No Comments
2
சின்னதாக நிலவைப் பிய்த்துக் கொள்ள ஒரு கை நீண்டது
அதைத் தட்டிவிட்ட இன்னொரு கை
தொடாதே என் உடைமை என்றது
நிலவுக்கு நடந்த அசம்பாவிதம் கண்டு
தலைதெறிக்க ஓடி ஒளியத் தொடங்கின விண்மீன்கள்
மேகத் திரளுக்குள் வசதியாக நகர்ந்து
அமர்ந்து கொண்ட கதிரவன்
என் வெம்மையை வைத்துக்கொண்டே
இவன்களிடம் சமாளிக்க முடியலையே
இந்த பூமி பாவம் என்றிட
இடி இடியெனச் சிரித்தது இடி
கண்ணீர் சிந்தி பூமிக்கு ஆறுதல் சொன்னது மழை
அண்டசராசரத்தையும் எனது எனது
எனக்கு மட்டுமானது
நானே உயரம்
என்று அகப்பட்டதை கைக்கொண்டு
அடுத்தவரைப் பள்ளத்தில் தள்ளியபடி
சாதி சாத்தான்
சமயப்பிசாசு
கூட்டணி வருகிறது
ஓடுங்க
அது நம்மை நோக்கிதான் வருது
நிற்க
திரும்பி
எதிர்த்து நிற்க
கைவந்தது
சமமே யாவரும் சரிசமமே
மந்திரம்
உரத்துச் சொன்னால்
ஒதுங்கும் உருவங்களைக் கண்டுகொள்
No Comments
காசு கொடுத்து தனியாக
சனிப்பெயர்ச்சி குருபெயர்ச்சி புத்தகங்கள்
வாங்கி வருவார் அப்பா
வீட்டுச்சுற்று முடிந்து இரவலுக்கும் போகும்
பகுதி பகுதியாய் தினசரியில் வரும் பலன்களுக்காகக்
காத்திருப்பாள் அத்தை
சின்ன பாதம் வைத்து
ராசி தாண்டி குதித்துவிடும் நட்சத்திரங்களோடு
எப்போதும்
வாய்க்கா வரப்பு தகராறு
சமயத்தில் எந்த ராசிக்கு நற்பலனோ
அதுவாக மாற்றி
வாசித்துக் கொள்வதுண்டு எதிர்வீட்டு மாமா
அன்றாடம் சேனல்தோறும்
ராசிபலன் கேட்டு முடிந்தபின் வியக்கிறாள்
அம்மா
ஒரே அளவாய்ப்பிடிக்க வராத ரவாலட்டுக்காக
தன்னை ஏசும் மாமியார்
ஆளுக்கொன்றாய் நாளை உருட்டும் சோதிடர்களை
ஒன்றுமே சொல்வதில்லையே என
இப்போது வசதி
அலைபேசி முழுக்க கொட்டுகிறது பலன்கள்
இத்தனை வருடம் பார்த்தும்
யாரை யார் பார்த்தால்
தனக்கு நல்லது எனத்தெரியாத அப்பா
நினைவாக
குறித்துவைத்துக் கொள்கிறார் பெயர்ச்சி நாளை
எப்போதாவது நடக்கிறதா
என சரிபார்த்தீர்களா
அப்பாவிடம் கேட்க நினைத்து விழுங்கிக்கொண்டேன்
நானும்
சரிபார்க்காத பலன்கள் நினைவில்
No Comments
நீதிக்குப்பின் பாசம்
பிரித்து வாசிக்கக் கற்றுக்கொண்டபின் வந்தவர்களின் பரிபாலனத்தில்
ஆலவட்டக்குடைகள் ஆரஞ்சு நிறத்தில்
கண்ணாடிக்குள் பதப்படுத்தி மிதக்கும்
கைகள் நீள வாய்ப்பில்லை
உறுதிப்படுத்திக்கொண்டபின் நீளும் கரங்களில்
ரத்தவாடை
தூக்குக்கயிற்றை
நீட்டிய குற்றரேகைகளை
ரூபாய்த்தாள்கள் கொண்டு துடைத்துக் கொள்கிறார்கள்
இரண்டெழுத்துதானே
நடுங்காமல் உறையில் எழுதப்படுகிறது “நீட்’டாக
உமா மோகன்
No Comments
No Comments
No Comments