்லை.

கவிஞர் காமகோடியன் மறைவுச் செய்தி, தனிமைப்பட்டிருந்த அப்படியான நாள் ஒன்றில் வந்தது. எங்கள் தெருவிலேயே குடியிருந்த அருமையான மனிதர், சிறந்த பாடலாசிரியர், மெல்லிசை மன்னரோடு நெருக்கமாக உடனிருந்தவர், ஏராளமான பக்திப் பாடல்கள் அவருக்கு இயற்றி அளித்தவர். இளைய தலைமுறை இசையமைப்பாளர்களுக்கும் எழுதிக் கொடுத்திருப்பவர். மிக எளிமையான மனிதர். இந்தக் கொடுந்தொற்றுச் சூழலில் நேரில் சென்று மரியாதை செலுத்த இயலாமல் போனது. அவரது நூல் வெளியீட்டு நிகழ்வில் பார்த்த இடத்தில் வாய்த்த அரிய அறிமுகத்தில் கோவில்பட்டி அன்பர் முத்துராமலிங்கம் என்பவரோடு கிடைத்த நட்புக்காகவும் காமகோடியன் அவர்களுக்கு அன்புக்கடன் பட்டிருக்கிறேன்.

அறிஞனாயிரு, கவிஞனாயிரு…..ஆயிரம் கோடிக்கு அதிபனாயிரு, வீரனாயிரு, சூரனாயிரு…..என்னவாக இருந்தாலும், மனிதனாயிரு என்று அமையும் அவரது இசைப்பாடலை, எம் எஸ் வி இசையமைத்து வாய்ப்புள்ள மேடைகளில், நிகழ்ச்சிகளில் எல்லாம் பாடிக் கொண்டே இருந்தார் என்பதை அடிக்கடி சொல்வார் காமகோடியன்.

அவரோடு பாபுஜி அவர்கள் தொலைபேசியில் நடத்தியுள்ள அருமையான உரையாடல், யூ டியூபில் தற்செயலாகக் கிடைத்தது, அவரது நூல் வெளியீடு நிகழ்ந்ததற்குப் பிறகான நேர்காணல் அது. தன்னைக் கொஞ்சமும் முன்னிறுத்தாமல், எம் எஸ் வி அவர்கள் பால் அத்தனை அன்பும், மரியாதையும் பொங்க வார்த்தைக்கு வார்த்தை கவிஞர் கொண்டாடிப் பேசுவதைக் கண்ணீர் மல்கித் தான் கேட்க முடிந்தது.

இந்த உரையாடலில், இசை மேதை நௌஷத் மீது எம் எஸ் வி கொண்டிருந்த பக்தியை, அவர் விஸ்வநாதன் பால் காட்டிய மதிப்பை எல்லாம் பதிவு செய்திருக்கிறார் காமகோடியன். திறமைகளுக்கு அப்பால் எளிய மனிதராக இருந்த மெல்லிசை மன்னரின் பேரன்பில் கால் நூற்றாண்டுக் காலம் திளைத்த அனுபவங்களைக் கிஞ்சிற்றும் செருக்கின்றி ஒரு குழந்தை போல் அவர் பேசுகிறார்.

குழந்தை என்றதும், மலையாள சூப்பர் சிங்கர் நிகழ்ச்சி ஒன்றில் பெரிய பாடகருக்கு சமமாக எந்த அச்சமும் இன்றி ஒரு சிறுமி மழலைக் குரலில் துணிச்சலாக இணைந்து பாடும் பதிவை அவசியம் குறிப்பிட வேண்டும்.

