V. Kamaraj

இந்தியாவை
எப்படிப் பார்ப்பது;
அழைப்பது?
ஊர் என்று அழைப்பதா?
சேரி என்று சொல்வதா?

ஊரும் சேரியும்
கலந்து கிடக்கும் நாட்டை…
ஒன்று
ஊராக்கு!
இல்லையானால்
சேரியாக்கு!

இந்தியா
கிராமங்களில்தான் வாழ்கிறது!
கிராமங்கள் ;
ஊரென்றும் சேரியென்றும்
உறங்காமல் கிடக்கின்றன!

வெள்ளைக்காரன்
ஊர்த் தனம் செய்தானா?
சேரித்தனம் செய்தானா?
ஓட்டிவிட்டோம்!

ஊர் என்பது…
ஒரு கிராமத்தின் குறியீடா
சேரி மக்களை
தொடக்கூடாது என்போர் வாழும் குறியீடா?

சேரி என்பது
பிறருக்கு சேவை செய்வோர் வாழும் குறியீடா?

இந்திய மண்
எப்படி சேரி மக்களிடம் சேராமல் போனது?

மண் கூட
சேரி மக்களை சேர்க்காமல்
போனதோ?

சேரி வாழ்வோர்
தீட்டுடையவர் என்றால்;
அவர்
தீண்டும் உழைப்பில்
தீட்டுப் படுவதில்லையா?

ஊர் என்பதில்
உழைப்பவரும் வாழும் இடம்தானே?

ஏன்
சேரியின் ஒட்டுமொத்த
உழைப்பாளரும்,
ஊரின் ஒரு பகுதி உழைப்பாளரும்
ஒன்று சேராமல் போனார்கள்?

இந்திய
ஊர்… சேரி மக்கள்
உருவத்தில்…. நிறத்தில்
ஒன்றுடையவர் தானே?
ஒரு சிலர் தவிர!

உருவம்… நிறம்….
உணவுமுறை…. உடை…
எல்லாமும் ஒன்று;
ஊரும் சேரியும் தனி… தனி!

நாட்டின் வளர்ச்சிக்கு
நாளும் ஒரு திட்டம்;

ஊரும் சேரியும்
பிரிந்தே கிடப்பதற்கு
குள்ள நரிச் சட்டங்கள்!

கிராமங்கள்
ஊரென்றும் சேரியென்றும்
இருப்பதே இருக்கட்டுமெனில்….

எதற்காக
நடித்துக் கொண்டிருக்கிறோம்;
வேற்றுமையில் ஒற்றுமை?

இந்தியாவில் பிறந்த
அனைவரையும்
ஒன்று
ஊர் மக்களாக்கு….
இல்லையானால்
சேரி மக்களாக்கு!

முடியாது என்றால்
இந்தியாவை
சுதந்திர நாடு என்று
சொல்லாதே நிறுத்து!