ஸ்ரீதர்பாரதியின் கவிதைகள்
சன்மானம்
**************
தவில்காரனின் நடைக்கும்
நாயனக்காரனின் ஏற்ற இறக்கத்திற்கும் ஏற்றபடி
பபூனை சோடியிட்டு
குலுங்கி ஆடுகிறாள்
குஜிலியம்பாறை ஆட்டக்காரி
செத்துப்போன சிலுக்குவார்பட்டி மைனர் மாத்திரம்
இந்நேரம் இருந்திருந்தால்
அள்ளி அணைத்து
குத்தியிருப்பார்
ஐநூத்தி ஒன்னு.
அரட்டல்
***********
சென்ற வருடம்
நாண்டுகொண்ட சின்னம்மா
வயதுக்கு வந்த தன் மகளை
அன்றாடம் அரட்டுவதாக
என்னிடம் குமைகிறாள்
அத்தை
அப்புராணி சின்னம்மா
அப்படி அரட்டுவதாயிருந்தால
கூத்தியாள்பேச்சைக்கேட்டு
கொடுமைப்படுத்திய
குடிகார சித்தப்பனை அல்லவா
அரட்டியிருக்கவேண்டும்?
நிழல்
********
வெயிலில் காய்கிறார்
வீரனார்
வீச்சரிவாள் மீது கவிகிறது
வேம்பின் நிழல்
தேஜஸ்
*********
பௌர்ணமி இரவில்
மினுங்கும் அரசிலைகளுக்கு
புத்தனின் தேஜஸ்
கிளை
********
பழங் கட்டிடத்தில் வேர் பிடித்து நிற்கும்
மரமொன்றின் சிறு கிளைக்கு
பறவையொன்றின்
பாதத்தோற்றம்
– ஸ்ரீதர்பாரதி
No Comments