சந்திரமுகி படத்தில் இடம் பெற்ற யுக பாரதி அவர்களது ‘கொஞ்ச நேரம் கொஞ்சம் நேரம்’ பாடல் வித்யாசாகர் இசையமைப்பில் விளைந்த மிகவும் இனிமையான மெல்லிசைப் பாடல். மது பாலகிருஷ்ணன், ஆஷா பான்ஸ்லே அத்தனை சிறப்பாகப் பாடி இருப்பார்கள். ஆஷாவின் குரலே குழந்தைமைப் பண்போடு இழைந்தோடும். மேக்னா (எத்தனை வயது, ஏழு?) என்கிற அந்த அழகு குட்டிச் செல்லம், ஏட்டிக்குப் போட்டி சரிக்கு சரி பேச்சும் கொடுத்து, மது பாலகிருஷ்ணன் அவர்களோடு இணைந்து இந்தப் பாடலை அருமையாகப் பாடுவதைக் கேட்கையில் அத்தனை மகிழ்ச்சியாக இருக்கிறது.

https://www.youtube.com/watch?v=TS-8pvbGnus

சரணத்தின் இடையே வரும் ஹம்மிங் உள்பட, தாளக்கட்டு பிசகாமல், எங்கே எப்போது குரல் எடுக்கவேண்டுமோ, எங்கே மூச்சு எடுத்துக் கொண்டு அடுத்த சொல்லை அழகாகப் பாட வேண்டுமோ, எங்கே ஆண் பாடகருக்கு வழிவிட்டு அடுத்து எங்கே தான் இணைந்து தொடர வேண்டுமோ அத்தனையும் சுத்தம்…அழகு !

இதெல்லாம் வெறும் பயிற்சியில் வந்து விடுவதில்லை. இசை, ஒரு கணித வரையறைக்குள் வலம்வந்தால் மட்டும் நிறைவு பெற்று விடுவதில்லை. பாடலின் பாவமும், அதில் தோய்ந்த உள்ளமும் தான் இசையாகிறது.

பாடல் மட்டுமின்றி, அசராமல் யாரோடும் பேச்சு தொடுத்துப் பின்னி எடுக்கும் மேக்னா நிகழ்ச்சிகள், யூ டியூபில் கொட்டிக் குவிந்திருக்கின்றன. மிகப் பெரிய பாடகர்கள், இசை அமைப்பாளர்கள், மோகன் லால் போன்ற மூத்த கலைஞர்கள் யார் வந்து அமர்ந்தாலும் சரிக்கு சரி பேசும் இந்தச் சிறுமி பாடிய தமிழ்ப் பாடல் வேறொன்று சிக்காதா என்று பார்க்கையில், எதிர்பாராத முத்து கிடைத்தது.

சந்திரபாபு, ஜமுனா ராணி இருவரும் மரகதம் படத்திற்காக அபாரமாக இசைத்த பாடல் அது. தமிழைத் தாய் மொழியாகக் கொண்டிராத சிறுவன் ரிச்சு, சிறுமி மேக்னா இந்தப் பாடலை அத்தனை கனஜோராகப் பாடியது, எத்தனை சாகா வரம் பெற்றது அந்தப் பாடல் என்று உணர்த்துகிறது. உலகில் வேறெதையும் விட இசைப்பாடல் தான் இந்தக் குழந்தைகளுக்கு அத்தனை உயிரானதாகத் தோன்றும் போல் தெரிந்தது. இந்த ஆனந்தம் அவர்களுக்கு நீடிக்க வேண்டும், போட்டிகள், இலக்குகள், பெற்றோர் எதிர்பார்ப்புகள் எல்லாம் குழந்தைகளிடமிருந்து அவர்களது நிகழ் காலத்தையும் பறித்து, எதிர்காலத்தையும் சிக்கலாக்கி விடக் கூடாது என்று அடிக்கடி தோன்றும்.

இசையோடு இன்னுமின்னும் கலந்து கரைந்து கொள்பவர்களுக்கு நிறைய கேள்விகளும் எழுகின்றன. ‘ஒரே மாதிரி கதைக்காட்சி தான் வெவ்வேறு படங்களிலும் இயக்குநர்கள் சொல்லிப் பாடலுக்கு உங்களிடம் கேட்பார்கள், எப்படி வெவ்வேறு ட்யூன் உங்களால் கொடுக்க முடிகிறது?’ என்ற கேள்வியை இளையராஜா அவர்களிடம் திரும்பத் திரும்பப் பலரும் கேட்கின்றனர்.

