வளவ. துரையன் கவிதைகள்

வளவ. துரையன் கவிதைகள்

1. எல்லாமே ஒன்றுதான்

எங்கள் வீட்டு
நாய்க்குட்டி
சேற்றில் புரண்டு
வந்தது.
அதைக்குளிப்பாட்டினேன்

எங்கள் வீட்டு
பூனைக்குட்டி
அணிலைப் பிடித்துத் தின்று
வாயில் குருதிக் கறையுடன்
வந்தது.
கையிலெடுத்துத்
துடைத்து விட்டேன்

எங்கள்வீட்டு
மல்லிகைக் கொடி
நேற்றடித்த காற்றில்
அலைபாய்ந்தாட
அதற்கு ஒரு
கொழுகொம்பு நட்டேன்.

என் கடைசிப் பையன்
கந்தக்குமாரன்
கபடி விளையாடிவிட்டுக்
கால்முட்டியில்
ரத்தத்துடன் வருகையில்
காயம் துடைத்து மருந்திட்டேன்.

எனக்கு எல்லாம் ஒன்றுதான்.

2 . எனக்கில்லை

மத்திய சிறைக்குள்ளே
நுழைவதென்றாலே
மனத்தில் ஓர் அச்சம்தான்.
மாறாத ஒரு நடுக்கம்தான்.

நான்கைந்து தடுப்பு
வாசல்களிலும்
நல்லமுறைச் சோதனைகள்.

கோரிக்கைகளை வென்றெடுக்க
ஆசிரியர் போராட்டத்தில்
அடியேனும் கலந்துகொண்டு
அங்கிருந்த நாள்கள்
அசைபோட வந்தன.

இப்பொழுதும் எதுவும்
மாறவில்லை.
பார்வையாளர் சந்திக்குமிடம்
அதிகாரிகளின் அலுவலகங்கள்
மிடுக்கான காவலர்கள்
வானளாவிய சுற்றுச் சுவர்.

கண்காணிப்பாளர்
இனிமையுடன் பேசினார்.
இனிப்பும் தேநீரும்
பிஸ்கட்டும் வந்தன.

எல்லாமே எனக்கில்லை
நான் அன்பளிப்பாக
அளித்த நூல்களுக்கே.

  3. அடிதான்

ஒரே ஒரு அடிதான்
மாவலியை அன்று
அதல பாதாளத்தில் அழுத்தியது.

ஒரே ஒரு அடிதான்
எல்லார் முதுகிலும்
பட்டுத் தெறித்தது.

ஒரே ஒரு அடிதான்
வண்டி மாட்டை
அப்பக்கம் திருப்பியது.

ஒரே ஒரு அடிதான்
கட்டையை இரண்டாகப்
பிளந்து காட்டியது.

ஒரே ஒரு அடிதான்
இன்று
அடித்த ஆசிரியரை

வீட்டிற்கு அனுப்பியது.

4. போலி சிரிக்கிறது

அரியாசனம் யாரும்
அமைத்துத் தராததால்
அரற்றுகிறது அசல்

போலிகள் தம்
பொக்கை வாயால்
சிரித்துக் கொண்டிருக்கின்றன.

போலிகள் எப்படியும்
பொய் எனும் ஆயுதம்
கொண்டு வெற்றி
பெறுகிறார்கள்

காலம்காலமாகவே
இந்திரன்கள்
வெற்றி பெற்றும்
கவுதமர்கள்
தோற்றுக் கொண்டும்
இருக்கிறார்கள்

எல்லாம் முடிந்தபிறகு
கல்லாய் மாறிப்பின்
கால்பட்டுப்
பெண்ணானது
என்ன நியாயம்?

போலி சிரிக்கிறதே

ஆமாம்
அசல் வருவதற்குள்
போலிக்குப்
புகழ்மாலை சூட்டும்
பொல்லாத உலகமிது

எழுதியவர்  :

வளவ. துரையன்

Click to Join Telegram Group Link : https://t.me/+lyAFK8ZE0iczZjE1

Click to Join WhatsApp Channel Link : https://whatsapp.com/channel/0029VanQNeO4NVioUBbXer3q

இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.

புக் டே இணையதளத்திற்கு தங்களது நூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து  படைப்புகளையும், எங்களது [email protected] மெயில் அனுப்பிட வேண்டுகிறோம்.