ஐரோப்பாவின் கண்ணீர் (Tear of Europe)
– ஏற்காடு இளங்கோ
தாரா நதி (Tara River) என்பது மாண்டினீக்ரோ (Montenegro) மற்றும் போஸ்னியா (Bosnia) ஆகிய இரு நாடுகள் வழியாகப் பாய்கிறது. தென்கிழக்கு ஐரோப்பாவில் அமைந்துள்ள நாடு மாண்டினீக்ரோ ஆகும். தெற்கு ஐரோப்பிய நாடு போஸ்னியாவாகும். தாரா நதி தனது பயணத்தை கொமோவி மலையின் அடியிலிருந்து தொடங்குகிறது. இது 146.6 கிலோமீட்டர் நீளம் கொண்டது.
இந்த நதி சுமார் 1000 முதல் 1333 மீட்டர் ஆழத்தில் ஓடுகிறது. இது ஐரோப்பாவின் மிகப்பெரிய, அழகான பள்ளத்தாக்கு ஆகும். அமெரிக்காவில் உள்ள கிராண்ட் கொலராடோ பள்ளத்தாக்குக்கு அடுத்தபடியாக உலகின் இரண்டாவது பெரிய ஆழமான நதி பள்ளத்தாக்கு இதுவாகும். இந்தப் பள்ளத்தாக்கின் வழியாக தாரா நதி பல கிலோமீட்டர் தூரம் வளைந்து, நெளிந்து செல்கிறது.
தாரா நதி உலகின் மிகவும் கவர்ச்சிகரமான நதிகளில் ஒன்றாகும். இதன் நீர் மிகவும் தெளிவாகவும், தூய்மையாகவும் இருக்கும். ஆகவே ஆற்றின் எந்த இடத்திலிருந்தும் தண்ணீரைக் குடிக்கலாம். அதன் தூய்மையின் காரணமாக இது “கண்ணீர்” என்று அழைக்கப்படுகிறது. இது நாட்டுப்புற உவமையின் படி ஒரு கண்ணீரைப் போல சுத்தமாகவும் தெளிவாகவும் உள்ளது. ஆகவே இதை “ஐரோப்பாவின் தூய்மையான நதி” என்று மக்கள் பெருமை கொள்கின்றனர். மேலும் ஐரோப்பாவின் கண்ணீர் (Tear of Europe) என அழைக்கின்றனர்.
இந்த நதி இயற்கை முத்து, இரத்தினம், வைரம், மரகதம் மற்றும் நீலப் பச்சை வண்ணம் கொண்ட டர்க்கைஸ் இரத்தினம் போல் ஒளிர்கிறது. இதன் காரணமாக இது மாண்டினீக்ரோவின் முத்து மற்றும் டர்க்கைஸ் நதி (Turquoise River) என்றும் அழைக்கப்படுகிறது. இங்கு உலகின் மிக அரிதான தாவரங்கள், விலங்குகள் மற்றும் நன்னீர் மீன்கள் வாழ்கின்றன. இதன் பள்ளத்தாக்கில் கருப்பு பைன் மரக்காடுகளும் உள்ளன. இந்த மரங்களின் பிரபலமான பகுதியைக் கருப்பு மைதானம் (Crna poda) என்கின்றனர்.
இந்தப் பள்ளத்தாக்கில் டர்மிட்டர் தேசியப் பூங்காவும் உள்ளது. நீரியியல், புவியியல் மற்றும் உயிரியல் ஆகிய மூன்று நிபந்தனைகளைப் பூர்த்தி செய்துள்ளதால் 1980 ஆம் ஆண்டு முதல் இது யுனோஸ்கோவின் உலகப் பாரம்பரிய தளமாக பாதுகாக்கப்படுகிறது. இந்த நதி ரப்பர் படகு (Rafting) ஓட்டுவதற்கு சிறந்த இடமாகும். இங்கு இரண்டு ராஃப்டிங் உலகப் போட்டிகளும் நடத்துள்ளது. சாகசம் புரிபவர்களுக்கு இது ஒரு சிறந்த இடமாக விளங்குகிறது.
கட்டுரையாளர் :
– ஏற்காடு இளங்கோ
Click to Join Telegram Group Link : https://t.me/+lyAFK8ZE0iczZjE1Click to Join WhatsApp Channel Link : https://whatsapp.com/channel/0029VanQNeO4NVioUBbXer3q
இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.
புக் டே இணையதளத்திற்கு தங்களதுநூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து படைப்புகளையும், எங்களது bookday24@gmail.com மெயில் அனுப்பிட வேண்டுகிறோம்.