எல்லாப் படைப்பாளிகளுக்குமான கேள்வி தான் அது. அந்தப் புள்ளியை அறிவியலாளர் ஹைசன்பர்க், நிச்சயமற்ற கோட்பாட்டில் தொட்டார். அதைத் தான் பின்னர் ஆல்பர்ட் ஐன்ஸ்ட்டின் இன்னும் விவரித்தார். புத்தர் அதைத் தான் க்ஷணிக தத்துவம் என்று உலகுக்கு விளக்கினார். ஓடிக்கொண்டிருக்கும் ஓடை நீரில் ஒரு கையள்ளிப் பருகிய நீரை மீண்டும் அங்கிருந்து எடுக்க முடியாது என்றார் கௌதமர். அந்த இடத்தில் இப்போது ஓடி வருவது வேறு நீர், முன்பு எடுத்த நீர் இப்போது கடந்து கொண்டிருப்பது வேறு இடம் என்றும் விளக்கினார்.

அப்படியான நிகழ்வில் பிறந்து விடுகிறது அந்த கணத்திற்குரிய இசை. வேறொரு கணத்தில் அது வேறாகவே பிறக்கிறது, அந்தப் பிறிதொரு கணத்திற்கான இசை அது. இந்த அதிசயம் தான் பாடல்களை நெருக்கமாக அணுகும்போது அத்தனை பூரிப்பு அடைய வைக்கிறது.

அற்புதமான இசை அமைப்பாளர் வி குமார் அவர்களுக்கு, ‘ஒரு நாள் யாரோ…..’ என்ற பாடலுக்கான இசை எப்போது எந்த கணத்தில் உருவாகி இருந்திருக்கும் ! பி சுசீலாவுக்கும், கவிஞர் வாலிக்கும், படத்தில் தோன்றிய ஜெயலலிதாவுக்கும் மிகப் பெரிய புகழைத் தேடித் தந்த அமர்க்களமான பாடல். (ஆனால், மேஜர் சந்திரகாந்த படத்தில் தனக்கான பாத்திரம் பெரிய அளவில் அமையாது போனதில் வெறுத்துப் போன ஜெயலலிதா பின்னர் கே பாலச்சந்தர் இயக்கத்தில் நடிக்கவில்லை என்றும் கூறப்படுகிறது).

தன்னை நம்பி ஓர் ஆணிடம் ஒப்புக் கொடுத்து அவன் காதலை நம்பி குதூகலத்தில் இருக்கும் ஒரு பெண், சகோதரன் முன்னிலையில் பாடும் பாடல் காட்சி அது. அவள் உணர்த்த விரும்பும் நுட்பமான செய்திகளை அத்தனை அநாயாசமாக அந்தப் பாடலில் கொணர்ந்திருப்பார் வாலி.

ஒரு முன்னோட்டம் கொடுத்துத் தான் பல்லவியைத் தொடங்க வைக்கிறார் குமார், அந்த இசைத் துளிகளில் சேகரமாகும் உணர்வின் விளிம்பில் புல்லாங்குழலின் சிலிர்ப்பில், சுசீலா அபாரமாக முன்னெடுக்கிறார், ‘ஒரு நாள் யாரோ என்ன பாடல் சொல்லித் தந்தாரோ…’ என்று. ‘கண்ணுக்குள் ராகம் நெஞ்சுக்குள் தாளம் என்னென்று சொல் தோழி’ என்ற வரியை வசீகர அடுக்குகளில் இசைக்கிறார். இதில் நெஞ்சுக்குள் தாளம் என்பது, ஒரு பருவப் பெண்ணின் துள்ளாட்டத்தையும், பதட்டத்தையும் இடத்திற்கேற்ப உருவகப்படுத்தும் இடத்திலேயே வாலி மின்னுகிறார்.

