எழுத்தாளர் கல்யாணராமனின் “ஆயிரம் மைல்” சிறுகதை

எழுத்தாளர் கல்யாணராமனின் “ஆயிரம் மைல்” சிறுகதை

ஒரு இரவின் பின்னணியில், வாழ்க்கைச் சிக்கல்களை அலசும் இரண்டு நண்பர்கள் இடையேயான உரையாடல் 

இசைமொழியாய் எழுத்துகளை பின்னிப்பிணைக்கும் மெய்க்கவிஞர் மட்டுமே, வாசகரின் உள்ளுணர்வுகளைக் கொந்தளிக்க வைக்க முடியும். அந்த வகையில், “ஆயிரம் மைல்” சிறுகதை, வாழ்வின் கோணங்களை வெளிக்கொணரும் உன்னதமான படைப்பாகும். வாழ்க்கை முழுக்க ஒரு போராட்டமேயானாலும், சில சமயங்களில் அவை எவ்வளவு கோரமானதாக மாறலாம் என்பதையும், நம் கனவுகளுக்கும் நம் குறைகளுக்கும் இடையில் உண்டாகும் இருண்ட வலிகளையும், இந்தக் கதை வெளிப்படுத்துகிறது.

மன உணர்வுகளின் பயணம்

“ஆயிரம் மைல்” என்பது பசுமை நிறைந்த நட்பு, வாழ்க்கையின் கசப்பான உண்மைகள், விரக்தி, அடையாளக் குழப்பம், மீளும் முயற்சி ஆகியவை கலந்த மனதைக் கவரும் கதையாக இருக்கிறது. பாலா எனும் கதாநாயகனின் மனநிலை, அவன் எதிர்கொள்ளும் சவால்கள், தோல்விகள், காதலியால் ஏற்படும் மன உளைச்சல், குடும்பத்தினால் ஏற்படும் மன அழுத்தங்கள் ஆகியவையின் ஒட்டு மொத்த மன உணர்வுகளின் பயணங்கள் ஆகும்.
ஒரு சாதாரண இரவின் பின்னணியில், மிகப்பெரிய வாழ்க்கைச் சிக்கல்களை அலசும் கதையாக இது மாறுகிறது. பாலாவின் வாழ்வில் நிகழ்ந்த ஒவ்வொரு இழப்பும், அவனை உள்ளுக்குள் சிதைக்கிறது. சமுதாயத்தின் அழுத்தங்கள், பெற்றோர் எதிர்பார்ப்புகள், தன்னம்பிக்கையற்ற தன்மை, வேலை வாய்ப்பின்மை போன்ற பல்வேறு காரணங்கள், அவனை மன அழுத்தத்தின் விளிம்பில் நிறுத்துகின்றன.

வெளிப்படுத்தப்படும் உளவியல் பாதை

இந்தக் கதையில் பாலாவின் உள்ளார்ந்த உணர்ச்சிகள் மிக நுட்பமாக வெளிப்படுகின்றது. கதையின் தொடக்கத்தில் காணப்படும் இருள், மர்மம், இரவின் அமைதி இவை, அனைத்தும் கதையின் வலிமையை அதிகரிக்கின்றன. கதைநாயகன் பாலா, வாழ்க்கையில் நிலைத்து நிற்க முடியாமல் தடுமாறும் ஒரு இளைஞன். கல்வி முடித்த பிறகு வேலைகளை தொடங்கிக்கொண்டு மீண்டும் மீண்டும் தோல்வியடைகிறார். குடும்பத்தில் ஏற்படும் நெருக்கடிகள், சமூக அங்கீகாரம் குறைவு, நட்பு உறவுகளிலான இடர்ப்பாடுகள், இவை அனைத்தும் பாலாவின் மனநிலையை தொலைத்துவிடச் செய்கின்றது..

குமரனும் பாலாவின் வாழ்க்கையில் ஒரு முக்கிய பாத்திரமாக உருவாக்கப்பட்டிருக்கிறார். இருவரும் நண்பர்கள் என்றாலுமே, ஒருவருக்கொருவர் புரிந்து கொள்ளும் அளவுக்கு, வாழ்க்கையின் பல்வேறு கோணங்களில் அவர்களின் அனுபவங்கள் மாறுபடுகின்றன. குமரன் நிலையாக இருக்கிறான், பாலா திணறிக்கொண்டு இருக்கிறான். இந்த வேறுபாட்டை மிகவும் உணர்வுபூர்வமாக எழுத்தாளர் கல்யாணராமன் பதிவு செய்திருக்கிறார்.

