Valiyilla Vazhkai Kavithai

தூரத்து மருத்துவமனையில்
மலைப் பாதை வரிசையில்
மருத்துவரைப் பார்க்க
உலர்ந்த எலும்பும்
சுருண்ட நரம்பும் உள்ள
கை கால்கள் குடைச்சலில்
குத்திய போதும்
போய் குந்திவிட வில்லை
புண்ணான
கண்கள் வரட்சியால் சுழற்றியடித்ததிலும் சொக்கவில்லை
சதையில்லா இடுப்பெலும்பிலிருந்து
நழுவியும் இறக்கி விட
மனமில்லை
காலிடுக்கில்
எறும்பு கடித்த போதும்
அவளது சின்னக்
குழந்தையை…

***********************
அப்பா நாத்தாங்காலில்
வெதச்ச நெல்லே
மொளைச்சி நமக்கு சோறாகிறது என்பதை அறிந்த
சிறுமிக்கு வந்த ஒரே சந்தேகம்
அம்மா சந்தையில் வாங்கிய உருளைக்கிழங்கும் வெங்காயமும் மொளைத்திருப்பதை பார்த்த அப்பா
ஏன்
அம்மாவைத் தெண்டக்காரினு திட்டிவிட்டு
தூக்கி எறிய சொன்னபோது!