‘உள்ளம் விழித்தது மெல்ல…அந்தப் பாடலின் பாதையில் செல்ல’ என்கிற முதல் சரணத்தை அசாத்திய குரலில் பாடுகிறார் சுசீலா. பாடலின் பாதை என்று வாலி சுட்டுவது, அந்தப் பெண் நம்பி நடந்து போயிருக்கும் வழியையும் தான். ‘மெல்லத் திறந்தது கதவு….என்னை வாவெனச் சொன்னது உறவு’ என்பது விவரிப்புக்கு அப்பாற்பட்ட கவித்துவத்தில் எழுதப் பட்டிருக்கும் அடுத்த கட்டம். ‘நில்லடி என்றது நாணம், விட்டுச் செல்லடி என்றது ஆசை’ என்ற வரி, அவள், தனது தாபத்திற்கு ஆட்பட்டுப் போன கதையைக் கூறி விடுகிறது. ஆனால், அதை அவளது அந்த நேரத்துக் கொண்டாட்ட மனநிலையில் தான் இசைத்திருப்பார் சுசீலா.

இரண்டாம் சரணம், உடலியல் மாற்றங்களைக் காதலின் நிமித்தம் போல வெளிப்படுத்தினாலும், படக்கதையைத் தொடர்வோருக்கு உரிய பொருளில் கொண்டு சேர்த்து விடுகிறது. ‘செக்கச் சிவந்தன விழிகள்…கொஞ்சம் வெளுத்தன செந்நிற இதழ்கள்…’ என்ற அடிகளை அபாரமான பாவத்தில் கொண்டு வந்திருப்பார் சுசீலா. அடுத்து, ‘இமை பிரிந்தது உறக்கம் நெஞ்சில் எத்தனை எத்தனை மயக்கம்’ என்பதில் உறக்கம் என்பதில் வலுவாக அழுத்தமும், மயக்கம் என்பதில் ஒயிலான கிறக்கமும் ஒலிக்கும் அவரது குரலில். . ‘உன்னிடம் சொல்லிட நினைக்கும் மனம் உண்மையை மூடி மறைக்கும்’ என்ற வரி, படத்தின் மீதிக் கதைக்கான களத்தை அமைந்துவிடுகிறது.

பல்லவியை நிறைவு செய்கையில் இன்னும் கூடுதல் ஒயிலாகக் கொண்டு வந்து முடிப்பார் சுசீலா.

வானொலியில் பாடுகிறார் என்ற உணர்வை ஏற்படுத்த நாகேஷ் தனது சீடனோடு சேர்ந்து உருவாக்கும் இசையமைப்பின் கற்பனை காட்சியில் கூடுதல் சுவாரசியம் ஏற்படுத்தும். ஆனாலும், பாடலின் சோக இழை நெஞ்சில் ரீங்காரம் இட்டுக்கொண்டிருக்கும்.

காலங்களைக் கடந்து வாழும் இசை என்பது, இந்தப் பாடலை, சூப்பர் சிங்கர் புகழ் பிரியங்கா மேடையில் இசைத்திருக்கும் காணொளிப் பதிவை, பல லட்சம் பேர் பார்த்திருப்பதில் வெளிப்படுகிறது.

எழுத்தில், குரலில், மெட்டில் இணைந்து பொழிகிறது இசை. இங்கிருந்தே அது எடுக்கப்படுகிறது. வேறெங்கிருந்தோ பொழிவதில்லை இசை, மழையைப் போலவே! அதன் இன்பம் அடுத்தடுத்து எடுத்துச் செல்லப்படுவதில் மேலும் கூடிக் கொண்டே செல்கிறது. நவில் தொறும் நூல் நயம் என்றார் வள்ளுவர். நுகர் தொறும் இசை நயம் தான்!

(இசைத்தட்டு சுழலும் ….)
கட்டுரையாளர் அலைபேசி எண் 9445259691
மின்னஞ்சல் முகவரி: [email protected]

முந்தைய தொடரை வாசிக்க:

இசை வாழ்க்கை 56: இசையே இசையின் ஒலியே  – எஸ் வி வேணுகோபாலன் 

இசை வாழ்க்கை 57: மெட்டுக்களோ கண்கள்  – எஸ் வி வேணுகோபாலன்

இசை வாழ்க்கை 58: தேகம் தழுவும் இசைக் காற்று – எஸ் வி வேணுகோபாலன்

இசை வாழ்க்கை 59: இது வசந்த காலமோ என் இசையின் கோலமோ – எஸ் வி வேணுகோபாலன்

இசை வாழ்க்கை 60: பாட்டு நம்மை அடிமை என்று விலகவில்லையே – எஸ். வி. வேணுகோபாலன் 

இசை வாழ்க்கை 61: இசையும் அழுத ஒரு மழை இரவு – எஸ். வி. வேணுகோபாலன்

The Great Indian Kitchen Malayalam Movie Review By Pichumani. திரை விமர்சனம்: கிரேட் இந்தியன் கிச்சன் - பிச்சுமணி