நட்பின் ஆழம்

கதை முழுவதும், குமரன் – பாலா இருவருக்குமுள்ள உறவு மிகப் பெரிய பங்காற்றுகிறது. சில சமயம், குடும்பத்தினரைவிட நண்பர்களே வாழ்க்கையில் முக்கியமான ஆதரவாக திகழ்வார்கள். அந்த உண்மையை இந்தக் கதை அழுத்தமாக கூறுகிறது. “நீ இதை ஈஸியாகக் கடந்து, மேலே வருவடா நண்பா!” என்ற குமரனின் வார்த்தைகள், பாலாவிற்கு மீண்டும் ஒரு வாழ்க்கையின் கரம் பிடிக்கச் செய்கின்றன.

கதை முழுவதும் பாலா தனது வாழ்க்கையைப் பற்றிய எரிச்சலுடன் பேசுகிறான். குமரனிடம் அவன் எதிர்பார்ப்பது நட்பு, ஆறுதல், அல்லது வாழ்க்கையில் ஒரு வழிகாட்டல் கிடைக்கும் என்று எதிர்ப்பார்த்திருக்கலாம். இக்கேள்விகளுக்கு விடை கதையின் உள்விளக்கம் மிகத் தெளிவாக சொல்லப் படுகிறது – பாலா தேடிவந்தது நட்பிடம் ஒரு ஆறுதல்.

கதை முடிவில் பாலா, தனது தோல்விகளை ஒரு புன்னகையுடன் கடந்து செல்ல முடியும் என்ற நம்பிக்கையுடன், வாழ்க்கையைப் புதுமையாக பார்ப்பதற்கான வாய்ப்பை பெறுகிறான். இது, ஒரு சாதாரண கதையாக இல்லாமல், மனித மனநிலையின் மாற்றத்தைக் காட்டும் உளவியல் சித்திரமாகும்.

மொழி மற்றும் எழுத்து பாணி

எழுத்து பாணி மிக நேர்த்தியாக உள்ளது. உரையாடல்கள் இயல்பாகவும், உண்மையுடனும் இருக்கின்றன. குறிப்பாக, பாலா, குமரன் இடையேயான உரையாடல்கள், நண்பர்களுக்கிடையே நடைமுறையில் நடக்கும் சச்சரவுகளையும், ஆதரவையும் உணர்த்துகின்றன. கதை அமைப்பில் வாசகரை கதையின் உள்ளே ஈடுபடுத்தும் விதமாக அமைந்திருக்கிறது.

முடிவுரை

“ஆயிரம் மைல்” ஒரு சாதாரண வாழ்க்கை போராட்டத்தின் சித்திரம். ஒவ்வொருவரும் வாழ்க்கையின் ஏற்றத் தாழ்வுகளை சந்திக்க வேண்டிய கட்டாயத்தில், பாலாவின் கதையை பலரும் தங்கள் அனுபவத்தோடு ஒப்பிட்டு பார்க்கலாம். நட்பு, குடும்பம், எதிர்பார்ப்புகள், மற்றும் மன அழுத்தம் ஆகியவை கலந்திருக்கும் இந்தக் கதை, ஒரு வெறும் கதையாக அல்ல, வாழ்க்கையின் ஒரு பிரதிபலிப்பாக உணர்த்துகிறது.

எழுத்தாளர் கல்யாணராமனின் (Kalayanaraman) “ஆயிரம் மைல்” சிறுகதையை முன்வைத்து எழுதப்பட்ட விமர்சனக் கட்டுரை.

எழுதியவர் : 

வீ.விஜயகுமார்

உதவிய நூல் :

1. விபரீத ராஜ யோகம்
(சிறுகதைத் தொகுதி)
எழுத்தாளர் : கல்யாணராமன் (Kalayanaraman)
காலச்சுவடு பப்ளிகேஷன்ஸ் (பி) லிட்,
669, கேபி. சாலை, நாகர்கோவில் -629001

Click to Join Telegram Group Link : https://t.me/+lyAFK8ZE0iczZjE1

Click to Join WhatsApp Channel Link : https://whatsapp.com/channel/0029VanQNeO4NVioUBbXer3q

இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.

புக் டே இணையதளத்திற்கு தங்களது நூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து  படைப்புகளையும், எங்களது [email protected] மெயில் அனுப்பிட வேண்டுகிறோம்.