“பாட்டி பெயர் என்ன?” – நூல் அறிமுகம்
அறிவொளி இயக்கத்தில் பணியாற்றிய அனுபவம் காரணமாகவோ என்னவோ, எழுத்தாளர் ச. மாடசாமி மக்களுக்கு எளிதில் புரியும் மொழியில் நான்கு அழகான கதைகளை இப்புத்தகத்தில் வழங்கியுள்ளார். சிறிய புத்தகமாக இருந்தாலும், அதனுள் அடங்கியிருக்கும் மனிதநேயம், பாசம், உழைப்பின் மகத்துவம் போன்ற வாழ்க்கை மதிப்புகள் வாசகர்களை சிந்திக்க வைக்கின்றன.
“பாட்டி பெயர் என்ன?” என்ற தலைப்புக் கதை, இன்றைய தலைமுறைக்கும் முந்தைய தலைமுறைக்கும் இடையிலான உறவை நெகிழ்ச்சியுடன் பதிவு செய்கிறது. பல குழந்தைகளுக்கு தங்கள் பாட்டியின் பெயர்கூட தெரியாத சூழலில், பாட்டி என்பது அன்பின் வடிவமாகவும், கதைகளின் களஞ்சியமாகவும், சொலவடைகளின் பொக்கிஷமாகவும் இருப்பதை கதை உணர்த்துகிறது. பாட்டியிடம் ஓடிவரும் குழந்தைகளின் உலகமும், அவரின் திடீர் மரணம் ஏற்படுத்தும் வெற்றிடமும் மனதை நெகிழச் செய்கின்றன.
“அண்ணன் தம்பி சண்டை” கதை, குழந்தைப் பருவத்தில் ஏற்படும் சண்டைகளின் பின்னால் இருக்கும் அன்பை வெளிப்படுத்துகிறது. குழந்தைகள் சண்டையிட்டாலும் அடுத்த நொடியே மறந்து விடுகிறார்கள்; ஆனால் பெரியவர்கள்தான் அதை பெரிதாக்குகிறார்கள். சிறுவயது சண்டைகள் பிற்காலத்தில் பங்காளிச் சண்டைகளாக மாறும் சமூக உண்மையை நினைவூட்டியபடியே, சகோதர பாசத்தின் அழகை இந்தக் கதை எடுத்துரைக்கிறது.
“அணில் – சிலந்தி – காகம்” கதை, உழைப்பின் மேன்மையையும் நேர்மையின் அவசியத்தையும் வலியுறுத்துகிறது. பிறரை ஏமாற்ற நினைப்பவர்கள் இறுதியில் தாமே ஏமாறுவார்கள் என்ற வாழ்க்கைப் பாடத்தை எளிமையாக குழந்தைகளுக்கு எடுத்துச் சொல்கிறது.
“கைவிட்ட இடம்” கதை, மனித உழைப்பின் வலிமையைப் பேசுகிறது. சுடுகாடாகவோ தரிசு நிலமாகவோ இருந்த இடத்தைக் கூட மனித உழைப்பு பொன்னான இடமாக மாற்ற முடியும் என்பதை நம்பிக்கையுடன் கூறுகிறது. மனித முயற்சிக்கு முன் முடியாதது எதுவுமில்லை என்ற எண்ணத்தை விதைக்கிறது.
இந்த நான்கு கதைகளும் மனிதநேயம், உழைப்பு, பாசம், உறவுகளின் அருமை போன்ற உயர்ந்த பண்புகளை குழந்தைகளுக்கு கதை சொல்லும் பாங்கில் எடுத்துரைக்கின்றன. மக்களிடமிருந்து கற்றுக் கொண்ட அனுபவங்களை மீண்டும் மக்களிடமே கொண்டு சேர்க்கும் எழுத்தாளரின் முயற்சி இந்த நூலில் தெளிவாகத் தெரிகிறது.
குழந்தைகள் மட்டுமல்லாமல் பெரியவர்களும் வாசித்து ரசிக்கக்கூடிய, எளிமையான மொழியில் எழுதப்பட்ட சிறந்த நூல்களில் இதுவும் ஒன்று.
📚 நூலின் விவரங்கள்:
| தலைப்பு | விவரம் |
| நூலின் பெயர்: | “பாட்டி பெயர் என்ன?” |
| ஆசிரியர்: | ச. மாடசாமி |
| வெளியீடு: | |
| விலை: | Original price was: ₹.30 |
| அறிமுகம் எழுதியவர்: | ✍🏻 அமுதன் தேவேந்திரன் |
புத்தகம் வாங்க: https://thamizhbooks.com/
******************************************************************************
Click to Join Telegram Group Link : https://t.me/+lyAFK8ZE0iczZjE1
Click to Join Facebook: https://www.facebook.com/Book Day – Bharathi Puthakalayam
இப்பதிவு குறித்த தங்கள் கருத்துக்களை அவசியம் கீழே உள்ள Comment Boxல் பதிவிட வேண்டுகிறோம்.
புக் டே இணையதளத்திற்கு தங்களதுநூல் அறிமுகம், கட்டுரைகள் (அறிவியல், பொருளாதாரம், இலக்கியம்), கவிதைகள், சிறுகதை என அனைத்து படைப்புகளையும், எங்களது bookday24@gmail.com மெயில் அனுப்பிட வேண்டுகிறோம்.