திரை விமர்சனம்: கிரேட் இந்தியன் கிச்சன் – பிச்சுமணி




என்ன வேலை செய்யிறிங்க‌?
பெயிண்டர்.
உங்கள் மனைவி?
வீட்ல சும்மாதான் இருக்கிறாள்.
பெயிண்டர் இடத்தில் எந்த வேலையும் போட்டுக் கொள்ளுங்கள். ஆனால் அநேக ஆண்களின் பதில் இதுவாகத்தான் இருக்கும்.

என்ன வேலை பார்க்குறீங்க?
ஆசிரியர்.
உங்கள் மனைவி?
House wife. Sorry.. இல்லத்தரசி.
நீங்க என்ன வேலை செய்யிறிங்க‌?
இஞ்சினியர்.

உங்கள் மனைவி ?
ஆசிரியர்.
உங்களுக்கு சமைக்க தெரியுமா?
தெரியாது.
உங்க வீட்டில் யார் சமையல் செய்வார்?
எனது மனைவி தான்.

சார் உங்களுக்கு சமைக்க தெரியுமா?
தெரியும்.
சமையல் பாத்திரங்களை யார் கழுவுவார்கள்?
எனது மனைவி தான்.

சும்மா தான் இருக்கிறாள், ஹவுஸ் ஒய்ப், சமைக்க தெரியாது, மனைவி தான் பாத்திரம் கழுவுவாள்.. இப்படியான வார்த்தைகள்.. எவ்வளவு பெரிய வன்முறையான வார்த்தைகள் என்பதை சொல்லும் படம்தான் “தி கிரேட் இண்டியன் கிச்சன்”.

கதாநாயகி திருமணத்தோடு படம் தொடங்குகிறது. சமைப்பது.. பாத்திரம் கழுவுதல்.. சமைப்பது.. பாத்திரம் கழுவுதல் என்று அடுப்படி காட்சிகள் அதிகமாக இருந்தாலும்.. சமூகத்தில் ஆணாதிக்க வெறியையும் சோம்பேறிதனத்தையும் தோலுரித்து செவ்விடில் அடித்தால் போல் நமக்கு காட்டுகிறது இந்த படம்.

குக்கர் சோறு வேண்டாம்.. மிக்சியில் அரைக்கவேண்டாம்.. கடுங்காப்பி இப்படிதான் வேணும்… வாசிங்மிஷினில் துணி துவைத்தால் பிடிக்காது.. இப்படி சொந்த வீட்டில் ஆர்டர்கள் போட்டு.. சுகம் களித்து உடல்நலம் பேணும் சோத்து அமுக்கிகளாகிய நாம் கண்டிப்பாக இந்த படத்தை பார்க்க வேண்டும்.

மாதவிடாய் நாள்களில் பெண்கள்படும்பாடு கொடூரமானது. எவ்வளவு எளிதாக நாம் அவர்களின் மீது வன்முறைய கட்டவிழ்த்து விடுகிறோம் அந்த நாள்களில்.
கதாநாயகி மாதவிடாய் நாள்களில் உதவிக்காக ஒரு பெண்மணி வருவார் படத்தில்..

“எவ்வளவு பெரிய வீடு இந்த வீட்டை சுத்தம் செய்வது பெரும் கஷ்டம்தான்.. நான் குடுத்துவைச்சவ எங்க வீடு இரண்டு சிறிய அறைகள்தான்” பெண் சமூகத்தின் கொடும் வலிய பரிதாபம் கலந்த மன உளைச்சலோடு பதிவு செய்வார்.

கதாநாயகியின் கணவர் கதாபாத்திரமும் மாமனார் கதாபாத்திரமும் ரெம்ப நடிக்காமல் வாழ்ந்தது போலவே இருக்கும். அந்த கதாபாத்திரத்திரங்களில் நமது அப்பாவாகவோ அண்ணாகவோ நீங்களாகவோ நானாகவோ.. பொருத்திப்பார்த்தால். அது படமாக இருக்காது நிசமான நமது மிருகத்தனமான வாழ்க்கையா இருக்கும்.

படத்தில் வரும் பெண்குழந்தை நம் மனதில் கண்டிப்பாக நிற்கும். தீட்டு புனிதம் புடலங்காய் என எதுவும் வசப்படதா அந்த குழந்தை கதாநாயகி மீது அன்பு செலுத்தும் ஒவ்வொரு கட்சியும் அருமை. அதிலும் வயதான பெண் ஒருத்தி கதாநாயகி மாதவிடாய் வந்து தனி அறையில் இருக்கும் போது.. மெத்தையில் படுக்காதே.. இந்தா பாய் என்று தரையில் போட்டு இருக்க சொல்லி கணவனும் மாமனாரும் ஐயப்பசாமிக்கு மாலை போட்டு இருக்கிறார்கள் அவர்கள் முன் வந்துவிடாதே,. சொல்லி செல்லுவாள். ஆனால் பெண் குழந்தை (ஐயப்பனுக்கு மாலை போட்டிருக்கும்) கதாநாயகிக்கு அன்போடு சாப்பிட ஒன்றை கொடுத்து விட்டு செல்லும் காட்சி.. அன்புக்கும் சமத்துவத்துக்கும் முன்னால் தீட்டு புனிதம் எதுவும் இல்லை என சொல்கிறது.

கீழே விழுந்த தன் கணவனை.. மாதவிடாய் நாளில் கதாநாயகி காப்பாற்ற தூக்கியதால்.. பரிகாரம் செய்யும் கணவன். மறுநாள் காப்பி கேக்கும் போது.. கழிவுநீரை தந்து அதிர்ச்சி அடையவைக்கிறாள். கோபத்தோடு கிச்சனுக்குள் வரும் கணவன், மாமனார்.. முகத்தில் மீது கழிவுநீரை ஊற்றுகிறாள்.. நிச்சயம் அந்த கழிவுநீர் படம் பார்க்கும் அத்தனை ஆண்கள் முகத்திலும் படிந்திருக்கும்.

கோவத்தில் தன் தாய்வீடு நோக்கி வந்து கதாநாயகி.. வீட்டில் அமர்ந்து இருப்பாள் அவளது தம்பி வெளியே இருந்து உள்ளே வரும் போதே…

அம்மா தண்ணீ குடு.. என்பான்.
அம்மா தன் இளைய மகளை தண்ணீரை எடுத்து வரச்சொல்லுவாள்..
கதாநாயகிக்கு கோவம் வந்துவிடும்…
தங்கைய பார்த்து தண்ணீய நீ எடுத்துக் கொடுக்காதே..

டேய்.. நீ போய் தண்ணீ எடுத்து குடிடா.

ஒட்டு மொத்த படத்தின் தீர்வை இந்த கடைசி காட்சி சொல்லி விடும்.

மீண்டும் சொல்லுகிறேன்.

குக்கர் சோறு வேண்டாம்.. மிக்சியில் அரைக்கவேண்டாம்.. கடுங்காப்பி இப்படிதான் வேணும்…வாசிங்மிஷினில் துணி துவைத்தால் பிடிக்காது.. இப்படி சொந்த வீட்டில்ஆர்டர்கள் போட்டு.. சுகம் களித்து உடல்நலம் பேணும் சோத்து அமுக்கிகளாகிய நாம் கண்டிப்பாக இந்த படத்தை பார்க்க வேண்டும்.

மலையாள படம். கண்டிப்பாக அனைத்து மொழிகளிலும் வர வேண்டும். அரைகுறை மலையாளம்தான் நான். ஆனால் எளிதாக புரிகிறது. இப்படம் பார்க்க மொழி தேவை இல்லை.

Ranjith Sankar's Malayalam Film Sunny Movie Review By Era Ramanan. Book Day And Bharathi TV Are Branches of Bharathi Puthakalayam.

சன்னி (கொரோனா பின்னணியில் ஒரு புதிய முயற்சி) – இரா. இரமணன்



Ranjith Sankar's Malayalam Film Sunny Movie Review By Era Ramanan. Book Day And Bharathi TV Are Branches of Bharathi Puthakalayam.

செப்டம்பர் 2021 வெளிவந்த மலையாள திரைப்படம். மலையாளத் திரை உலகில் இயங்கும் ஜெயசூரியா நடிகர், விநியோகஸ்தர், தயாரிப்பாளர், பின்னணிப் பாடகர் என பன்முக ஆளுமைகொண்டவர். இது அவரது நூறாவது படம். ஒரே ஒரு பாத்திரம் மட்டுமே நடிக்கும் படம் எடுக்க வேண்டும் என்கிற ஆவலில் தயாரித்துள்ளார். பார்த்திபனின் ‘ஒத்த செருப்பு’ நினைவுக்கு வருகிறது.

சன்னி ஒரு இசையமைப்பாளர். காதலி நிம்மியை திருமணம் செய்துகொண்டபின் பிறக்கும் குழந்தை இறந்து விடுகிறது. அந்த சோகத்தில் துபாய் சென்று அங்கு வியாபாரத்தில் பணத்தை இழந்துவிடுகிறார். அங்கு ஒரு பெண்ணுடன் தொடர்பு ஏற்படுகிறது. அந்த நேரம் எட்டு மாத கர்ப்பிணியாக இருக்கும் அவன் மனைவி விவாகரத்து கேட்கிறார். சன்னி தீவிரமான குடிப்பழக்கத்திற்கு ஆளாகிறார். இந்தியா திரும்பும் அவர் கொரோனா விதிகளின்படி ஒரு ஐந்து நட்சத்திர ஓட்டலில் தனிமைப்படுத்தப்படுகிறார். குடிப்பதற்கு மது கிடைப்பதில்லை. கடன் கொடுத்தவன் மிரட்டுகிறான். ஆகவே தற்கொலை மனப்பான்மைக்கு ஆளாகிறான். காவல்துறை அவனுக்கு ஒரு மருத்துவரை ஆலோசனை கூற ஏற்பாடு செய்கிறது. அவர் அவனுடய பிரச்சினைகளை கேட்கிறார். தொட்டியில் வளரும் ஒரு செடியை பரிசாக அனுப்புகிறார். அவனுடைய இருமலுக்கு அதன் இலைகளையே மருந்தாக எடுத்துக் கொள்ள சொல்கிறார். அவன் தற்கொலை முயற்சி செய்யும்போது மேல் மாடியில் அவனைப்போலவே கொரோனாவிற்காக தனிமைப்படுத்தப்பட்ட ஒரு பெண் அவனை ஆறுதல் கூறி உற்சாகப்படுத்துகிறாள். அவனுடைய நண்பனும் தொலைபேசியில் அவனுக்கு அவ்வப்போது ஆறுதல் கூறுகிறான். அவனை பண விசயத்தில் ஏமாற்றிய இன்னொரு நண்பனிடமிருந்து பணத்தைப் பெற்று வட்டிக் கடனை அடைக்க அவந்தி வழக்குரைஞர் ஏற்பாடு செய்கிறார். இந்த நிலையில் அவனுக்கு கொரோனா தொற்று உறுதியாகி மருத்துவமனைக்கு அழைத்து செல்லப்பட இருக்கிறான். அதே சமயம் அவன் மனைவி ஆண் குழந்தை ஒன்றை பெற்றெடுக்கிறாள். அவனுடன் மீண்டும் வாழ விரும்புவதாக மனைவி கூறுவதுடன் கதை முடிகிறது.Ranjith Sankar's Malayalam Film Sunny Movie Review By Era Ramanan. Book Day And Bharathi TV Are Branches of Bharathi Puthakalayam.

ஒருவனுக்கு இவ்வளவு பிரச்சினைகளும் ஒரே நேரத்தில் வருமா? பிறகு அத்தனையும் ஒரே நேரத்தில் தீருமா? இந்தக் கேள்விகளை ஒதுக்கிவிட்டு கதையை தொலைபேசி உரையாடல் மூலமே நகர்த்துவதை பாராட்டலாம். ஓரிரு கதாபாத்திரங்களே திரையில் காட்டப்படுகிறார்கள். மற்றவர்கள் அனைவரும் தொலைபேசி வழியே நாம் காண்கிறோம். ஐந்து நட்சத்திர விடுதியிலுள்ள பல சொகுசு வசதிகளைக் கொண்ட அறையிலேயே கதை நகர்வதால் அந்த ஓட்டல் விளம்பரம் போல தோன்றுவதை தவிர்க்க முடியவில்லை. மேல்மாடியில் இருக்கும் பெண்ணின் பாத்திரம் சற்று வேறுபட்டதாக சித்தரிக்கப்பட்டிருக்கிறது. அவள் ஏதோ ஒரு தகவல்தொழில் நுட்ப பணியில் இருப்பவள். ஒரு ஆணுடன் சேர்ந்து வாழ்ந்துவிட்டு அது சரிப்பட்டு வராததால் தனியாக இருக்கிறாள். புகை பிடிப்பவள். மாலை நேரத்தில் பிரியாணி உண்பவள். சன்னியின் இசைத் திறமையை பாராட்டுகிறாள். பிறகு விடுதியை விட்டு செல்லும்போது அவனிடம் சாதாரணமாக விடை பெறுகிறாள். வாழ்க்கையை இயல்பாக தன்னம்பிக்கையுடன் எதிர்கொள்பவள் என்று எடுத்துக் கொள்ளலாம்.

முதல் நாள் வரை விவாகரத்து வேண்டும் என்று கூறியவள் குழந்தை பிறந்தவுடன் அந்தக் குழந்தைக்காக கணவனுடன் சேர்ந்து வாழ விரும்புகிறாள். இது நம் சமுதாயத்தில் பெண்கள் சந்திக்கும் முக்கிய பிரச்சினை. சில இல்லற கோபங்கள் மறக்க வேண்டியதுதானே. மறப்பதும் மறக்காதிருப்பதும் அவரவர் சூழ்நிலையும் சொந்த முடிவும்தானே? அவனுக்கு கவுன்சலிங் கொடுத்த மருத்துவர் திடீரென மாரடைப்பால் இறந்து விடுகிறார். அவனை உற்சாகப்படுத்திய மேல்மாடிப் பெண்ணும் விடைபெறுகிறாள். இந்த இரண்டு நிகழ்வுகளும் சூழ்நிலையின் கனத்தைக் கூட்டுகின்றன. அதே சமயம் அவனது சிக்கல்கள் ஒவ்வொன்றாக தீர்ந்து நம்பிக்கை பெறுகிறான். அவனுடைய அறைக்கு வெளியே தெரியும் கடலில் சில படகுகள் மெதுவாகவும் சில வேகமாகவும் செல்கின்றன. சிலவற்றில் ஒற்றை ஆள், சிலவற்றில் இரண்டு பேர், சில ஒரே திசையில், சில வந்த திசையிலேயே திரும்ப செல்வது என ஒவ்வொரு நாளும் காட்சிகள் விரிகின்றன. இயக்குனர் அதன்மூலம் வாழ்க்கையின் போக்குகளை உணர்த்துகிறாரோ?

கொரோனா எளிய மக்களுக்கு வழ்க்கைபாட்டை மேலும் துன்பமயமாக்கியது. மேல்தட்டு மக்களுக்கு ஏற்படும் பிரச்சினைகளை கொரோனா கால தனிமைப்படுத்துதல் மூலமாக இயக்குனர் சொல்லியிருக்கிறார். தனிமை, விரக்தி, தோல்வி ஆகிய சிக்கல்களில் நண்பர்கள், மருத்துவர்கள்,அக்கம்பக்கத்தார் ஆகியோரின் உதவி ஒருவனுக்கு எவ்வளவு முக்கியம் என்பதையும் சொல்கிறார்.